ក្រោយ​ជំនួប​នា​វិមាន​រដ្ឋសភា នា​ព្រឹក​ថ្ងៃ​ទី​២៩ ខែ​មករា​នេះ ប្រធាន​ក្រុម​តំណាង​រាស្រ្ត​គណបក្ស​ប្រជាជន​កម្ពុជា លោក ស ខេង រដ្ឋមន្ត្រី​ក្រសួង​មហាផ្ទៃ និង​ប្រធាន​ក្រុម​តំណាង​រាស្រ្ត​គណបក្ស​សង្គ្រោះ​ជាតិ លោក សម រង្ស៊ី បាន​ផ្តល់​កិច្ច​សម្ភាស​រួម​គ្នា ទៅ​កាន់​អ្នក​សារព័ត៌មាន ដោយ​ផ្តោត​សំខាន់​លើ​ការ​យក​ចិត្ត​ទុក​ដាក់ ទៅ​ដល់​រាស្រ្ត និង​ជាតិ ពិសេស​រក្សា​នូវ​វប្បធម៌​សន្ទានា រវាង​គណបក្ស​ទាំង​ពីរ​បន្ត​ទៅ​មុខ។

លោក សម រង្ស៊ី ប្រធាន​តំណាង​រាស្រ្ត​មតិ​ភាគ​តិច ដែល​រដ្ឋសភា​ជាតិ​ទើប​ទទួល​ស្គាល់​លោក​ក្នុង​តំណែង​នេះ  បាន​លើក​ឡើង​ថា នេះ​ជា​ទម្លាប់​មួយ​ដែល​ត្រូវ​បាន​បង្កើត​ឡើង ដោយ​គណបក្ស​ទាំង​ពីរ ក្នុង​ការ​ឆ្លុះ​បញ្ចាំង និង​លើក​កំពស់​វប្បធម៌​សន្ទនា ដែល​ជា​មូលដ្ឋាន​នៃ​លទ្ធិ​ប្រជា​ធិបតេយ្យ។

ប្រធានគណបក្សសង្គ្រោះជាតិ បានបន្តថា៖ «ការអនុវត្តទាំងពាក្យពេជ្រ ការអនុវត្តទាំងស្មារតី ដើម្បីឆ្លុះបញ្ចាំង​វប្បធម៌សន្ទនា។ (…) ទោះជាគណបក្សប្រកួតគ្នា ក៏ដើម្បីផលប្រយោជន៍ប្រទេសជាតិ ដើម្បីសុខសន្តិភាព ដើម្បី​ស្ថេរភាព ដើម្បីឲ្យប្រជាពលរដ្ឋខ្មែរមានការកក់ក្តៅ។ ទោះគណបក្សណាឈ្នោះឆ្នោតលើកក្រោយ ក៏ខ្មែរ​បានសុខ ព្រោះគណបក្ស (ទាំងពីរ) បានស្រុះស្រួលគ្នា តាមរយៈការនិយាយ ការជជែក គោរពគ្នាទៅវិញ​ទៅ​មក ដោះស្រាយរាល់បញ្ហាដោយសន្តិវិធី។ (…) មានវប្បធម៌សន្ទនា ទើបលទ្ធិប្រជាធិបតេយ្យអាចលូតលាស់ រើកចម្រើន និងរស់រវើកទៅបាន។»

សម្រាប់លោក ស ខេង ប្រធានតំណាងរាស្រ្តគណបក្សប្រជាជនកម្ពុជាវិញ បានឯកភាពតាមការលើកឡើង​របស់លោក សម រង្ស៊ី ខាងលើ។ លោកបន្តថា នេះគ្រាន់តែជំហានដំបូង ក្នុងការរួមគ្នាសាកល្បង ដោយមិន​ទាន់បានដាក់ចេញនូវរបៀបវារៈណាមួយជាក់លាក់ទេ។ លោកបន្តថា ការជួបគ្នាលើកនេះ ក៏ដើម្បីពិនិត្យ​មើល​លទ្ធភាពក្នុងការស្វែងករការជួបគ្នា និងក៏ដើម្បីកំណត់ពេលវេលាជាក់លាក់ ដើម្បីបន្តជួបគ្នាពេលក្រោយៗ​ទៀត។

ឧបនាយករដ្ឋមន្ត្រីរូបនេះ បានបន្តថា៖ «យើងខំអនុវត្តនូវកិច្ចព្រមព្រៀងថ្ងៃទី២២ ខែកក្កដា ឆ្នាំ២០១៤។ និង​ការព្រមព្រៀងដទៃទៀតជាបន្តបន្ទាប់ ក្នុងការរួមសហការគ្នាបំពេញការងារ។ (…) យើងកំពុងពិចារណា​លើ​បញ្ហាទាំងអស់នោះ។ (…) ខ្លឹមសារសំខាន់ គឺការលើគោលការណ៍សហការគ្នា ដើម្បីរួមគ្នាបំរើប្រជាពលរដ្ឋ តាមរយៈវប្បធម៌សន្ទនា។ យើងអាចនឹងត្រួតពិនិត្យលើសកម្មភាពរបស់គណបក្សទាំងពីរ ក្នុងពេលកន្លងមក និងតទៅមុខ ថាតើស្ថិតនៅក្នុងក្របខណ្ឌ នៃកិច្ចព្រមព្រៀងគ្នាថ្ងៃ២២ ខែកក្កដា ឆ្នាំ២០១៤ ឬមួយនៅក្រៅ? (…) យើងនឹងធ្វើការតម្រង់ទិសមកវិញ។»

ចំពោះសំនួរដែលបានចោទដោយអ្នកសារព័ត៌មាន ពាក់ព័ន្ធនិងការលើកឡើងថា មានការរំលោភកិច្ចព្រម​ព្រៀង​ថ្ងៃទី២២ ខែកក្កដា ឆ្នាំ២០១៤ ដោយគណបក្សប្រជាជនកម្ពុជា តាមរយៈការចាប់សកម្មជនដីធ្លី និង​សកម្មជនគណបក្សនយោបាយនោះ ទាំងលោក ស ខេង និងលោក សម រង្ស៊ី មិនបានធ្វើការបកស្រាយ​ឡើយ ដោយលោកគ្រាន់តែបញ្ជាក់ថា លោក និងលោក សម រង្ស៊ី មិនទាន់បានជជែកបញ្ហាអ្វី ក្រៅពីការ​កំណត់ពេលវេលា និងរបៀបវារៈនៃជំនួបលើកក្រោយទៀត នោះឡើយ៕

សូមទស្សនាកិច្ចសម្ភាសទាំងស្រុងជាមយយអ្នកសារព័ត៌មានដូចខាងក្រោមៈ

(វីដេអូ នឹងមកដល់បន្តិចទៀត)