«We had such a great time last night getting to know each other's families. Love my dad and Lok Om Sy selfie pose. ☺️☺️» នេះជាសំណេរជាភាសាអង់គ្លេស របស់អ្នកស្រី ហ៊ុន ម៉ាណា នៅលើទំព័រ​ផ្លូវ​ការ​របស់អ្នកស្រី ដែលទស្សនាវដ្ដីមនោរម្យ.អាំងហ្វូ សូមធ្វើការបកប្រែ ក្រៅផ្លូវការដូចតទៅ៖ «យើង​មាន​ពេល​វេលា ដ៏អស្ចារ្យមួយ កាលពីយប់ម៉ិញ ដើម្បីស្គាល់គ្នាទៅវិញទៅមក រវាង​គ្រួសារ​ទាំង​សង​ខាង។ ស្រឡាញ់​​រូបថត លោកឪពុកខ្ញុំ និងលោកអ៊ុំ ស៊ី ដែលថតដោយខ្លួនឯង ខ្លាំង​ណាស់។»

សំណេររបស់អ្នកស្រី ហ៊ុន ម៉ាណា ដែលមានអមដោយរូបថត បីសន្លឹកខាងលើ បានធ្វើឡើងកាល​ពីបួន​ម៉ោង​មុននេះ នៅក្រោយការបង្ហោះរូបថតខាងក្រោម របស់ទំព័រហ្វេសប៊ុកមួយទៀត ដែលមានឈ្មោះថា «Samdech Hun Sen, Cambodian Prime Minister» ជាមួយនឹងពាក្យពេជ្យពន្យល់ ពីវប្បធម៌សន្ទនា​ ដែល​បាន​បង្ហោះ តាំង​ពី១១ម៉ោងមុន។

ទំព័រដែលគេស្គាល់ថា ជារបស់លោកនាយករដ្ឋមន្ត្រី ហ៊ុន សែន បានសរសេរអម នឹងរូបថតខាងលើថា៖ «គ្រប់​​យ៉ាង​ដែល សម្តេចតេជោ ហ៊ុន សែន បានលះបង់ និងកំពុងអនុវត្តិន៍ គឺដើម្បីប្រជាពលរដ្ឋ និង ប្រទេស​ជាតិ​យើង​ទាំង​មូល។ ការជួបជុំពិសារភោជនាហារ ជាគ្រួសាររួមគ្នារវាង សម្តេចតេជោ ហ៊ុន សែន និង លោក សម រង្សី កាល​ពីយប់មិញ គឺកាន់តែផ្តល់ភាពកក់ក្តៅនិងជំនឿ ទុកចិត្តកាន់តែខ្លាំងឡើង ដល់ប្រជា​ពលរដ្ឋ​ទូទាំង​ប្រទេស។»

លុះ១ម៉ោងមុននេះ រូបថតបីសន្លឹក ពីក្នុងចំណោមរូបថតខាងលើ ត្រូវបានទំព័រហ្វេសប៊ុកផ្លូវការ របស់លោក សម រង្ស៊ី យកមកបង្ហោះដែរ ដោយមានអម ជាមួយនឹងពាក្យពេជ្យ លើកសរសើរ ពីវប្បធម៌សន្ទនាដែល​លោក និងលោក ហ៊ុន សែន កំពុងធ្វើសព្វថ្ងៃ។ ពាក្យសរសើរនោះ បានបង្ហាញពីគុណប្រយោជន៍​ចំនួន៣ ដែល​កើត​ចេញពីវប្បធម៌សន្ទនា នោះគឺ (១) គណៈកម្មាធិការជាតិ រៀបចំការបោះឆ្នោតថ្មី (២) សុខ​សុវត្ថិភាព​ដល់​សមាជិក​គណបក្ស និង (៣) ស្ថានីយ៍ទូរទស្សន៍ របស់គណបក្ស​សង្គ្រោះ​ជាតិ។

រូបថតទាំងប៉ុន្មាននេះ បានធ្វើដំណើរហោះហើរ ពាសពេញបណ្ដាញសង្គម នៅព្រឹកថ្ងៃអាទិត្យនេះ ដោយមាន​ទាំងពាក្យអបអរសាទរ និងពាក្យរិះគន់ ហោះទៅជាមួយផង។ ក្រុមអ្នកមិនពេញចិត្ត និងសកម្មភាពជួបជុំ​គ្នា​នេះ បានវាយ​តម្លៃ​ថា នៅប្រទេសកម្ពុជានៅពេលនេះ មិនមានគណបក្សប្រឆាំងទេ។ លោក ខឹម វាសនា ប្រធាន​គណបក្ស​សម្ព័ន្ធ ដើម្បី​ប្រជាធិបតេយ្យ បានសរសេរ នៅលើគណនេយ្យហ្វេសប៊ុក របស់​លោក​ថា៖ «បាន​មក​ដល់តំណាក់​កាល​នេះ គឺដោយសារតំណក់ញើស និងតំណក់ឈាមរបស់រាស្ត្រ»។

សម្រាប់លោក ព្រហ្ម គិត អតីតមន្ត្រីវ័យចំណាស់ ច្រើនជំនាន់ពីកម្ពុជាវិញ បានថ្លែងថា សម្រាប់កូនចៅ និង​សមាជិក​អ្នកគាំទ្រមេដឹកនាំទាំងពីរ ការញ៉ាំអាហារ ជាលក្ខណៈគ្រួសារនេះ អាចចាត់ទុកថា នេះជាពេល​វេលា​«ដ៏អស្ចារ្យ» ក្នុងការដើរទៅមុខទាំងអស់គ្នា ដើម្បីជាតិនិងប្រជាជន។ ប៉ុន្តែវប្បធម៌សន្ទនា គ្រាន់តែជា​ពាក្យ​សម្ដី សម្បកក្រៅប៉ុណ្ណោះ ព្រោះនៅប្រទេសប្រជាធិបតេយ្យ វប្បធម៌ជជែកគ្នានេះ វាត្រូវតែមាន ជា​កក្តាសត្យានុម័ត មិនមែនទាល់តែឃើញ មនុស្សប៉ុន្មាននេះជជែកគ្នា ទើបគេហៅថា ចេះធ្វើការដើម្បី​ជាតិ​នោះទេ។ មន្ត្រី​ចូល​និវត្តន៍ ដែលកំពុងរស់នៅក្នុងតំបន់ ពីរ៉ាណេ នៃប្រទេសបារាំងរូបនេះ បានសង្កត់ធ្ងន់ថា មនុស្សប៉ុន្មាន​នាក់​នេះ ត្រូវតែជួបគ្នា ជជែកគ្នា ដើម្បីជាតិ ព្រោះវាជាកាតព្វកិច្ច៕

» រូបថតដទៃទៀត នៃអាហាររួមគ្នា នៃគ្រួសារមេដឹកនាំកំពូលទាំងពីរ៖