«បើអ្នកនោះ មិនមែនជាមន្រ្តីរាជការ ឥតមានបទស៊ីសំណូកទេ ឯកឧត្តម។ ឯកឧត្តមមើលឱយជាក់ ចាំញាក់ចិញ្ចើម។ នេះ​ជាអ៊ិនជីអូមួយ (NGO) ដែលគាត់កឹបកេង ពីរម៉ឺនដុល្លានេះ ជាបទរំលោភ លើការទុកចិត្ត របស់ម្ចាស់អំណោយគេទេ។» នេះ​ជាការអះអាង យ៉ាងមុតមាំ របស់លោក ឱម យឹនទៀង ប្រធានអង្គភាពប្រឆាំងអំពើពុករលួយ របស់ប្រទេសកម្ពុជា ក្នុង​ប្រតិកម្មមួយ តបទៅនឹងតំណាងរាស្ត្រម្នាក់ ដែលបានចោទសួរលោក អំពីអំពើពុករលួយ កឹបកេងប្រាក់ នៅក្នុង​ស្ថាប័ន​ឯកជន​មួយ។

ប្រតិកម្មនេះ បានធ្វើឡើង ក្នុងសិក្ខាសាលា ស្តិីពី«ការស្វែងយល់ពីច្បាប់ និងការអនុវត្តច្បាប់ ស្តីពីការប្រឆាំងអំពើ​ពុក​រលួយ» កាលពីថ្ងៃទី២៦ ខែឧសភា ឆ្នាំ២០១៥នេះ នាវិមានរដ្ឋសភា បន្ទាប់ពីលោក លឹម គឹមយ៉ា តំណាងរាស្រ្តមណ្ឌល​កំពង់ធំ បានថ្លែងទៅកាន់លោក ឱម យិនទៀង ថា ដើម្បីបំបាត់អំពើពុករលួយ កត្តាចម្បង (ទីមួយ) ត្រូវមានតម្លាភាព តែ​តាមច្បាប់ ការប្រឆាំងអំពើពុករលួយ បែរជា«គ្មាន»តម្លាភាពទៅវិញ។ លោកតំណាងរាស្រ្តរូបនេះ បានចោទជាសំនួរថា ក្នុងអង្គភាពឯកជនមួយ មានអំពើពុករលួយបានកើតឡើង តែអង្គភាពប្រឆាំងអំពើពុករលួយ បែរជាមិនមានចំណាត់ការ ហើយថែមទាំងប្រកាសថា មិនមានអំពើពុករលួយទៅវិញ។ «បើមិនមែនជាអំពើពុករលួយ តើសំអាងលើអ្វី ហេតុអ្វីបាន​ជាទាមទារលុយ ពីគេមកវិញ?»

ជាមួយនឹងកាយវិការចង្អុល មិនចំពោះផងនោះ លោក ឱម យិនទៀង បានឆ្លើយទៅនឹងម្ចាស់សំនួរ ម៉ាត់ៗថា៖ «ច្បាប់​បាន​ចែងយ៉ាងច្បាស់ ទាល់តែអាម្ចាស់អំណោយ ប្តឹងទៅតុលាការ ទើបធ្វើបាន។ យើងខ្ញុំមិនធ្វើជួសបានទេ។»

លោកប្រធានអង្គភាព ប្រឆាំងអំពើពុករលួយ បានបន្តថា៖ «ច្បាប់មិនបានអនុញ្ញាត ឲ្យខ្ញុំទៅចាប់គាត់បានទេ។ ខ្ញុំមិនមែន​ជាម្ចាស់រឿង មិនមែនជារឿងពុករលួយ ជារឿងរំលោភ លើការទុកចិត្តរបស់គេ។ (...) ឯកឧត្តមកុំគិតថា គេនៅស្ងៀម គេ​មិន​ធ្វើអ្វីទាំងអស់ មិនមែនទេ។ អ្វីដែលយើងខ្ញុំមិនធ្វើ យើងខ្ញុំមានភស្តុតាង។ សូមឯកឧត្តមជ្រាប យើងខ្ញុំនិយាយមួយ ដោយ​សារ​មានមួយរយ យើងខ្ញុំមិនដែលនិយាយមួយរយ ដោយសារមានមួយនោះទេ។»

លោក យិនទៀង បានបន្ថែមទៀតថា៖ «យើងខ្ញុំនិយាយ ជាមួយឯកឧត្តម...។ ឯកឧត្តម មកលេងសើចម៉េច? (...) ឯកឧត្តម​កុំលរ កុំនិយាយរឿងបក្សពួក និយាយរឿងផ្លូវច្បាប់ ឯកឧត្តម!»៕

» សូមទស្សនាវីដេអូ ពីការឆ្លើយឆ្លងគ្នានេះ ដូចតទៅ៖