មន្ត្រី​បក្ស​ប្រឆាំង ប្រកាស​ឲ្យ​ប្រយ័ត្ន​គណនី​ហ្វេសប៊ុក​ក្លែងបន្លំ!

នៅចំពោះការដកស្រង់ ចេញពីការបង្ហោះ នៅលើគណនីហ្វេសប៊ុកនានា មកចុះផ្សាយ ដោយសារព័ត៌មានលំអៀង ទៅ​រក​គណបក្ស​កាន់អំណាចនោះ មន្ត្រីគណបក្សប្រឆាំង បានបង្ខំចិត្ត ត្រូវធ្វើប្រតិកម្ម ដោយប្រកាសឲ្យ​អ្នក​គាំទ្រ ប្រយ័ត្ន​ចំពោះ​គណនី​ហ្វេសប៊ុកក្លែងក្លាយ ដែលបន្លំជាកូន របស់មេដឹកនាំគណបក្សនេះ។
Loading...
  • ដោយ: សុបិន្ដ អត្ថបទ៖ សុបិន្ត ([email protected]) - ម៉ុងរ៉េអាល់ ថ្ងៃទី២៥ កក្កដា ២០១៥
  • កែប្រែចុងក្រោយ: July 26, 2015
  • ប្រធានបទ: ព័ត៌មានវិទ្យា
  • អត្ថបទ: មានបញ្ហា?
  • មតិ-យោបល់

ក្នុងរលកចលនា នយោបាយចុងក្រោយនេះ កូនចៅរបស់មេដឹកនាំ គណបក្សប្រឆាំង ទំនងជាត្រូវបាន ប្រព័ន្ធ​ផ្សព្វផ្សាយជាច្រើន សម្ដែងការចាប់អារម្មណ៍ ហើយយកសម្ដីរបស់ពួកគេ មកធ្វើសរសេរជាអត្ថបទ ចេញ​ផ្សាយ​យ៉ាងព្រោងព្រាត។ នៅចំពោះហេតុការណ៍ ដែលធ្វើឲ្យរជើបរំជួលនេះ បានជំរុញឲ្យមន្ត្រីគណបក្សប្រឆាំង ចាំ​បាច់ត្រូវធ្វើប្រតិកម្ម ព្រោះបញ្ហាដែលសំខាន់នោះ គឺពាក្យសម្ដីដែលដកស្រង់ ដោយក្រុមសារព័ត៌មានទាំងនោះ ត្រូវបានបង្ហោះផ្សាយ ដោយម្ចាស់គណនីអានាមិកជាច្រើន ដែលបានក្លែងគណនីហ្វេសប៊ុក មើលទៅ ដូចជា​កូនចៅ របស់មេដឹកនាំទាំងនោះ យ៉ាងដូច្នេះ។

តំណាងរាស្ត្រ និងជាមន្ត្រីមួយរូប មកពីគណបក្សសង្គ្រោះជាតិ លោក អេង ឆៃអៀង បានសរសេរ នៅលើ​គណនី​ហ្វេសប៊ុករបស់លោកថា៖ «សូមអ្នកគាំទ្រគណបក្សសង្គ្រោះជាតិ ពង្រឹងជំហរ និងស្មារតីឲ្យរឹងបឹុង ព្រោះ​បច្ចុប្បន្ន គូប្រជែងរបស់យើង កំពុងបើកយុទ្ធនាការ បំបែកបំបាក់គណបក្សសង្គ្រោះជាតិ តាមរយៈ​ការ​បង្កើត គណនី​ក្លែងក្លាយ នៅលើបណ្តាញសង្គម ដើរតួជាកូន សម រង្សុី - កឹម សុខា ហើយនិយាយរឿង​នយោបាយ​ស្រុកខ្មែរ និងបន្ទាប់មក គេឲ្យប្រព័ន្ធផ្សព្វផ្សាយ គាំទ្រគណបក្សរបស់គេ យកទៅផ្សព្វផ្សាយបន្ត»។

ជាធម្មតាទេ ការចុះផ្សាយ របស់សារព័ត៌មានមួយចំនួន ដែលមាននិន្នាការ គាំទ្រគណបក្សកាន់អំណាច និង​រដ្ឋាភិបាល មិនមានផលល្អ សម្រាប់គណបក្សប្រឆាំងឡើយ រហូតដល់ធ្វើលោក សម រង្ស៊ី ប្រធាន​គណបក្ស​សង្គ្រោះជាតិ ចាំបាច់ត្រូវធ្វើការ ឆ្លើយតបមកវិញ នោះទៀត។

