ក្រុមយុវជន ដែលដឹកនាំដោយ «សម្ព័ន្ធសេនានាគ» ប្រចាំខណ្ឌដូចពេញ ខណ្ដទួលគោក ខណ្ឌ៧មករា និង​ខណ្ឌ​មួយចំនួនទៀត ក្នុងរាជធានីភ្នំពេញ រួមទាំងមកពីបណ្តាខេត្តនានាផង បានមកជួបជុំគ្នា នៅមុខរដ្ឋសភា​នា​ព្រឹកថ្ងៃទី២៦ ខែតុលានេះ ដើម្បីធ្វើការទាមទារ ទម្លាក់លោក កឹម សុខា មេដឹកនាំគណបក្សប្រឆាំង ចេញពី​តំណែង ​អនុ​ប្រធាន​ទីមួយនៃរដ្ឋសភា។

ការទាមទាររបស់ក្រុមយុវជន ត្រូវបានតំណាងរាស្រ្តប្រាំពីររូប មកពីគណបក្សប្រជាជនកម្ពុជា ចេញមកធ្វើការ​គាំទ្រ និងស្វាគមន៍។ នេះជាករណីដ៏កម្រមួយ ដែលតំណាងរាស្រ្ត មកពីគណបក្សប្រជាជនកម្ពុជា បានចេញ​«មុខមកគាំទ្រ» ដល់ក្រុមបាតុករ។ ក្នុងចំណោមតំណាងរាស្រ្តទាំងនោះ ក៏មានតំណាងរាស្រ្ត មណ្ឌល​ខេត្ត​កំពង់ស្ពឺ​មួយរូប គឺលោក ហ៊ុន ម៉ានិត ដែលត្រូវជាកូនប្រុស របស់លោកនាយករដ្ឋមន្រ្តី ហ៊ុន សែន នោះដែរ។

គេសង្កេតឃើញថា បាតុកម្មរបស់ក្រុមយុវជន ដែលដឹកនាំដោយក្រុម «សម្ព័ន្ធសេនានាគ» មិនមានការ​ឃាត់​ឃាំង ពីក្រុមសមត្ថកិច្ចចម្រុះរបស់កម្ពុជា ផ្ទុយគ្នាស្រឡះ ពីបាតុកម្មនានា របស់ប្រជាពលរដ្ឋ ក្នុងរឿង​សិទ្ធិ​ដីធ្លី និងលំនៅដ្ឋាន ក៏ដូចជាការទាមទារ របស់ក្រុមយុវជនក្នុងរឿងបរិស្ថាន ដែលទីបំផុតទៅ ពលរដ្ឋទាំងនោះ ត្រូវ​បានអាជ្ញាធរចាច់ឃុំខ្លួន​នៅពន្ធនាគារ ជាបន្តបន្ទាប់នោះឡើយ។

ក្រុមមន្ត្រីអង្គការសិទ្ធិមនុស្ស ធ្លាប់បានលើកឡើងថា ក្រុមយុវជន​ដែលដឹកនាំដោយក្រុម សម្ព័ន្ធសេនានាគ ទាំង​នោះ មាននិន្នាការគាំទ្រគណបក្សប្រជាជនកម្ពុជា ហើយនៅពេល ដែលពួកគេជួបជុំគ្នា ធ្វើអ្វីមួយ (ដូចជាការ​ប្រជុំ​គ្នាស្បថ នៅព្រះអង្គដងកើរ)  មិនដែលមានការរារាំង ពីក្រុមអាជ្ញាធរខណ្ឌ និងរាជធានីឡើយ។ ផ្ទុយទៅវិញ អាជ្ញាធរ ថែមទាំងជួយសម្រួលការងារ និងការពារពួកគេ យ៉ាងពេញទំហឹងថែមទៀតផង។

