ទីប្រឹក្សា នាយក និងនាយករងខុទ្ទកាល័យ និងជំនួយការ ចំនួន៣៨រូប នៃប្រធានព្រឹទ្ធិសភាថ្មីនោះ មានឋានៈ​ប្រាំដោយឡែកពីគ្នា៖ ក្នុងនោះមានឋានៈស្មើ នឹងទេសរដ្ឋមន្ត្រីចំនួន ២រូប រដ្ឋមន្ត្រីចំនួន ១២រូប រដ្ឋលេខាធិការ​ចំនួន ៩រូប អនុរដ្ឋលេខាធិការចំនួន ៩រូប និងអគ្គនាយកចំនួន ៥រូប។ នេះបើយោងតាម ព្រះរាជក្រឹត្យ នៃអង្គ​ព្រះមហាក្សត្រកម្ពុជា ឡាយព្រះហស្ថលេខាថ្ងៃទី២២ ខែមិថុនា ឆ្នាំ២០១៥។

ព្រះរាជក្រឹត្យ ដែលទស្សនាវដ្តីមនោរម្យ.អាំងហ្វូ ទើបទទួលបាននោះ ទ្រង់បានត្រាស់បង្គាប់ ឲ្យបញ្ចប់តំណែង និងតួនាទីទីប្រឹក្សា ជំនួយការ នាយក នាយករង និងជំនួយការខុទ្ទកាល័យ នៃអតីតប្រធានព្រឹទ្ធសភា លោក ជា ស៊ីម ផងដែរ ជាពិសេសទីប្រឹក្សា និងជំនួយការរបស់លោក ជា ស៊ីម ដែលត្រូវបានតែងតាំង មុនថ្ងៃទី៨ ខែ​មិថុនា។

ទស្សនាវដ្តីមនោរម្យ.អាំងហ្វូមិនអាចសុំការបញ្ជាក់បន្ថែម ពីមន្រ្តីនាំពាក្យព្រឹទ្ធសភាលោក ម៉ម ប៊ុននាង បានទេ ដោយមិនអាចភ្ជាប់ទំនាក់ទំនងបាន។ ឯអតីតនាយកខុទ្ទកាល័យលោក ជា ស៊ីម លោក ម៉ម សារិន ក៏មិនអាច​បញ្ជាក់ដែរ ដោយគ្មានអ្នកទទួលទូរស័ព្ទ នារសៀលនេះ ។ ទីប្រឹក្សា នាយក នាយករង និងជំនួយការ​ខុទ្ទកាល័យ​ទាំង៣៨រូបនោះ អាចជាអតីតទីប្រឹក្សា និងជំនួយការរបស់លោក សាយ ឈុំ កាលលោកមានតំណែង ជាអនុ​ប្រធានទីមួយនៃព្រឹទ្ធិសភា។

ដោយឡែក លោក ម៉ម សារិន អតីតនាយកខុទ្ទកាល័យ របស់អតីតប្រធានព្រឹទ្ធសភា លោក ជា ស៊ីម ត្រូវបាន​ព្រះមហាក្សត្រតែងតាំង ជាទីប្រឹក្សាឈរក្នុងលំដាប់លេខរៀងទី១ និងនាយខុទ្ធកាល័យ របស់ប្រធានព្រឹទ្ធិសភា​ថ្មី ដែលមានខានៈស្មើទេសរដ្ឋមន្រ្តី។

សូមបញ្ជាក់ថា រាល់ការតែងតាំងទីប្រឹក្សា និងជំនួយកា រយ៉ាង«ច្រើនសន្ធឹកសន្ធាប់» នៃមន្រ្តីថ្នាក់ធំ​នៅកម្ពុជា​ម្តងៗ តែងតែមានការរិះគន់មិនឈប់ឈរ ពីបណ្តាសាធារណៈជន អង្គការសង្គមស៊ីវិល ក៏ដូចជាគណបក្ស​ប្រឆាំង។ ពួកគេយល់ថា ការតែងតាំងទីប្រឹក្សា និងជំនួយការទាំងនោះ ត្រូវចំណាយថវិការរដ្ឋច្រើន ដោយឥត​ប្រយោជន៍។ តាមអ្នកនាំពាក្យ គណបក្សសង្គ្រោះជាតិលោក ញ៉ែម ប៉ុញ្ញារិទ្ធ ធ្លាប់បានលើកឡើងថា រដ្ឋាភិបាល​កម្ពុជាបច្ចុប្បន្ន ជារដ្ឋាភិបាលក្បាលធំ និងប្រើប្រាស់មនុស្សហួសប្រមាណ ក្នុងជួររដ្ឋាភិបាល។ សូមអានអត្ថបទ​ដែលទាក់ទងឡើងវិញ ដោយចុចនៅលើទីនេះ។

ឯមតិមួយទៀតបានលើកឡើងថា កាតតែងតាំង ទីប្រឹក្សា និងជំនួយការច្រើន សម្រាប់ប្រទេសកម្ពុជា មិនមាន​អ្វីចំលែកឡើង ព្រោះនេះជាទម្លាប់នៃមន្រ្តីនៅកម្ពុជា ដែលអនុវត្តបន្តបន្ទាប់គ្នា តាំងពីថ្នាក់លើដល់ថ្នាក់ក្រោម។ អ្នកច្បាប់ម្នាក់ក្នុងគណបក្សសង្គ្រោះជាតិដែរ ធ្លាប់បានបញ្ជាក់យ៉ាងខ្លីថា៖ «ការទីប្រឹក្សា និងជំនួយការច្រើន ព្រោះ​ខ្លួន “ល្ងង់” ដោយចង់បំបង់ថវិកាជាតិ?» សូមអានអត្ថបទដែលទាក់ទងឡើងវិញ ដោយចុចនៅលើទី​នេះ។

» ទស្សនាវដ្តីមនោរម្យ.អាំងហ្វូ សូមបង្ហាញនូវព្រះរាជក្រឹត្យ តែងតាំងថ្មីនេះ ដើម្បីបានដឹងថា តើអ្នណាខ្លះធ្វើអ្វី មានតំណែងអ្វី និងឈ្មោះអ្វីខ្លះ ដូចខាងក្រោម (ចុចពីលើ ដើម្បីពង្រីកអាន)៖