តែអ្វីដែលគេត្រូវនិយាយ មុននឹងត្រូវ«ហៃអី» ជឿប្រព័ន្ធផ្សព្វផ្សាយទាំងនោះ គេត្រូស្វែងយល់សិនថា តើ​សារព័ត៌មាននោះ មានប្រភពអំណះអំណាង មកពីណា? មិនពិបាកទេ ព្រោះម្ចាស់អត្ថបទ ច្បាស់ជាឆ្លើយ​មក​វិញ យ៉ាងស្រួលថា យកប្រភពពីគណនីហ្វេសប៊ុក របស់កញ្ញា កឹម សម្មាធីតា (កូនស្រីរបស់លោក កឹម សុខា) របស់អ្នកស្រី សម រាឆែល (កូនស្រីរបស់លោក សម រង្ស៊ី) ឬរបស់លោក សម សារ៉ុម (កូនប្រុសរបស់លោក សម រង្ស៊ី) ជាដើម។ សំនួរសួរជាបន្ត ថាតើគណនីទាំងនោះ ជាគណនីពិត របស់អ្នកទាំងនេះឬ?

មកដល់ត្រង់ចំណុចនេះ អ្នកអានភាគច្រើន មិនបានចាប់អារម្មណ៍ទេ។ ទស្សនាវដ្ដីមនោរម្យ.អាំងហ្វូ បាន​សុំ​ការបកស្រាយ ពីលោក សុធា មេត្តា វិស្វករផ្នែកព័ត៌មានវិទ្យា មានដើមកំណើតខ្មែរ ដែលកំពុងរស់នៅ ក្នុង​ប្រទេស​កាណាដា លើករណីនេះ។​ លោកបាននិយាយថា ការផ្សព្វផ្សាយនេះមានពីរយ៉ាង៖

១) អ្នកសារព័ត៌មាននោះ ឬក្រុមរបស់ខ្លួន បានបង្កើតព័ត៌មាននេះ នៅលើបណ្ដាញសង្គម តាមរយៈការ​បង្កើត​គណនីក្លែងក្លាយ របស់ជនសំខាន់ៗល្បីៗ ហើយបន្ទាប់មក ក៏ទៅយកព័ត៌មាននោះ មកចុះផ្សាយ នៅលើទំព័រ​សារព័ត៌មានរបស់ខ្លួន និងធ្វើឲ្យគេយល់ថា មានប្រភពពីគណនីនោះ ថាជាការពិត។ រឿងនេះ មានច្រើនករណី​ណាស់ ដូចជាគេហទំព័រមួយ ចេញផ្សាយក្នុងស្រុក បានឧស្សាហ៍ចុះផ្សាយ ពីការបែកធ្លាយនានា នៅក្នុង​បណ្ដាញ​សង្គមណាស់។ តែបើតាមការសង្កេត ឲ្យស៊ីជម្រៅ គេនឹងឃើញ មានគណនីអានាមិក ចំនួនពី៥ទៅ​១០​គណនី បានធ្វើសកម្មភាពនេះមុន ដោយបានបង្ហោះ នូវរូបស្រាតរបស់នារីណាម្នាក់ ឬរូបតារា... នៅលើ​ហ្វេសប៊ុក។ ការ​ធ្វើដូច្នេះ គឺដើម្បី​ឲ្យ​គេហទំព័ររបស់គេ មានប្រភព យកមកធ្វើជាលេស ក្នុងការចេញផ្សាយ​អត្ថបទ បង្អើលគេ​ឯង។

២) អ្នកសារព័ត៌មាននោះ គ្មានសមត្ថភាពគ្រប់គ្រាន់ ក្នុងការត្រួតពិនិត្យ ថាតើគណនីនោះពិត ឬក្លែងក្លាយនោះ​ឡើយ។ ផ្ទុយទៅវិញ ​ឲ្យតែមានអ្វី ត្រូវបានបង្ហោះ នៅលើគណនីនោះ ក៏តាំងខ្លួនដកស្រង់ យកមកចុះផ្សាយបន្ត រួចថែមទាំងអះអាង​ថា ខ្លួនមានប្រភពគ្រប់គ្រាន់ ដូចជាការសរសេរយក ដោយត្រង់ថា «កូនស្រី​របស់លោក កឹម សុខា បាន​រិះគន់​ដំណើរ​ ទៅ​ក្រៅប្រទេស​របស់លោក សម រង្ស៊ី ស្របពេល​សកម្មជន​ខ្លួន ​កំពុង​ជាប់​ពន្ធនាគារ»​ជាដើម។

ករណីទាំងពីរខាងលើ ត្រូវបានលោក សុធា មេត្តា ថ្លែងថា សុទ្ធតែជាចុះផ្សាយ ដែលគ្មានវិជ្ជាជីវៈ ឬ​ជា​ការ​ចុះ​ផ្សាយ ​ដើម្បី​តែផលប្រយោជន៍ផ្ទាល់ខ្លួន ឬក្រុមខ្លួនប៉ុណ្ណោះ៕

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...