អគ្គិសនី​បង្ក​អគ្គិភ័យ នៅ​ផ្សារ​ចាស់?

«ម្ចាស់តូបគ្នា មិនទាន់បានមកដល់តូបទេ អណ្តាតភ្លើងវាចេញពីក្នុងតូបមក»។ នេះបើតាមការអះអាង របស់លោក ទិត្យ វិសាល នគរបាលប្រចាំការនៅផ្សារចាស់។
Loading...
  • ដោយ: អ៊ុម វ៉ារី ដោយ អ៊ុម វ៉ារី (ទំនាក់ទំនង៖ [email protected]) - ភ្នំពេញថ្ងៃទី២៤ វិច្ឆិការ ២០១៤
  • កែប្រែចុងក្រោយ: November 24, 2014
  • ប្រធានបទ: គ្រោះឆេះផ្សារ
  • អត្ថបទ: មានបញ្ហា?
  • មតិ-យោបល់

អគ្គិភ័យដែលបានលេបត្របាក់តូបអាជីវករ ប្រមាណ​ជា​ជាង​៣០០​តូប ត្រូវ​បាន​ពន្តត់​រួច​រាល់​ហើយ។ មន្ត្រី​អាជ្ញាធរ​បាន​ចង្អុល​បង្ហាញ ពី​មូលហេតុ​ដែល​បណ្ដាល​ឲ្យ​កើត​គ្រោះ​អាក្រក់​នេះ មក​ពី​បញ្ហា​ចរន្ត​អគ្គិសនី។

លោក ទិត្យ វិសាល នគរបាល​ប្រចាំ​ការ​នៅ​ផ្សារ​ចាស់ បាន​បញ្ជាក់​ប្រាប់​ទស្សនាវដ្តី​មនោរម្យ.អាំងហ្វូ នា​ព្រឹក​ថ្ងៃ​ទី២៤ ខែ​វិច្ឆិកា​នេះ​ថា រូប​លោក សន្តិសុខ​ផ្សារ និង​អាជីវករ​ផ្សារ​មួយ​ចំនួន​ បាន​ឃើញ​អណ្តាត​ភ្លើង​ឆេះ ចេញ​ពី​តូប​លេខ​១ ដែល​ជា​តូប​លក់​ចាន កែវ និង​គ្រឿង​ជ័រ។ លោក​បន្ត​ថា ក្រោយ​ឃើញ​សភាព​បែប​នេះ លោក សន្តិសុខ អាជីវករ នៅ​ក្បែរ​នោះ បាន​នាំ​គ្នា​យក​បំពង់​ពន្លត់​អគ្គីភ័យ មក​ជួយ​ពន្លត់​ដែរ តែ​មិន​រលត់។ ស្ថានភាព​ភ្លើងនៅពេលនោះ បាន​ឡើង​កំដៅ​កាន់​តែ​ខ្លាំង ដែលធ្វើឲ្យលោក​សម្រេច​ចិត្ត​ហៅ​ឡាន​ទឹក ដើម្បី​មក​ពន្លត់​ជា​បន្ទាន់។

មន្ត្រីប្រចាំការរូបនេះ បានបន្ថែមថា ជាងរយៈពេលតែសែសិបនាទីជាងប៉ុណ្ណោះ ភ្លើងក៏បានលេបត្របាក់តូប អស់ ជាច្រើន ក្នុងនោះតូបលក់សម្លៀកបំពាក់ច្រើនជាងគេ។ ក្នុងដីទំហំជាងកន្លះហិកតា ផ្សារចាស់នេះមាន​តូបអាជីវករចំនួន ៥៨៧តូប រួមទាំងតូបចល័ត (ប្រធានផ្សារ លោក យន់ ចាន់ដារា អះអាងថា មានតូបទាំង​អស់ ៩១៤តូប)។ ក្នុងហេតុការណ៍អគ្គីភ័យនេះ មានឡានទឹកចំនួនជិត២០ គ្រឿង ក្នុងនោះមានឡានជណ្តើរ​​មួយ​ផង។

