ក្នុងថ្ងៃទី១ ខែកក្កដាម្សិលម៉ិញ លោក អ៊ុំ សំអាន តំណាងរាស្រ្តមកពីគណបក្សប្រឆាំង ត្រូវបានលោក ឈាង វុន ប្រធាន គណៈកម្មការកិច្ចការបរទេស សហប្រតិបត្តិការអន្តរជាតិ ឃោសនាការ និងព័ត៌មាន មកពីគណបក្ស​ប្រជាជនកម្ពុជា បណ្តេញចេញពីបរិវេណរដ្ឋសភាជាតិ ដោយមិនអនុញ្ញាត ឲ្យឆ្លើយនឹងសំនួរ របស់អ្នក​សារព័ត៌មាន​ឡើយ បន្ទាប់ពីលោក បានបញ្ចប់កិច្ចប្រជុំពិភាកក្សា របស់គណកម្មការទី៣នៃរដ្ឋសភា ពីបញ្ហា​សេចក្តី​ព្រាង​ច្បាប់ ស្ដីពីសមាគម និងអង្គការក្រៅរដ្ឋាភិបាលរួចមក។

នៅព្រឹកថ្ងៃទី២ ខែកក្កដានេះទៀត លោកតំណាងរាស្ត្រដដែល ក៏ត្រូវបានសន្តិសុខ របស់ទីស្តីការគណៈរដ្ឋមន្រ្តី បណ្តេញចេញពីបរិវេននេះដូចគ្នា បន្ទាប់ពីសន្និសីទសារព័ត៌មាន របស់លោក វ៉ា គឹមហុង ស្តីពីបញ្ហាព្រំដែន​កម្ពុជា-វៀតណាម ត្រូវបានបញ្ចប់។ ប៉ុន្តែនៅព្រឹកនេះ មិនមែនមានតែលោក អ៊ុំ សំអាន តំណាងរាស្រ្តមណ្ឌល​សៀមរាប តែម្នាក់ទេ តែនៅមានលោក រៀល ខេមរិន្ទ្រ តំណាងរាស្ត្រ មកពីគណបក្សសង្គ្រោះជាតិម្នាក់ទៀត ក៏ត្រូវបានសន្តិសុខ របស់ទីស្តីការគណរដ្ឋមន្រ្តី បណ្តេញចេញ ដោយមិនអនុញ្ញាត ឲ្យឆ្លើយនឹងសំនួរភ្លាមៗ របស់អ្នកសារព័ត៌មាន ក្នុងបរិវេណទីស្តីការដែរ។

បុរសម្នាក់ ក្នុងសំលៀកបំពាក់ស៊ីវិល មាឌធំដំបង បានចូលពីក្រោយ ហើយដើរទៅឈរមុខ លោក អ៊ុំ សំអាន ដោយបាននិយាយថា៖ «បងៗ សុំទោសបងៗ ការងារខ្ញុំ សូមចប់ត្រឹមហ្នឹង»។ លោក អ៊ុំ សំអាន បានឆ្លើយតប​ថា៖ «នែ បងឯងចង់យ៉ាងម៉ិចហ្នឹង ខ្ញុំតំណាងរាស្រ្ត បងសាកប៉ះខ្ញុំលមើល!»។ បុរសនោះបាននិយាយ​ទៀត​ថា «ខ្ញុំមានប៉ះបងេងឯណា?»។

ការចូលមកធ្វើអន្តរាគមន៍ របស់បុរសមាឌធំនោះ បានធ្វើឡើងនៅបន្ទាប់ពី លោកអ៊ុំ សំអាន បានលើកឡើង ទៅ​កាន់អ្នកសារព័ត៌មានថា ផែនទីដែលបង្ហាញដោយលោក វ៉ា គឹមហុង នោះ ជាផែនទីដែលគូសវាស ដោយ​ប្រទេសវៀតណាម មិនមែនជាផែនទី ដែលបានដំកល់ទុក នៅប្រទេសបារាំងឡើយ។ នៅចំពោះបំណងរារាំង របស់បុរសនោះ លោក អ៊ុំ សំអាន មិនព្រមបញ្ឈប់ការបកស្រោយ ទៅដល់អ្នកសារព័ត៌មានឡើយ លោកនៅតែ​ព្យាយាម ពន្យល់តទៅទៀត ហើយក្រុមមនុស្ស ដែលគេសា្គល់ថា ជាសន្តិសុខនោះ ក៏បានព្យាយាម មកបំបែក​អ្នកសារព័ត៌មានវិញម្ដង។

យ៉ាងណាក៏ដោយ ក្នុងការដេញអ្នកតំណាងរាស្រ្តនោះ លោក ទិត្យ សុធា អ្នកនាំពាក្យទីស្តីការគណរដ្ឋមន្រ្តី មិនបាននិយាយអ្វីឡើយ ក្រៅពីពាក្យសុំអធ្យាស្រ័យ ពីអ្នកសារព័ត៌មាន ហើយដេញអ្នកសារព័ត៌មាន ចេញ​ក្រៅ​ទាំងអស់តែម្តង។

លោកតំណាងរាស្ត្រ អ៊ុំ សំអាន ត្រូវបានគេស្គាល់ថា ជាតំណាងរាស្រ្ត ដែលសកម្មក្នុងការឈ្មូសឈ្មុល ជីក​គាស់​កកាយ បញ្ហាព្រំដែនរវាងប្រទេសកម្ពុជា-វៀតណាម ដែលសង្ស័យថា បានបាត់បង់ ព្រោះតែការរំកិលចូល ដោយប្រទេសក្បែរខាងមួយនេះ។ លោកបានដឹកនាំកម្លាំងយុវជន ចុះទៅអង្កេតបញ្ហាព្រំដែន ជាបន្តបន្ទាប់ រហូតដល់ថ្ងៃទី២៨ ខែមិថុនា ឆ្នាំ២០១៥ នេះ អំពើហិង្សាមួយ បានផ្ទុះឡើង រវាងពលរដ្ឋកម្ពុជា ដែលចុះ​ទៅ​មើល​ព្រំដែន ក្នុងខេត្តស្វាយរៀង ជាមួយនឹងពលរដ្ឋ និងទាហានវៀតណាម បង្កឲ្យភាគីទាំងពីរ មាន​របួស​រៀងៗ​ខ្លួន៕

» សូមចូលរួមទស្សនាវីដេអូ ដូចខាងក្រោម៖