រ៉ាន់ បូរ័ត្ន ត្រូវបានតុលាការ សម្រេចដោះលែង
បន្ទាប់ពីជាប់ទោសអស់រយះពេល៦ខែមក លោក រ៉ាន់ បូរ័ត្ន ត្រូវបានតុលាការខេត្តកោះកុង សំរេចដោះលែងឲ្យនៅក្រៅឃុំ។ ចំពោះទោសដែលនៅសល់១៨ខែទៀតត្រូវបានព្យួរ។ បុរសខាងលើនេះ ត្រូវបានតុលាការដាក់ទោស ពីបទមនុស្សឃាតដោយអចេតនា ទៅលើមន្ត្រីកងរាជអាវុធហត្ថឈ្មោះ អ៊ិន រតនា ដែលគេអះអាងថាបានបាញ់សម្លាប់លោក ឈុត វុទ្ធីប្រធានអង្គការអភិរក្សធនធានធម្មជាតិ(សូមអានអត្តបទមុន)។
មន្ត្រីស៊ើបអង្កេតជាន់ខ្ពស់នៃអង្គការលីកាដូ (Licadho) លោក អំ សំអាតយល់ថា ការដោះលែងនេះមិនខុសទេ ព្រោះតុលាការបានសម្រេចតាមកាលកំណត់របស់សាលក្រម។ តែអ្វីដែលលោកចាប់អារម្មណ៍នោះថា ការសម្រេចដាក់ទោសរបស់តុលាការលើករណីនេះ ប្រកបដោយយុត្តិធម៍ឬទេ។
«ការសម្រេចដាក់ទោសលើលោក រ៉ាន់ បូរ័ត្ននេះ គឺស្តែងឲ្យឃើញថាមានអាថ៌កំបាំងនៅពីក្រោយឃាតកម្មលោក ឈុត វុទ្ធីដែលត្រូវបានកប់ចោលនោះ » នេះបើតាមលោក អំ សំអាត។
ចំពោះអ្នកស្រី សំ ចាន់ ភរិយារបស់លោក ឈុត វុទ្ធីបានអះអាងការសំរេចខាងលើនេះ គឺមិនបានរកយុត្តិធម៍ដល់វិញ្ញាណក្ខន្ធស្វាមីរបស់គាត់ឡើយ។ ហើយអ្នកស្រីបានស្នើរសុំឲ្យ អង្គការសង្គមស៊ីវិល ជួយធ្វើការស៊ើបអង្កេតបន្ថែម លើករណីនេះផង។
ព្រះរាជអាជ្ញារងអមសាលាដំបូងខេត្តកោះកុង លោកស្រី ម៉ាកនី បានលើកទូរសព្ទ័ ដោយលោកថានិយាយមិនឮ មិនសូវមានសេវ៉ា ហើយក៏ចុចបិទទូរសព្ទ័ម្តងជាពីរដង៕
-----------------------------------------------------------------------
ដោយៈ ភ្នំធំ - ភ្នំពេញថ្ងៃទី ១០ វិច្ឆិកា ឆ្នាំ២០១២
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