» សូមអានព័ត៌មានបន្ថែម ដោយចុចនៅលើទីនេះ។

ប្រភពព័ត៌មានច្បាស់ការណ៍ ដែលទស្សនាវដ្តីមនោរម្យ.អាំងហ្វូទទួលបាន ពីក្រុមមន្ត្រីសមត្ថកិច្ច ដែលមាន​វត្តមាន នៅក្បែរក្រុមយុវជន «សំព័ន្ធសេនានាគ» បានបង្ហើបថា ពួកលោកទទួលបញ្ជា ឲ្យមកការពារ និងជួយ​សម្រួល​ឲ្យក្រុមទាំងនោះ ធ្វើកិច្ចការរបស់ខ្លួន​សម្រេចដោយជោគជ័យ។ ពួកលោក​គ្មានភារកិច្ចណាមួយ ដែល​បាន​បញ្ជារ​ឲ្យមកធ្វើការរារាំង បាតុកម្មរបស់យុវជនទាំងនេះឡើយ។ មន្រ្តីសមត្ថកិច្ចម្នាក់ ដែលទំនងជាមិន​ពេញ​ចិត្ត នឹងបញ្ជាមេរបស់ខ្លួននោះ បានលើកឡើងដែរថា នេះជាផែនការ ដែលរៀបចំឡើង ដោយគណបក្ស​ប្រជាជន​​កម្ពុជា។

ជាងនេះទៅទៀត បើតាមលោក ហ៊ុន សែន ដែលបានថ្លែងឲ្យដឹង ពីរដ្ឋធានីប៉ារីស ប្រទេសបារាំងនោះ បាន​អះអាងថា បាតុកម្មរបស់ក្រុមយុវជន «សម្ព័ន្ធសេនានាគ»នេះ ជាការឆ្លើយតប ទៅនឹងបាតុកម្មជាប់ៗគ្នា របស់​ពលរដ្ឋខ្មែរ-បារាំង ដែលបានធ្វើឡើង នៅកណ្ដាលរដ្ឋធានីប៉ារីស ដើម្បីធ្វើការទាមទារ ឲ្យរដ្ឋាភិបាល ត្រូវ​គោរព​ឲ្យ​បានខ្ជាប់ខ្ជួន នូវកិច្ចព្រមព្រៀងទីក្រុងប៉ារីស និងជាពិសេស បានទាមទារឲ្យលោកនាយករដ្ឋមន្រ្តី ហ៊ុន សែន ចុះចេញពីតំណែង។ គណបក្សប្រជាជនកម្ពុជា បានចាត់ទុកបាតុកម្ម​នៅក្នុងប្រទេសបារាំង ថាជាការរៀបចំ​ឡើង របស់គណបក្សប្រឆាំង។

សេចក្ដីប្រកាសព័ត៌មានមួយ របស់គណបក្សប្រជាជនកម្ពុជា ដែលចេញផ្សាយពីរដ្ឋធានី​ប៉ារីស ប្រទេសបារាំង បានសរសេរឲ្យដឹងថា បាតុកម្មដែលរៀបចំ ក្នុងរដ្ឋធានីប៉ារីស ថ្ងៃទី២៤ ខែតុលានោះ បានធ្វើឡើងក្រោមផ្លាក​បាតុកម្ម របស់​ប្រជាជន ប្រឆាំងរដ្ឋាភិបាលស្របច្បាប់ ដែលដឺកនាំដោយគណបក្សប្រជាជនកម្ពុជា និងមិនមែន​ជាបាតុកម្ម របស់​ប្រជាជនកម្ពុជាទេ។ បាតុកម្មនេះ ជាការរៀបចំឡើង ដោយអ្នកគាំទ្រគណបក្សប្រឆាំង មួយ​ក្រុម​តូច និង​មេដឺកនាំរបស់ខ្លួន ក្នុងគោលបំណងបម្រើកម្មវត្ថុនយោបាយ។

» សូមអានព័ត៌មានបន្ថែម ដោយចុចនៅលើទីនេះ។

ប៉ុន្តែការចោទប្រកាន់ខាងលើ ត្រូវបានអ្នកនាំពាក្យគណបក្សសង្គ្រោះជាតិ លោក យឹម សុវណ្ណ បដិសេធចោល។ ថ្លែងនៅក្នុងវិទ្យសម្លេងអាស៊ីសេរី លោក សុវណ្ណ បានអះអាងថា គណបក្ស​សង្គ្រោះ​ជាតិ ពុំ​បាន​រៀបចំ​ឲ្យ​មាន​បាតុកម្ម​ណា​មួយ​ប្រឆាំង លោក ហ៊ុន សែន នៅ​ប្រទេស​បារាំង នោះ​ទេ។ លោក​ថា ការ​ធ្វើ​បាតុកម្ម គឺ​ជា​សិទ្ធិ​សេរីភាព​ ក្នុង​ការ​សម្ដែង​មតិ ​របស់​ពលរដ្ឋ​នៅ​ក្នុង​សង្គម​ ប្រជាធិបតេយ្យ៕