សម្រាប់សារព័ត៌មាន «El Mundo Deportivo» ដែលគេស្គាល់ថា ជាសារព័ត៌មានលំអៀង ទៅខាងក្រុម​បាល់ទាត់ បាសឺឡូន (Barcelone ក្រុមប្រជែងប្រចាំត្រកូល ជាមួយ Real Madrid) ឱកាសមួយនេះ មាន​លក្ខណៈ​កម្រ​រក​បាន​ណាស់។ រដូវក្ដៅឆ្នាំនេះ វិសមកាលរបស់កីឡាករដ៏ល្បី គ្រីស្ទៀណូ រ៉ូណាល់ដូ ដែល​បាន​មក​លេខ នៅ​តំបន់​ឆ្នេរ «Saint-Tropez» ភាគខាងត្បូងប្រទេសបារាំង បានបង្កឲ្យមានការចុះផ្សាយ​យ៉ាង​ច្រើន នៅ​លើ​ទំព័រ​នានា ក្នុង​សារព័ត៌មាននៃប្រទេសអេស្ប៉ាញ និងនៅបរទេស។ ប៉ុន្តែការចុះផ្សាយ ដែល​មាន​អម​ដោយ​រូបភាព និង​វីដេអូ​ផង​នោះ បានដុតឲ្យកីឡាកររបស់ក្រុម រៀល ម៉ាឌ្រីដ ឲ្យឆេះឡើង។

កីឡាករ គ្រីស្ទៀណូ រ៉ូណាល់ដូ បានព្រមាន  ទល់នឹងសង្គ្រាមពាក្យសម្ដី របស់ក្រុមអ្នកសារព័ត៌មានថា៖ «ពួក​អ្នក​ឯង នឹងមិនអាចធ្វើឲ្យខ្ញុំប្រលាក់ប្រលូក បានឡើយ»។

គេត្រូវនិយាយរំលឹកឡើងវិញថា រូបថតឬវីដេអូ ដែលថតកីឡាករ រ៉ូណាល់ដូ នៅលើកាណូតឯកជនមួយ ដែល​កីឡាករ​​បានខ្ចី ពីមិត្តភ័ក្រជាតិអង់គ្លេសម្នាក់នោះ ជាស្នាដៃរបស់ក្រុម អ្នកតាមប្រមាណ ជំនាញខាង​ថត​រូបតារាៗ ពីចំងាយ។

បើតាមសារព័ត៌មាន «El Mundo Deportivo» បានឲ្យដឹងថា កំពូលតារារបស់ក្រុម រៀល ម៉ាឌ្រីដ បាន​ឆេះ​ដុំ​យ៉ាងខ្លាំង នៅពេលដែលបានឃើញ រូបថតទាំងនោះ នៅក្នុងសារព័ត៌មាន និងបន្ទាប់ពីបានអាន នូវរាល់មតិ​យោបល់ របស់ពួកអ្នក«បន្ទរ» នៅតាមបណ្ដាញសង្គម។

នៅក្នុងអាជីព ជាកីឡាករវិញ តារាបាល់ទាត់មិនរងផលប៉ះពាល់ទេ ព្រោះកីឡាករទើបនឹងរកគ្រាប់បាល់ ឲ្យ​ក្រុម​ជម្រើសជាតិរបស់ខ្លួន ដល់ទៅ៣គ្រាប់ សម្រាប់ការប្រកួតជម្រុះ ឆ្ពោះទៅ Euro 2016 កាលពីសប្ដាហ៍មុន។

រីឯមិត្តភ័ក្រប្រុសទាំង៣ ដែលត្រូវបានបង្ហាញ នៅក្នុងសារព័ត៌មាននោះ មាន (១) កីឡាករ José Semedo ដែល​ធ្លាប់ហាត់រួមគ្នា ពីប្រទេសព័រទុយហ្គាល់ និងកំពុងទាត់ឲ្យក្រុម «Sheffield Wednesday»។ (២) Ricardo "Ricky" Regufe ជាអ្នកទទួលខុសត្រូវ ខាងទីផ្សាររបស់ផលិតផល យីហោ «Nike» នៅប្រទេសព័រទុយហ្គាល់ ដែល​ត្រូវ​បាន គ្រីស្ទៀណូ រ៉ូណាល់ដូច ចាត់ទុកដូចបងប្រុស។ និងទី (៣) គឺ Miguel Paixao ដែលមិត្តភ័ក្រ​របស់កីឡាករ តាំងពីកុមារភាព និងធ្លាប់លេងបាល់ជាមួយគ្នា តាំងពីពេលនោះមក៕