ការស៊ើបអង្កេតរបស់សង្កាត់ ប៉ោយប៉ែត ទៅលើករណីបណ្ដឹងពលរដ្ឋ ឲ្យដកមេភូមមួយរូបចេញ នៅភូមិព្រៃព្រិច សង្កាត់​ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យនោះ នៅមិនទាន់ចេញ ជាផ្លែផ្កាអ្វីនៅឡើយ។ សម្រាប់ពលរដ្ឋ អ្នកភូមិ​ព្រៃព្រិចវិញ បានសម្ដែងការសង្ស័យថា ខាងសង្កាត់អាចនឹងឃុបឃិត ជាមួយមេភូមិនោះទៀត។

អ្នកភូមិម្នាក់ បានថ្លែងឲ្យទស្សនាវដ្ដីមនោរម្យ.អាំងហ្វូដឹង ក្នុងព្រឹកថ្ងៃទី២៧ ខែកុម្ភៈ នេះថា អ្នករស់នៅក្នុងភូមិនេះ​ទាំង​អស់ ហាក់មិនមានទំនុកចិត្ត ទៅលើសង្កាត់ឡើយ ព្រោះការតវ៉ា ពីបញ្ហាមេភូមិនេះ មិនមែនទើបនឹងធ្វើ ជាលើកទីមួយ​នោះទេ តែវាជាលើកទីបីហើយ តែនៅមិនទាន់បាន ទទួលលទ្ធផល ដែលប្រជាពលរដ្ឋ អាចទទួលយកបានទៀត។ អ្នក​ភូមិ ដែលនិយាយក្នុងល័ក្ខខ័ណ្ឌមិនប្រាប់ឈ្មោះ បានថ្លែងទៀតថា មានអ្នកខ្លះ មិនហ៊ានធ្វើដំណើរទៅមកណា ដោយ​មិន​ប្រុងប្រយ័តនោះទេ ព្រោះធ្លាប់មានពាក្យគម្រាមកំហែង ពីអ្នកប្លែកមុខ ដែលចេញចូលផ្ទះមេភូមិនេះ មកពីកន្លែងផ្សេង។ នៅមានរឿងមួយចំនួនទៀត ដែលអ្នកភូមិម្នាក់នេះ បានបង្ហើបឲ្យដឹងទៀតថា អ្នកខ្លះ មានឈ្មោះនៅក្នុងបញ្ជីខ្ចីប្រាក់ ពី​ធនាគារ ហេតុនេះ ទោះជាពួកគាត់មិនពេញចិត្តមេភូមិនេះ ក៏ត្រូវតែទៅសុំហត្ថលេខាពីគាត់ដែរ។

អ្នកភូមិម្នាក់ទៀត អ្នកស្រី តឿន វិត បានប្រាប់ទស្សនាវដ្តីដឹងដែរថា អ្នកភូមិកំពុងរស់នៅ ជាមួយនឹងភាពភ័យខ្លាច។ អ្នកស្រី​បានបញ្ជាក់ថា អ្នកភូមិមួយចំនួនហ៊ានចេញមុខតវ៉ា តែអ្នកខ្លះមិនហ៊ានទេ ព្រោះខ្លាចអំណាចនៃការសម្លុត ជា​ពិសេស​មានការបារម្ភ នៅពេលដែលមានកិច្ចការ ត្រូវសុំការបញ្ជាក់ពីមេភូមិរូបនោះ ខ្លាចមានការ យកលុយ​កាក់ច្រើន​ជា​ដើម។ អ្នកស្រីថា តាំងពីពេលដែលសាលាសង្កាត់ ទទួលយកមកដោះស្រាយ នូវពាក្យបញបណ្តឹងអ្នកភូមិនោះ មាន​រយៈ​ពេល៤ថ្ងៃហើយ តែពួកគាត់បានទទួលត្រឹមតែពាក្យថា ឲ្យនៅស្ងៀមសិនទៅ ចាំធ្វើការដោះស្រាយឲ្យ។ អ្នកស្រីថ្លែងថា៖ «សម្តីនេះ ដូចកាលពី ២លើក មុនៗអញ្ចឹង»។

ព្រមានបន្តសំនុំរឿង...

អ្នកស្រីបានបញ្ជាក់ ពីជំហរដ៏រឹងមាំថា អ្នកស្រីនិងអ្នកភូមិផ្សេងទៀត នឹងមិនបញ្ឈប់នោះទេ ទោះជាគ្មានការដោះស្រាយ ពីសាលាសង្កាត់ប៉ោយប៉ែតក៏ដោយ ពួកគាត់នឹងបន្តដាក់ពាក្យបណ្តឹង ទៅកាត់សាលាខេត្តបន្តទៀត ដើម្បីទទួលបានភាព​យុត្តិធម៌សមរម្យ។ អ្នកស្រីបានបន្ថែមថា បើពលរដ្ឋរស់នៅ ចង់មានសេចក្តីសុខ តែបើនៅក្នុងទឹកដីខ្លួនឯង បែជាមាន​ទុក្ខ​ទៅវិញនោះ អ្នកភូមិមិនស្ងប់ចិត្តទេ។

ទស្សនាវដ្តីមិនអាចទាក់ទង ទៅមេភូមិព្រៃព្រិច អ្នកស្រី ហុក លឿម បានទេ ព្រោះទូរស័ព្ទរបស់អ្នកស្រីបានបិទ។ ប៉ុន្តែ​កាល​ពីពេលថ្មីៗនេះ អ្នកស្រីធ្លាប់បានប្រាប់ទស្សនាវដ្តីមនោរម្យ.អាំងហ្វូថា នៅផ្ទះអ្នកស្រីមានអ្នកចេញចូលច្រើនមែន ហេតុ​នេះ អ្នកភូមិគិតថាជាជនចម្លែកមុខ ហើយថាជាបក្សពួក។ តែអ្នកស្រីមិនបានឲ្យដឹង ពីទំនាក់ទំនងនោះថា ជាសាច់​ញាតិ ឬយ៉ាងណានោះទេ។ ចំណេកឯចៅសង្កាត់ប៉ោយប៉ែត លោក នុត លី ក៏មិនអាចសុំការបំភ្លឺ ពីក្តីបារម្ភរបស់​អ្នកភូមិ​នេះបាន ក្នុងពេលនេះដែរ ដោយទូរស័ព្ទរបស់លោក គ្មានអ្នកទទួល៕