បើរាប់ពីពេលមុនៗមក គោរមងារជា«សម្ដេច» នៅក្នុងរាជាណាចក្រកម្ពុជា មានប្រមាណតែជាង១០គោរមងារទេ ដោយក្នុងនោះ មាន៨គោរមងារ ត្រូវបានផ្ដល់ទៅឲ្យមន្ត្រីជាន់ខ្ពស់ មកពីគណបក្សប្រជាជនកម្ពុជា។ តែនៅក្នុងថ្ងៃនេះ ព្រះរាជាណាចក្រអច្ឆរិយៈ មាន«សម្ដេច»ម្នាក់ទៀត ដែលទើបនឹងត្រូវបានព្រះ​មហាក្សត្រ ព្រះបាទ ព្រះបរមនាថ នរោត្តម សីហមុ​នី ប្រោសព្រះរាជទាន ទៅឲ្យលោក ទៀ បាញ់ ឧបនាយករដ្ឋមន្រ្តី និងជារដ្ឋមន្រ្តីការពារជាតិ តាមយៈព្រះរាជក្រឹត្យមួយ។

ព្រះរាជក្រឹត្យរបស់ព្រះមហាក្សត្រ ចុះថ្ងៃទី២៩ ខែកក្កដានេះ បានឲ្យដឹងថា លោក ទៀ បាញ់ ដែលគេស្គាល់ថា ជាបុរសស្មោះស្ម័គ្រ​ របស់លោកនាយករដ្ឋមន្ត្រី ត្រូវមានគោរមងារថ្មី ហៅថា «សម្តេចពិជ័យសេនា ទៀ បាញ់»។ ការប្រោសព្រះរាជទាននេះ ដោយព្រះមហាក្សត្រទ្រង់យល់ថា លោករដ្ឋមន្ត្រីរូបនេះ ជាមេដឹកនាំដ៏ឆ្នើម ចូលរួមជួយដឹកនាំប្រជាជាតិ តាមរដ្ឋធម្មនុញ្ញ ឆ្នាំ១៩៩៣ - ចូលរួមកសាងប្រព័ន្ធច្បាប់ ដើម្បីជាឧត្ដមប្រយោជន៍ដល់សង្គមជាតិ។ល។» 

​ព្រះ​រាជ​ក្រឹត្យ​ដដែលនោះ មិនឃើញមានដាក់ ទីកន្លែងតែងតាំងគោរមងារនេះ ថាត្រូវបានធ្វើឡើង នៅកន្លែងណាទេ ខណៈព្រះមហាក្សត្រ កំពុង​ពិនិត្យ​ និង​ព្យាបាល​ព្រះរាជ​សុខភាព នៅឯប្រទេសចិន។ ការមិនដាក់ទីកន្លែងនេះ មានលក្ខណៈដូចគ្នាទៅនឹងព្រះរាជក្រឹត្យ តែងតាំងគោរមងារ ជា«សម្ដេចវិបុលបញ្ញា» ជូនលោក សុខ អាន ដែលរងការរិះគន់ ក្នុងពេលកន្លងមក ថាជាគោរមងារ«សេះហោះ»។

លោក ទៀ បាញ់ គឺ​ជា​មេដឹកនាំ​ជាន់​ខ្ពស់​ទី ៩ មក​ពី​គណបក្ស​ប្រជាជន​កម្ពុជា ដែល​ត្រូវ​បាន​ផ្ដល់​គោរម​ងារ​ជា “សម្ដេច” បន្ទាប់​ពី​លោក ជា ស៊ីុម - លោក ហេង សំរិន - លោក ហ៊ុន សែន - អ្នកស្រី ប៊ុន រ៉ានី (ភរិយាលោក ហ៊ុន សែន) លោក ស ខេង - លោក សាយ ឈុំ - លោក គង់ សំអុល និង​លោក សុខ អាន៕