ពីក្នុងចំណោមអ្នកគាំទ្រ  លោក រស់ សារុំ ប្រធានសមាគមជ័យលាភីកម្ពុជា បានលើកឡើងថា បើទោះបីជាច្បាប់ថ្មីនេះ ធ្វើ​មិនបានល្អ១០០% ប៉ុន្តែអាចទទួលយកបាន។ លោកបានបានប្រកាសគាំទ្រ យ៉ាងពេញទំហឹង នូងសេចក្តីព្រាង​ច្បាប់ថ្មី​នេះ។ លោកបន្តថា៖ «សូមស្នើរទៅគណបក្សទាំងពីរ មេត្តាពន្លឿនបញ្ចប់កិច្ចការនេះ ឱ្យបានឆាប់ជាទីបំផុត ដើម្បី គ.ជ.ប ថ្មី មានពេលគ្រប់គ្រាន់ អាចដំណើរបាន ក្នុងពេលដ៏ខ្លីខាងមុខនេះ»។

អ្នកគាំទ្រម្នាក់ទៀត លោក ចាយ បូរិន បានលើកឡើងដែរថា ការតាក់តែងសេចក្តីព្រាងច្បាប់ គ.ជ.ប ថ្មីនេះ ឃើញថាមាន​លក្ខណៈគ្រប់ជ្រុងជ្រោយល្អ និងកា្លយទៅជាលិខិតបទដ្ឋានគតិយុទ្ធ សម្រាប់ការអនុវត្ត នៅពេលបោះឆ្នោតក្រោយ ដើម្បី​កុំ​ឱ្យមានវិបត្តិនយោបាយ នាពេលក្រោយៗទៀត។

ប៉ុន្តែសម្រាប់អ្នកមិនគាំទ្រវិញ បានមើលឃើញថា ច្បាប់ គ.ជ.ប. ថ្មីនេះ នៅមានគុណវិបត្តិច្រើននៅឡើយ។ លោក ស៊ន តារា យល់ឃើញថា ចំណុចមួយចំនួននៅក្នុងច្បាប់ថ្មីនេះ មានចំណុចខ្វះខាត និងមានការរំលោភ លើលិទ្ធិប្រជាធិបតេយ្យ​ដោយប្រយោល។ លោកស៊ន តារាលើកឡើងថា កាលណាច្បាប់បោះឆ្នោត មានសុក្រិតភាព និងមានការទទួលស្គាល់​លទ្ធផល ពីគណបក្សទាំងពីរទៅហើយនោះ លោកគិតថា មិនគួរមានច្បាប់ ដែលចែងអំពីការបោះបង់ចោល អាសនៈ​រដ្ឋសភា​ទេ ច្បាប់នេះ អាចមានភាពប្រទូសរាយគ្នា នាពេលអនាគត។ លោក តារា បានថ្លែង នៅក្នុងអង្គសិក្ខាសាលា​នោះ​ថា៖ «វា​​ជា​ផ្នែកមួយ នៃការបិទសិទ្ធសេរីភាព ដែលផ្ទុយទៅនឹងលទ្ធិប្រជាធិបតេយ្យ ដែល​អនុញ្ញាតឱ្យមានការតវ៉ា​ដោយ​អហិង្សា ការ​ធ្វើ​ពហិការ»។

លោកបន្តថា «មួយទៀត ខ្ញុំយល់ឃើញថា ច្បាប់នេះមិនមែនមានលក្ខណៈ ជាយុត្តិធម៌ក្រិតក្រម ១០០% មិនដល់សឹង​ថា​៨០% ព្រោះខ្ញុំមើលឃើញថា ច្បាប់នេះដូចជារិតបន្តឹង ទៅលើអង្គការសង្គមស៊ីវិល ប៉ុន្តែបែរជាបន្ទូរ ទៅលើមន្រ្តីប៉ូលីស​ទាហាន​យោធា»។

