ជាព្រឹត្តិការណ៍មួយ ដែលតែងតែកើតមានមិនចេះចប់ ក្នុងលោកយើងនេះ។ តែសម្រាប់អ្នកដែលរងនូវការជិះជាន់ ធ្វើបាប គាបសង្កត់ វាជាកត្តាធម្មជាតិ ដែលពួកគាត់ត្រូវតែរកយុទ្ធវិធី ដើម្បីរើបម្រាស់នៅថ្ងៃណាមួយ។

អ្នកស្រី ជូលី ឃេដ អ្នកទទួលសំបុត្រ នៅក្នុងហិបទំនិញ។ រូបថត Randy Rasmussen/The Oregonian។

ជាការផ្ញាក់ផ្អើលមួយ សម្រាប់បុណ្យហាឡូវីន (Halloween) ខណៈដែលសំបុត្រមួយ បានធ្លាក់ទៅក្នុងដៃស្ត្រីជនជាតិ អាមេរិកាំងម្នាក់ និងបានសរសេរហៅរកជំនួយពីសំណាក់ អង្គការឃ្លាំមើលសិទ្ធិមនុស្ស ទៅលើពលកម្មខុសច្បាប់ និង​ដោយបង្ខំក្នុងប្រទេសចិន។ កាសែតចេញប្រចាំថ្ងៃ របស់អាមេរិកមួយឈ្មោះឌឺ អូរ៉េហ្គូនៀន (The Oregonian) បានដឹង​ទទួលដំណឹងដ៏សោកសៅ ហើយបានធ្វើរបាយការណ៍ ពីរឿងនេះ។

អ្នកស្រី ជូលី ឃេដ (Julie Keith) អាយុ៤២ឆ្នាំ បានចូលទៅទិញគ្រឿងប្រដាប់ប្រដាតែងផ្ទះ តាំងពីរមួយឆ្នាំមកហើយ ប៉ុន្តែទើបតែបើកហិបនេះនៅខែតុលាមុនប៉ុណ្ណោះ ខណៈអ្នកស្រីមានបំណងចង់តុបតែងផ្ទះលោកស្រី ទទួលបុណ្យ​ហាឡូវីន។ គឺនៅពេលនោះហើយដែលអ្នកស្រី បានរកឃើញ«សំបុត្រដ៏អាថ៌កំបាំង»មួយ ដែលគេមិនបាន​ផ្ញើរ​តាម​ប្រៃសនីយ៍ទេ តែដាក់ផ្លុងចោល នៅក្នុងហិបខ្ចប់ប្រដាប្រដាតែងផ្ទះនោះទៅវិញ។

ទារុណកម្ម វាយតប់ និងជេប្រមាថ

សំបុត្រនោះសរសេរជាអាថថា «បើអ្នកទិញផលិតផលនេះដោយចៃដន្យ សូមមេត្តាបញ្ជូនបន្តសំបុត្រនេះ ទៅអង្គការ​ពិភពលោកនៃសិទ្ធមនុស្ស ផង។ មនុស្សរាប់ពាន់នាក់ កំពុងរងនូវ ការធ្វើទុក្ខទោស ដោយអយុត្តិធម៌ ពីសំណាក់​រដ្ឋាភិបាលចិន ហើយពួកគេនឹងថ្លែងអំណរគុណអ្នក ជារៀងរហូតទៅ។» សំបុត្រដែលគ្មានចុះហត្ថលេខា មកពីការដ្ឋាន​ពលកម្មនៃខេត្ត សេនយ៉ាង (Shenyang - ភាគខាងជើងនៃប្រទេសចិន) នេះ បានបន្តថា «បណ្ដាជននៅទីនេះ ធ្វើការ​១៥ម៉ោងក្នុងមួយថ្ងៃ គ្មានពេលឈប់សម្រាក នៅចុងសប្ដាហ៍ និងគ្មានវិសមកាលអ្វីទាំងអស់។ ពួកគេរងនូវទារុណកម្ម ការវាយធ្វើបាប និងការជេប្រមាថ។ ពួកគេសឹងមិនដែល បានទទួលប្រាក់កម្រៃឡើយ (១០យ័ន ក្នុងមួយខែ -​ ប្រមាណ​ជា១,២០អ៊ឺរ៉ូ ឬ១,៥០ដុល្លាអាមេរិក)។»

អ្នកសរសេរសំបុត្រ បានពន្យល់ទៀតថា អ្នកធ្វើការសុទ្ធសឹងជាអ្នកជាប់ទោស ដែលមានរយះពេលខ្លី (មួយទៅបីឆ្នាំ) ហើយភាគច្រើនក្នុងចំណោមនោះ ជាអ្នកប្រតិបត្តិសាសនា ហ្វាលុង ហ្គង់(Falun Gong)។

សំបុត្រដែលផ្ញើរមកពីចិន។

កាសែតចេញប្រចាំថ្ងៃបានសាកសួរ អង្គការឃ្លាំមើលសិទ្ធិមនុស្ស ពីបញ្ហានេះ តែអង្គការនេះមិនអាចបញ្ជាក់បាន ពីការ​ពិតដែលមានសរសេរនៅក្នុងសំបុត្រនោះទេ បើទោះមានរឿងខ្លះនៅក្នុងសំបុត្រ «អះអាងពីលក្ខខ័ណ្ឌមួយចំនួន ដែល​អង្គការបានស្គាល់រួចហើយ នៅក្នុងជំរុំកែលំអរនោះក៏ដោយ»។ ក្រុមហ៊ុនដែលនាំផលិតផលនេះ ចូលមកលក់ក្នុង​សហរដ្ឋ​អាមេរិក និងអាជ្ញាធរមានសមត្ថកិច្ច របស់ប្រទេស ក៏កំពុងតែតាមដានស្រាវជ្រាវពីបញ្ហានេះដូចគ្នា ដោយហេតុថា គ្រប់​ផលិតផលណាក៏ដោយ ដែលកើតចេញពីការងារដោយបង្ខំ ត្រូវចាត់ទុកថា«ខុសច្បាប់» នៅសហរដ្ឋអាមេរិក។

ចំណែកអ្នកស្រី ជូលី ឃេដ វិញ បានសម្រេចចិត្ត នឹង«ឈប់ទិញ»ផលិតផល ដែលផលិតនៅប្រទេសចិនទៀតហើយ៕

-------------------------------------------------------
ដោយ ៖ ដារា រិទ្ធ - ភ្នំពេញ ថ្ងៃទី២៩ ខែធ្នូ ឆ្នាំ២០១២
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