«កន្លងមក យើងរកឃើញករណីនេះ តិចតួចទេ អាចរាប់នឹងម្រាបដៃបាន អាចថាបួន ដប់ករណីប៉ុណ្ណឹង។ តែ​ករណីនេះ មិនមែនជាចេតនា នៃអ្នកប្រើប្រាស់ពលកម្មកុមារទេ ព្រោះតែការរៀបចំអត្តសញ្ញាណ ឬការប្តូរ​ឈ្មោះ​គ្នា រវាងកម្មករ ដោយសារតែគាត់ ចង់បានការងារ។» នេះជាការថ្លែងអះអាង របស់រដ្ឋមន្រ្តី​ក្រសួង​ការងារ លោក អ៊ិត សំហេង ទាក់ទងនឹងតួលេខ នៃចំនួនពលកម្មកុមារ ដែលបានផ្ទុយទៅនឹងការលើកឡើង របស់សហជីព ឬអង្គការអន្តរជាតិមួយចំនួន។

ថ្លែងទៅកាន់អ្នកសារព័ត៌មាន ក្នុងសន្និសីទថ្នាក់ជាតិ ស្តីពីទំនាក់ទំនងវិជ្ជាជីវៈលើកទី៦ ក្រោម​ប្រធាន​បទ​«កម្ពុជា​ដើម្បីសន្តិភាព ក្នុងទំនាក់ទំនងវិជ្ជាជីវៈ» នាព្រឹកថ្ងៃទី១៦ ខែមិថុនា ឆ្នាំ២០១៥ លោក អ៊ិត សំហេង បាន​ថ្លែង​ឲ្យដឹងទៀតថា ក្រសួងបានជួយរំដោះ កុមាររាប់«ម៉ឺន»នាក់ចេញពី ការកេងប្រវ័ញ្ចពលកម្មកុមារ លើ​វិស័យ​មួយចំនួនដូចជា កសិកម្ម នេសាទ និងស្រែអំបិលជាដើម។ ឯក្នុងវិស័យរោងចក្រ ក្រសួងបានចាត់​វិធានការដាច់ខាត មិនឲ្យមាន«ពលកម្មកុមារ» កើតមានក្នុងវិស័យនេះឡើង។

ការថ្លែងរបស់លោករដ្ឋមន្ត្រី ក្រសួងការងារ ដែលថា «ពលកម្មកុមារ អាចរាប់នឹងម្រាមដៃបាន» ត្រូវបាន​ច្រាន​ចោលជាពិសេស ដោយលោក អាត់ ធន ប្រធានសហព័ន្ធការងារកម្ពុជា។  ជាមួយនឹងបទពិសោធន៍​ការងារ នាពេលកន្លងមក លោក អាត់ ធន់ បានមើលឃើញថា៖ «ពលកម្មលើកុមារ» មានច្រើនណាស់។ លោក​ថា កុមារទាំងនោះភាគច្រើន បានបំរើការងារ នៅតាមសិប្បកម្មធ្វើឥដ្ឋ រោងចក្រដេរស្បែកជើង បម្រើការងារ​តាម​ផ្ទះ និងក្នុងសិប្បកម្មខ្នាតតូច។ លោកបញ្ជាក់ដូច្នេះថា៖ «ភាគច្រើននៃអ្នកធ្វើទាំងនោះ មិនទាន់គ្រប់អាយុ នៅ​ឡើយ»។

ចំណែកឯរបាយការណ៍ របស់អង្គការ យូនីសេហ្វ (Unicef - មូលនិធិអង្គការសហប្រជាជាតិដើម្បីកុមារ) ក្នុង​ឆ្នាំ​២០១១-២០១៥ បានសរសេរថា កុមារកម្ពុជាជាងមួយលានកន្លះ (១.៥លាននាក់) បានប្រឈម នឹងការ​រំលោភ​កម្លាំងពលកម្មធ្ងន់ធ្ងរ នៅកម្ពុជា។ របាយការណ៍នោះ បានបង្ហាញទៀតថា ក្នុងចំណោម​កុមាទាំងអស់​នោះ ភាគច្រើនជាកុមារកំព្រា និងកុមារងាយរងគ្រោះ។ ឯកុមារអនាថាវិញ ដែលកំពុងរស់នៅ និងធ្វើការ​តាម​ដងផ្លូវនានា ក្នុងរាជធានីភ្នំពេញ មានប្រមាណជាងពីរម៉ឺននាក់។ កុមារទាំងនោះ ភាគច្រើនបំផុត បានរងនូវ​ការ​ប្រើប្រាស់ អំពើ«ហិង្សា» ពីនិយោជករបស់ខ្លួន យ៉ាងធ្ងន់ធ្ង។

