យន្ដហោះយោធា មួយគ្រឿង ធុន A400M បានធ្លាក់បោកខ្លួន នៅថ្ងៃសៅរ៍ វេលាម៉ោង ១៣ នេះ ក្បែរនឹងក្រុង សេវីល (Séville) នៅក្នុងភាគខាងត្បូង នៃប្រទេសអេស្ប៉ាញ។ ក្រុមអ្នកជួយសង្គ្រោះ នៅផ្ទាល់កន្លែង បានបញ្ជាក់ពី​តុល្យភាព​ដំបូង​ថា មាន​មនុស្ស៣នាក់បានស្លាប់ និង២នាក់ទៀត រងរបួសជាទំងន់។ ប៉ុន្តែមនុស្សដែលនៅលើយន្ដហោះ មានចំនួន​ច្រើន​ជាង​នេះ។

នាយក​រដ្ឋមន្ត្រីអេស្ប៉ាញ លោក ម៉ារីយ៉ូណូ រ៉ាហយ (Mariano Rajoy) បានថ្លែងទៅកាន់ អ្នកសារព័ត៌មាន និងត្រូវបាន​បញ្ចាំង នៅ​តាមកញ្ចក់ទូរទស្សន៍ថា មានមនុស្ស៨ ទៅ១០នាក់ នៅក្នុងយន្ដហោះ។ លោកនាយករដ្ឋមន្ត្រី បានថ្លែងការ​រំលែក​ទុក្ខរបស់លោក ជូនទៅដល់គ្រួសារជនរងគ្រោះ ហើយបានប្រកាសលប់ចោល អង្គប្រជុំមួយ ដែលត្រូវបាន​រៀបចំ​ធ្វើ សម្រាប់យុទ្ធនាការបោះឆ្នោតខាងមុខ នៅលើកោះ កាណារីស (Canaries)។

សារព័ត៌មានប្រចាំថ្ងៃ «El Pais» បានដកស្រង់ប្រភព ពីអាជ្ញាធរអាកាសចរណ៍ របស់ប្រទេសអេស្ប៉ាញ មកបញ្ជាក់ថា យន្ដហោះ​បានធ្លាក់ ក្នុងតំបន់គ្មានមនុស្សរស់នៅ នៅក្បែររោងចក្រ ផលិតភេសជ្ជៈ កូកាកូឡា ដែលនៅ​មិនឆ្ងាយប៉ុន្មាន ពី​ព្រលានយន្ដហោះ សាន ប៉ាឡូ (San Pablo) បន្ទាប់ពីយន្ដហោះនេះ បានហើបជើង ហោះងើបខ្លួនពីដី បានបន្តិច ដើម្បី​ហោះ​ឆ្ពោះ ទៅកាន់ប្រទេសទួរគី។ ប្រភព ពីអាជ្ញាធរអាកាសចរណ៍ បានបញ្ជាក់ទៀតថា យន្ដហោះនេះ ជាយន្ដហោះថ្មី​មួយ ធុន A400M សម្រាប់ដឹកជញ្ជូនសម្ភារៈយោធា។

បើទោះជាគ្រោះធ្លាក់យន្ដហោះ បានកើតឡើង នៅក្រៅព្រលានយន្ដហោះក៏ដោយ ប៉ុន្តែចរាចរណ៍ហោះហើរ របស់​យន្ដហោះ ដែលត្រៀមហោះចេញ នឹងត្រៀមចុះចត បានជួបនឹងភាពរអាក់រអួលយ៉ាងខ្លាំង។ យន្ដហោះ ដែលត្រូវចុះចត ត្រូវ​បានបញ្ជាឲ្យទៅចុះចត នៅព្រលានយន្ដហោះផ្សេងទៀត នៅក្បែរនោះ។

នៅក្នុងពេលភ្លាមៗនេះ គេនៅមិនទាន់ដឹង ពីមូលហេតុដែលបណ្ដាល ឲ្យយន្ដហោះនេះ ធ្លាក់នៅឡើយ។ ប៉ុន្តែប្រភព​មួយ​ចំនួន បាននិយាយថា ការធ្លាក់អាចបណ្ដាលមក ពីកំហុសបច្ចេកទេស ដែលកើតមាន នៅពេលយន្ដហោះ ត្រូវងើបហោះ​ពីដី។

រូបភាពដំបូង ដែលយើងទើបនឹងទទួលបាន ពីគ្រោះថ្នាក់នេះ ត្រូវបានបង្ហោះព្រោងព្រាត ដោយបណ្ដាជន នៅក្នុងតំបន់៖