ករណីដែលបង្ករការភ្ញាក់ផ្អើលនេះ បានកើតឡើង កាលពីវេលាម៉ោង ១២និង៣០នាទីថ្ងៃទី២៧ ខែមេសា ឆ្នាំ២០១៥ នៅ​តាម​បណ្តោយផ្លូវ ២៤៥ ក្នុងសង្កាត់បឹងសាឡាង ខណ្ឌទួលគោក រាជធានីភ្នំពេញ ត្រង់ចំណុចទល់មុខ ផ្ទះធ្វើអាជីវកម្ម​ទឹក​អំពៅ។ ស្រ្តីជាប់ចោទម្នាក់ ត្រូវបានចាប់ខ្លួន មួយម៉ោងក្រោយ បន្ទាប់ពីកើតមានហេតុការណ៍នេះ ហើយត្រូវបាន​បញ្ជូន​ទៅ​ឲ្យ​សមត្ថកិច្ច ដើម្បីធ្វើការស្រាវជ្រាវ។

កញ្ញា អានី អ្នកលក់ផ្លែឈើនៅផ្សារនាគមាស បានប្រាប់ឲ្យដឹងថា កញ្ញាបានបាត់កេស សម្រាប់ដាក់ផ្លែឈើនេះ ជា​បណ្តើរៗ ដោយរកមុខអ្នកលួច មិនដែលឃើញសោះ ពីមួយថ្ងៃទៅមួយថ្ងៃ ដែលប្រមាណ ជាង១០០កេះទៅហើយ បើគិត​មក​ដល់​ថ្ងៃនេះ តែមិនដែលចាប់ដានអ្នកលួចបានទេ។ លុះរហូតមកដល់ខែមេសា អ្នកលក់ផ្លែឈើ នៅតែបន្ត​បាត់​កេស​នោះ​ទៀត គាត់មិនអស់ចិត្ត ក៏ចាប់ផ្តើមតាមដាន។

ស្រាប់តែ នៅថ្ងៃទី២៧ ខែមេសាឆ្នាំ២០១៥ កញ្ញាបានឃើញស្រ្តីជនសង្ស័យ មាន«កេះផ្លែឈើ»ជាងម្ភៃ នៅនឹងដៃ​បម្រុង​យក​ទៅផ្ទះ កញ្ញាបានចាប់អារម្មណ៍ថា គាត់មិនមែនជាអ្នកលក់ផ្លែឈើទេ ហេតុអ្វី​បានជាមានកេសនេះច្រើនម្លេះ? បន្ទាប់​ពីធ្វើការសាកសួរ ស្រ្តីខាងលើបានឆ្លើយ ទាំងរដាក់រដុប និងបានព្យាយាមរត់គេចខ្លួន។

ស្រ្តីដែលត្រូវបានគេសង្ស័យថា ជាចោរលួច«កេសដាក់ផ្លែឈើ»ជាច្រើនខាងលើ ឈ្មោះ រចនា អាយុប្រមាណជា៣០ ឆ្នាំ មានទីលំនៅ ក្នុងទីតាំងកើតហេតុខាងលើបាន បានប្រាប់អ្នកសារព័ត៌មានថា គាត់មិនបានលួចទេ គឺកេះទាំង២៤នោះ គាត់​ទិញពីអ្នកអួសរទេះ មិនបានលួច ដូចគេចោទនោះទេ។ ដោយឡែក ប្អូនប្រុសជនសង្ស័យខាងលើ បានបង្ហើបថា បង​ស្រី​ខ្លួនមានជួលផ្ទះមួយ ពីស្រ្តីម្នាក់ឈ្មោះ យឿន សម្រាប់ដាក់របស់នេះ ដើម្បីទុកលក់ឲ្យឈ្មួញ ដែលដឹកផ្លែឈើពី​តាម​ខេត្ត។ តែប្អូនប្រុសនោះ មិនបានបញ្ជាក់ថា របស់ទាំងនោះ មានលើសពី១០០គ្រឿង ដូចដែលអ្នកលក់ផ្លែឈើ បានចោទ​ប្រកាន់ ឬយ៉ាងណានោះទេ។

បន្ទាប់ពីមានការឈ្លោះទាស់ទែងគ្នា មួយសន្ទុះធំរួចមក ស្រ្តីជនសង្ស័យ នៅតែមិនព្រមសារភាព ហើយមានបំណង ចង់​រត់​គេចខ្លូន តែត្រូវបានភាគីស្ត្រីលក់ផ្លែឈើ ធ្វើការឃាត់ខ្លួន និងបញ្ជូន ទៅកាន់ប៉ុស្តិ៍នគរបាល បឹងសាឡាង ដើម្បីបំភ្លឺ​បញ្ហា​ទាំង​អស់នេះរួមគ្នា ងាយស្រួលសមត្ថកិច្ច ធ្វើការស៊ើបអង្កេត រកអ្នកដែលប្រព្រឹត្ត។ អ្នកលក់ផ្លែឈើ កញ្ញា អានី បានឲ្យ​ដឹង​ថា កេសដែលគាត់បានបាត់នោះ បើទិញថ្មីតម្លៃពី ២០០០០រៀល ទៅ៤០០០០រៀល ហើយបើលក់ចេញ ជារបស់​ចាស់ៗ​វិញ ក៏បានពី៥០០០រៀល ទៅ២០០០០ដែរ ក្នុងមួយគ្រឿង៕