យ៉ាងណាក៏ដោយ ក៏លោករដ្ឋមន្រ្តីក្រសួងការងារ បានចាត់ទុកថា បញ្ហាប្រើប្រាស់ នូវកម្លាំងពលកម្មកុមារ ជាបញ្ហាប្រឈម ដែលរដ្ឋាភិបាលកំពុងធ្វើការដោះស្រាយ ដើម្បីបង្កើតនីតិវិធី គ្រប់គ្រងអត្តសញ្ញាណ​ប្រជា​ពលរដ្ឋ ដែលចង់ធ្វើការ ទាំងនៅវ័យក្មេងនេះ។ លោកបានថ្លែងឡើងថា៖ «ប្រសិនជាមានការសង្ស័យ យើង​អាច​ពិនិត្យដោយផ្ទាល់ ឬតាមបែបវេជ្ជសាស្រ្ត ដើម្បីបញ្ជាក់ថា គ្មានបញ្ហា នៃការបើកម្លាំងពលកម្មកុមារ នៅ​ក្នុង​វិស័យឧស្សាហកម្មកាត់ដេរ ពិសេសឧស្សាហកម្មដេលនាំចេញ។ ព្រោះបញ្ហានេះ វាអាចប៉ះពាល់ ដល់​ការ​នាំចេញរបស់យើង បើមានផ្សាយព័ត៌មាននេះចេញទៅ។»

លោក អ៊ិត សំហេង បានអះអាង ទាក់ទងនិងវិស័យកាត់ដេរ ឬរោងចក្រនេះដូច្នេះថា ពលកម្មលើកុមារ ជា​អាទិភាពនៃក្រសួងការងារ ដែលបាននឹងកំពុងធ្វើការប្រយុទ្ធប្រឆាំង។ ការប្រយុទ្ធប្រឆាំងនេះ ក្រសួងការងារ បានធ្វើផែនការជាតិលើកទីមួយស្តីពី ការប្រយុទ្ធប្រឆាំងនឹងពលកម្មកុមារ នូវយុត្តិសាស្រ្តថ្មី ដែលមិនអនុញ្ញាត ឲ្យមានកុមារបំរើការ នៅក្នុងវិស័យឧស្សាកម្ម នៅកម្ពុជាឡើយ។ លោកបានបន្ថែមទៀតថា៖ «នាពេល​ខាង​មុខ មិនមានការប្រើប្រាស់កម្លាំងពលកម្មកុមារទេ។ កុមារដែលមិនទាន់គ្រប់វ័យពលកម្ម គឺត្រូវការការ​រៀន​សូត្រ។ ហើយចំពោះកុមារដែលចង់ធ្វើការងាណាមួយនោះ ការងារនោះត្រូវតេជាការងារសមរម្យ ដែលមិន​ប៉ះ​ពាល់​ទៅ​ដល់ការសិក្សា អនាគត និងការអភិវឌ្ឍន៍របស់កុមារដែរ។»

សូមរំលឹកថា កាលពីថ្មីៗនេះ មានអង្គការសង្គមស៊ីវិលមួយចំនួនធំ បានប្រារព្ធទិវាពិភពលោក ប្រឆាំង​នឹង​ពលកម្ម​កុមារ លើកទី១៤ លើប្រធានបទ «គ្មានពលកម្មកុមារ ផ្តល់ការអប់រំ ដែលមានគុណភាព»។ ស្រប​ពេល​ជាមួយគ្នានេះ តាមការប្រកាសរបស់ក្រសួងការងារ ស្ដីពីការនេសាទសមុទ្រប្រការ៥ បានចែងថា កុមារ​ក្រោមអាយុ ១៥ឆ្នាំ មិនអនុញ្ញាតឲ្យចុះទូក ទៅនេសាទជាដាច់ខាត។ ក្រសួងការងារផ្ទាល់ ក៏បានស្នើ​ដល់​សហគ្រាសពាណិជ្ជកម្មទាំងអស់ ចូលរួមលុបបំបាត់ពលកម្មកុមារ តាមរយៈមិនអនុញ្ញាតឲ្យកុមារ អាយុ​ក្រោម​១៨ឆ្នាំ ឲ្យចូលធ្វើការ ក្នុងស្ថាប័នរបស់ខ្លួនឡើយ៕