ទាក់ទិនជាមួយបញ្ហាសេចក្តីព្រាងច្បាប់ថ្មីនេះដែរ តំណាងអង្គការសង្គមស៊ីវិល ចំនួន៦០ស្ថាប័ន បានប្រកាសមិនគាំទ្រ ចំពោះសេចក្ដីស្នើច្បាប់ទាំងពីរនេះ ដែលក្រុមការងារគណបក្សទាំងពីរ បានរៀបចំសិក្ខាសាលាថ្នាក់ជាតិ នៅព្រឹកថ្ងៃ​ទី​៩មីនា នេះ។ ច្បាប់ទាំងពីរនេះ គឺសេចក្ដីព្រាងសេចក្ដីស្នើច្បាប់ស្ដីពីការរៀបចំ និងការប្រព្រឹត្តិទៅនៃគណៈកម្មាធិការរៀបចំ ការបោះឆ្នោត និងសេចក្ដីព្រាងសេចក្ដីស្នើច្បាប់ស្ដីពី ការបោះឆ្នោតជ្រើសតាំងតំណាងរាស្ត្រ។

ថ្លែងនៅក្នុងសន្និសីទសារព័ត៌មានស្ដីពី «មតិរបស់អង្គការសង្គមស៊ីវិល ទៅលើដំណើរការរៀបចំ សេចក្តីស្នើសេចក្តី​ព្រាង​ច្បាប់ស្តីពី គ.ជ.ប និងការបោះឆ្នោតជ្រើសតាំងតំណាងរាស្ត្រ» នៅសណ្ឋាគារហ៊ីម៉ាវារី ដែលធ្វើឡើងនៅរសៀល​ថ្ងៃ​ដដែល​នេះ នាយកប្រតិបត្តិ គណៈកម្មាធិការសហប្រតិបត្តិការ ដើម្បីកម្ពុជា លោក សឿង សារឿន បានធ្វើការរិះគន់នូវ ចំណុច​មួយ​ចំនួន នៃសេចក្ដីព្រាងច្បាប់ថ្មីនេះថា បានរំលោភទៅលើសិទ្ធ អង្គការសង្គមស៊ីវិល។ មិនត្រឹមតែប៉ះពាល់ ដល់​អង្គការ​សង្គម​ស៊ីវិលនោះទេ គឺប៉ះពាល់ដល់ប្រជាពលរដ្ឋទូទៅ ដែលជាម្ចាស់ឆ្នោតថែមទៀតផង ។

លោក សឿង សារឿនបាននិយាយថា «ប្រសិនបើច្បាប់ចែងបែបហ្នឹង គឺធ្វើឱ្យប៉ះពាល់ ដល់គណបក្សនយោបាយខ្លួនឯង ប៉ះពាល់ដល់សង្គមស៊ីវិល ហើយប៉ះពាល់ ដល់សិទ្ធិសេរីភាពរបស់ប្រជាពលរដ្ឋទាំងមូល ដែលជាម្ចាស់ឆ្នោត ។ អញ្ចឹង យើង​មិនដឹងថា អាណត្តិទី៦ ការបោះឆ្នោតសម្រាប់អាណត្តិទី៦ហ្នឹង ត្រូវបានប្រជាពលរដ្ឋបោះឆ្នោត ឲ្យគណបក្សទាំងពីរ​ហ្នឹង ឬក៏នឹងអាចបោះឆ្នោត ឲ្យគណបក្សនយោបាយណាផ្សេងទៀត ពីព្រោះអ្វីដែលប្រជាពលរដ្ឋទុកចិត្ត ឲ្យគណបក្ស​នយោបាយទាំងពីរនេះធ្វើការងារ ដើម្បីផលប្រយោជន៍ប្រជាជន តែផ្ទុយទៅវិញ ពួកគាត់ធ្វើការតាក់តែងច្បាប់នេះ ធ្វើឱ្យ​ផល​ប្រយោជន៍ប្រជាជនបាត់បង់ អញ្ចឹងប្រហែលការសម្រេចចិត្ត របស់ប្រជាពលរដ្ឋ នាពេលអនាគត គាត់នឹងមានការ​ប្រែប្រួល។»៕