នៅថ្ងៃពុធទី១២ធ្នូនេះ សម្ដេចសង្ឃកាតូលីក ប៊ើន័រ ១៦ បានបង្ហោះទូរសាតាមប្រព័ន្ធសង្គម ទ្វីធើរ ជាលើកតំបូងរបស់ព្រះអង្គ ដើម្បី​ស្រោចស្រង់ ប្រសិទ្ធិពរជ័យ ដល់បណ្ដាជនរាប់សិបលាននាក់ ដែលបានតាមដានគណនីរបស់ព្រះវិហា នៅលើប្រព័ន្ធនេះ។ ​គណនី​មុនៗរបស់ព្រះវិហា ជារឿយៗ តែងតែរង នូវការរិះគន់ពីសំណាក់ អ្នកលេងអាំងធើណែតក្មេងៗ។

សម្ដេចសង្ឃកាតូលីក ប៊ើន័រ ១៦ ទ្រង់ប្រើម្រាមដៃរបស់ទ្រង់បង្ហោះទូរសារទីមួយ របស់ទ្រង់។
រូបថត AP/ Gregorio Borgia។

ទូរសានោះ សរសេរជាភាសាអង់គ្លេស មានន័យជាអាថ៌ថា «បណ្ដាមិត្តទាំងឡាយ ខ្ញុំមានសេចក្ដីរីករាយណាស់ ដែលមានទំនាក់​ទំនងជាមួយអ្នកទាំងអស់គ្នា តាមប្រព័ន្ធទ្វីធើរ (Twitter)។  សូមអរគុណ នូវចម្លើយ ប្រកបដោយសមានចិត្តរបស់អ្នក។ ខ្ញុំសូម​ប្រសិទ្ធិពរដល់អ្នកគ្រប់គ្នា អស់ពីបេះដូងរបស់ខ្ញុំ។»  តែក្នុងរយះពេល ៤០នាទីក្រោយមកប៉ុណ្ណោះ បណ្ដាជនអ្នកមានគណនី ក្នុង​ប្រព័ន្ធនេះ បានចែកផ្សាយបន្ត រហូតដល់១៥ ៦០០លើក។ ទូរសានេះ ក៏មានផ្សាយ ជាភាសាបរទេស នៅលើគណនីចំនួន៧ផ្សេង​ទៀតផងដែរ៖ អ៊ីតាលី អេស្ប៉ាញ៉ុល ព័រទុយហ្គេ អាឡឺម៉ង់ បារាំង អារ៉ាប់ និងប៉ូឡូញ។

ទូរសាទីមួយនេះ បានផ្ញើរចេញពីក្ដាបញ្ជាមួយ ដែលរៀបចំថ្វាយ ដោយអ្នកទទួលខុសត្រូវ នៃក្រុមប្រឹក្សាសម្ដេចសង្ឃ សម្រាប់ការ​ផ្សព្វផ្សាយសង្គម និងយុវវ័យ នៅក្នុងសាល ប៉ូលទី៦ (Paul VI) នៅក្រោយពីព្រះអង្គបានប្រសិទ្ធិពរ ទៅអ្នកចូលរួមប្រមាណជា ៤ ៥០០នាក់។ បន្ទាប់ពីពន្យល់ថ្វាយព្រះអង្គ ពីដំណើរការ និងរបៀបប្រើប្រាស់របស់ក្ដាបញ្ជារួច សម្ដេចសង្ឃទ្រង់ញញឹម ដូចជាសព្វ​ព្រះរាជហឬទ័យ នឹងបច្ចេកវិទ្យាថ្មីនេះ ហើយបានយកចង្អុលព្រះហស្ថ ប៉ះទៅលើក្ដាបញ្ជា ដែលបង្ហាញថា«ទូរសាទីមួយ» ក្នុង​ប្រវត្តិ​របស់ព្រះវិហាកាតូលីក ត្រូវបានផ្ញើរចេញទៅហើយ។

ក្នុងទូរសារលើកទីពីរ ព្រះអង្គបានចោទសួរថា «តើយើងរស់នៅអោយប្រសើរយ៉ាងដូចម្ដេច នៅរាល់ឆ្នាំនៃជំនឿសាសនានោះ?» ហើយព្រះអង្គបានឆ្លើយដោយខ្លួនព្រះអង្គថា «ជជែកជាមួយព្រះយេស៊ូ គ្រឹស្ដ៍ នៅរាល់ពេលសូត្រធម៌ ​- ស្ដាប់ព្រះយេស៊ូ គ្រឹស្ដ៍ ដែលនិយាយមកអ្នក ក្នុងគម្ពី អេវ៉ង់ជីល (Evangile) - ជួបព្រះយេស៊ូ គ្រឹស្ដ៍ ដោយផ្ទាល់នៅពេលអ្នកត្រូវការ»។ ចម្លើយនេះទំនង ជាសម្ដេចសង្ឃកាតូលីក ប៊ើន័រ ១៦ (Benoît XVI) ព្រះអង្គចង់តបនឹងសំនួរ រាប់ពាន់ផ្សេងទៀត ដែលបានសួរមកព្រះអង្គ តាម​ប្រព័ន្ធនេះ តាំងពីព្រះអង្គបើកគណនីបាន ប្រមាណជាមួយអាទិត្យមកហើយ។

នៅក្នុងបទអត្ថាធិប្បាយមួយ របស់វិទ្យុវ៉ាទីកង់ (Radio Vatican) លោកឪពុក ហ្វេដេរីកូ ឡមបារឌី (Federico Lombardi) បានលើក​ពីសារសំខាន់ នៃដំណើរការថ្មីនេះ ដោយបង្ហាញតាមផ្លូវព្រះធម៌ ដូចមានចែងក្នុងព្រះគម្ពី អេវ៉ង់ជីលផង។ លោកឪពុកថា «១៤០តួ​អក្សរ វាតិចណាស់ តែពាក្យសម្ដីនៅក្នុងគម្ពី ក៏រឹតខ្លីណាស់ទៅទៀត។ ដូច្នេះបើពន្យល់បន្តិចទៅ វាកាន់តែល្អ។»

មកដល់ម៉ោងនេះ គណនីជាភាសាអង់គ្លេស របស់សម្ដេចសង្ឃ មានអ្នកចុចលើ «តាមដាន» ប្រមាណជា ៨៣៧ ៩៤០នាក់ជាង​ហើយ៕

--------------------------------------------------
ដោយ៖ សេក មនោរកុមារ - ប៉ារីស ថ្ងៃទី១២ ខែធ្នូ ឆ្នាំ២០១២
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