ភរិយារបស់ជនជាប់ចោទមួយរូប បានថ្លែងបរិហា តុលាការសាលាដំបូងរាជធានីភ្នំពេញ ដែលទើបនឹងប្រកាស​លើក​ពេល សវនាការកាត់ទោស ថាបានបំពាន និងចាត់ទុកជនជាប់ចោទ ដូចជាសត្វធាតុ។ អ្នកស្រី ធិន ណារិន ភរិយា​លោក អ៊ុក ពេជ្រសំណាង ដែលជាជនជាប់ចោទម្នាក់ ក្នុងចំណោមជនជាប់ចោទ ទាំង១១នាក់ បានសម្ដែងក្ដី​អស់​សង្ឃឹម ចំពោះវិធានការច្បាប់ របស់តុលាការ ដែលកំពុងអនុវត្តនៅពេលនេះ ទៅលើស្វាមីរបស់ខ្លួន។

អ្នកស្រីបានថ្លែងឡើងថា៖ «អត់បាយ អត់ទឹក បញ្ជូនគ្នាហើយ បញ្ជូនទៀត ដូចប្រហែលសត្វពពែ និងសត្វចៀម មិន​បាន​គិត ឬចាត់ទុកថា យើងជាមនុស្ស។ ខ្ញុំមានការខ្លោចផ្សារណាស់។ (...) តុលាការមិនបង្ហាញ នូវហេតុផលណាមួយ ថានឹងដោះលែងឡើយ។»

អ្នកស្រីបានបន្តថា តាំងពីថ្ងៃ ដែលត្រូវបានតុលាការ បានចាប់ខ្លួនស្វាមីអ្នកស្រី មកទល់នឹងថ្ងៃទី២៧ ខែមីនា ឆ្នាំ២០១៥ ដែលតុលាការនៅតែប្រកាស លើកពេលនេះ មានរយៈពេល៦ខែ ហើយ។ ការលើកថ្ងៃជាបន្តបន្ទាប់ របស់តុលាការ បាន​ធ្វើឡើងទៀត រហូលដល់ថ្ងៃទី២០ ខែមេសា ក្រោយចូលឆ្នាំខ្មែរ។ អ្នកស្រី ធិន ណារិន បានបញ្ជាក់ឲ្យដឹងថា៖ «មិន​ដឹង​គេយល់យ៉ាងម៉េច បានជាមិនឲ្យគាត់នៅក្រៅឃុំ។ ខ្ញុំគ្មានសង្ឃឹមទេ ព្រោះតុលាការនេះ គ្មានភាពយុត្តិធម៌ផង។ មិន​មែន​តុលាការបំរើរាស្រ្តផង ជាតុលាការបក្ស។»

អ្នកស្រីបានបង្ហាញ ការជឿជាក់ថា បើមើលតាមភស្តុតាង សាក្សី និងច្បាប់ ប្តីអ្នកស្រីដាច់ខាត ត្រូវនឹង​តុលាការដោះ​លែង ក្នុងថ្ងៃនេះតែម្តង។ តែព័ត៌មាន ដែលបានបង្ហើប ឲ្យអ្នកស្រីបានដឹង ដែលធ្វើឲ្យមានក្ដីសង្ឃឹម ថានឹងអាចជួបជុំ​ជា​មួយ​ស្វាមី នៅពេលចូលឆ្នាំថ្មីនេះ បានរលាយ​សូន្យសុង ដោយសារការលើកពេល ធ្វើសវនាការរបស់តុលាការ។ អ្នកស្រី​និយាយថា៖ «មានអ្នកកាន់អំណាច នៅពីក្រោយខ្នងគាត់ ដូច្នេះគាត់មិនហ៊ានសម្រេច ខ្លួនគាត់ទេ។ គាត់មិន​ហ៊ាន​សម្រេចថា ដោះលែងទេ។ (...) ត្រូវដោះលែងថ្ងៃហ្នឹង បែជាក្រឡាស់ ថាទៅថ្ងៃក្រោយទៅវិញ គ្មានអ្វីសង្ឃឹមទេ ខ្ញុំអស់ជំនឿលើតុលាការហើយ។»

សូមបញ្ជាក់ថា ពេញមួយថ្ងៃ នៃសវការរបស់សាលាដំបូង រាជធានីភ្នំពេញ កាលពីថ្ងៃទី២៧ ខែមីនា ម្សិលម៉ិញនេះ តុលាការ​បានសួរដេញដោល តែទៅលើជនជាប់ចោទម្នាក់ប៉ុណ្ណោះ គឺលោក អឿ ណារិទ្ធិ ជាសកម្មជន​គណបក្ស​សង្គ្រោះ​ជាតិ និងជាជំនួយការ របស់អ្នកស្រី មូរ សុខហួរ។ ជនជាប់ចោទ ៩នាក់ ផ្សេងទៀត ដែលរួមមានលោក មាជ សុវណ្ណារ៉ា នោះ មិនទាន់ត្រូវបានតុលាការ សាកសួរនៅឡើយ។ ហើយសវនាការនេះ នឹងត្រូវសាកសួរបន្ត ក្រោយ​ថ្ងៃ​ចូល​ឆ្នាំ គឺថ្ងៃទី២០ ខែមេសា ឆ្នាំ២០១៥ខាងមុខ។

ខាងការពារក្ដី លោកមេធាវី ចាន់ ចេង និងលោក មេធាវី ហែម សុជាតិ បានចាត់​ទុកការសារសួរ និងការពន្យាពេល ជា​បន្ត​បន្ទាប់​នេះថា ពិតជាមានពាក់ព័ន្ធនឹងរឿងនយោបាយ។

មិនអាចទាក់ទងមន្ត្រីចៅក្រម របស់សាលាដំបូងរាជធានីភ្នំពេញ ដើម្បីធ្វើការបកស្រាយ ពីការលើកសវនាការបានទេ នៅពេលភ្លាមៗនេះ។

លោក អ៊ុក ពេជ្រសំណាង អាយុ៥២ឆ្នាំ ត្រូវបានសមត្ថកិច្ចឃាត់ខ្លួន តាមដីកាបង្គាប់ ឲ្យនាំខ្លួនរបស់លោក កែវ មុនី ចៅក្រមស៊ើបសួរ សាលាដំបូងរាជធានីភ្នំពេញ ដោយជាប់ចោទ ពីបទដឹកនាំកុបកម្ម បទញុះញង់ ឲ្យប្រព្រឹត្តបទ​ឧក្រិដ្ឋ​ជាអាទិ៍ និងបទហិង្សាដោយចេតនា មានស្ថានទម្ងន់ទោស ប្រព្រឹត្តកាល ពីថ្ងៃទី១៥ ខែកក្កដា ឆ្នាំ២០១៤ នៅចំណុច​លើ​ស្ពាននាគ ក្បែរទីលានប្រជាធិបតេយ្យ៕