នៅវេលាម៉ោង ២០ និង ៤០នាទីយប់ ថ្ងៃទី១១ ខែសីហា ឆ្នាំ២០១៥ មានរថយន្តម៉ាក់ កាមរីឆ្លាម ពណ៌ស្ករ​មួយ​គ្រឿង ពាក់ស្លាកលេខ 2A 5854 ភ្នំពេញ បើកដោយបុរសម្នាក់ ដែលមិនស្គាល់ឈ្មោះ បានធ្លាក់ផ្លូវ ចូលទៅក្នុង​ប្រឡាយទឹកស្អុយមួយកន្លែង ស្ថិតនៅតាមផ្លូវ ៣០M ក្នុងភូមិ ដំណាក់ធំ៣ សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ។ មូលហេតុ នៃការបើកធ្លាក់ផ្លូវនេះ ត្រូវបានអ្នកនៅក្នុងហេតុការណ៍ និយាយថា ទំនងមកពី​បុរស ដែលជាអ្នកបើកបរ ស្ថិតក្នុងភាពស្រវឹងស្រា ។

បុរសម្នាក់នេះ បានធ្វើដំណើរក្នុងទិសដៅ ពីជើងទៅត្បួង ស្រាប់តែមកដល់កន្លែងកើតហេតុ រថយន្តក៏រេចង្កូត ទៅ​បុកនឹងដើមកខុបមួយដើម។ ដោយរថយន្តមិនទាន់អស់ល្បឿន ក៏ជ្រុលធ្លាក់ទៅក្នុងប្រឡាយទឹកស្អុយ។ នៅ​ពេលកើតហេតុនោះ រថយន្តនេះមិនបានបង្កផលប៉ះពាល់អ្វី ដល់អ្នកធ្វើដំណើរ ឬអ្នកនៅជុំវិញទីនោះឡើយ ចំណែក​អ្នកបើកបរវិញ ក្រោយពីកើតហេតុ ក៏ចុះពីរថយន្តឡើងជិះម៉ូតូឌុប គេចខ្លួនទៅបាត់។

ក្រោយពេលកើតហេតុ និងក្រោយការចាកចេញ របស់ម្ចាស់រថយន្ដ ក្រុមសមត្ថកិច្ចបានមកដល់ ដើម្បីជួយធ្វើ​អន្តរាគមន៍ក្នុងរឿងនេះ។ មួយសន្ទុះក្រោយមកទៀត ទើបគេឃើញភរិយា របស់ម្ចាស់រថយន្តបង្ក មក​ដោះ​ស្រាយ​ជាមួយសមត្ថកិច្ច នៅនឹងកន្លែងនោះ។

បើតាមសំដី របស់សមត្ថកិច្ចនៅកន្លែងកើតហេតុ បានប្រាប់ទស្សនាវដ្តីមនោរម្យ.អាំងហ្វូថា សមត្ថកិច្ចមិនអាច​យក​រថយន្តនេះ ទៅណាបានទេ ព្រោះរថយន្តមិនបានបង្ក ផលប៉ះពាល់ដល់អ្នកដ៏ទៃឡើយ។ ដូច្នេះ​រថយន្ត​ត្រូវ​បានប្រគល់ ឲ្យម្ចាស់វិញ ដើម្បីស្ទូចយកទៅជួសជុស៕