ឯលោក ម៉េង លី អាជីវករដែលឈរសម្លឹងមើលរបៀបលត់អគ្គិភ័យ របស់ក្រុមអាជ្ញាធរនោះ ក៏បានថ្លែងប្រាប់​ទស្សនាវដ្តីដែរថា មូលហេតុកើតមកពីខ្សែភ្លើង។ តែលោកបានសម្ដែងការរិះគន់ថា មូលហេតដែលនាំឲ្យមាន​ការ​ឆាបឆេះ​ធ្ងន់ធ្ងរនេះ ព្រោះតែអាជ្ញាធរ រួមទាំងក្រុមពន្លត់អគ្គីសភ័យ គ្មានឧបករណ៍គ្រប់គ្រាន់ មកជាមួយ ដើម្បីគាស់តូបទាំងនោះ ក្នុងការពន្លត់ខាងក្នុងភ្លើង។ លោកបាននិយាយថា៖ «គ្មានឧបករណ៍គាស់ ភ្លើងឆេះ​ចេញពីខាងក្នុង "ក្តៅហើយងំ" តែក្រុមពន្លត់អគ្គីសភ័យ គិតតែបាញ់ ក្រោម លើៗ។»

ចំណែកឯលោក ព្រហ្ម យន នាយការិយាល័យពន្តត់អគ្គីសភ័យ នៃស្នងការរាជធានីភ្នំពេញ បានបន្ទោសគ្រោះ​អគ្គិភ័យនេះ ទៅលើភាពធ្វេសប្រហែលនៃក្រុមអាជីវករ ចំពោះចរន្តអគ្គីសនី។ លោកបន្តថា ការឆាបចេះ ត្រូវ​ចំណាយឡានទឹករហូតដល់៩០ឡាន ក្នុងការពន្លត់ ។ ឡានទាំងនោះមកពីប្រាំមួយអង្គភាពផ្សេងៗគ្នា មាន​ឡាន​ទឹកចំនួនជាង២០គ្រឿង ហើយជួយសង្គ្រោះបានត្រឹមតែជាង៤០% នៃផ្សារចាស់ទាំងមូលប៉ុណ្ណោះ។

តែបើទោះមានការឆេះខូចខាត តូបអាជីវករមួយចំនួនធំក្តី លោកអភិបាលរងសាលារាជធានីភ្នំពេញ លោក ឃួង ស្រេង បានបង្ហាញនូវមោទនៈភាពថា យ៉ាងហោចណាស់អគ្គីភ័យនេះ មិនឆក់យកជីវិតមនុស្ស។ លោក​បានថ្លែងទៅកាន់អ្នកសារព័ត៌មានថា៖ «សំខាន់យើងសង្គ្រោះបាន ដោយគ្មានការបាត់បង់អាយុ​ជីវិតរបស់​មនុស្ស។ នេះជាកត្តសំខាន់ដែលអាជ្ញាធររាជធានីភ្នំពេញ ថ្ងៃនេះបានបំពេញតួនាទី និងភារកិច្ចរបស់ខ្លួន។»។

ដោយឡែក អាជីវករម្នាក់ដែលនិយាយ ក្នុងល័ក្ខខ័ណ្ឌមិនបញ្ចេញឈ្មោះ បានបង្ហើបថា កាលពីពេលថ្មីៗនេះ អាជ្ញាធរធ្លាប់ស្នើឲ្យអាជីករផ្លាស់ប្តូរកន្លែងលក់ ដើម្បីយកទីតាំងផ្សារចាស់នេះ ជួសជុលឡើងវិញ។ ប៉ុន្តែក្រុម​អាជីវករ បានស្នើឲ្យអាជ្ញាធររៀបចំកន្លែងលក់ ជាបណ្តោះអាសន្នសិន និងរហូតដល់ថ្ងៃនេះ មិនទាន់មាន​ការ​ឆ្លើយតបឬរៀបចំអ្វីឡើយ រហូតមកដល់ព្រឹត្តិការណ៍ឆេះផ្សារ នាព្រឹកនេះតែម្ដង៕

សូមទស្សនារូបភាពផ្ទាល់ ដែលទស្សនាវដ្ដីបានចុះទៅថតផ្ទាល់៖
(មកដល់ក្នុងពេលបន្តិចទៀត)

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...