ពលរដ្ឋ​ប្រមាណ​ជា​១០​គ្រួសារ នៅ​សហគមន៍​ភូមិ​ខ្វា សង្កាត់​ដង្កោ ខ័ណ្ឌ​ដង្កោ រាជធានី​ភ្នំពេញ ដែល​រង​ការ​បណ្ដេញ​ចេញ ដោយ​កម្លាំង​ប្រដាប់​អាវុធ​រាប់​សិប​នាក់ របស់​អាជ្ញាធរ​កាល​ពី​ថ្ងៃ​ទី ៥ ខែ​មករា ម្សិល​ម៉ិញ​នេះ បាន​អំពាវ​នាវ​ឲ្យ​នាយក​រដ្ឋ​មន្ត្រី​កម្ពុជា លោក ហ៊ុន សែន ឲ្យ​ជួយ​ដោះ​ស្រាយ​បញ្ហា​ជំរក​ផ្ទះ​សម្បែង ឲ្យ​ដល់​ពួក​គាត់​ផង។ ការ​អំពាវ​នាវ​នេះ បាន​ធ្វើ​ឡើង នៅ​មួយ​ថ្ងៃ​ក្រោយ​ពី​ការ​បណ្ដេញ​រើ​រុះ​ផ្ទះ​សម្បែង​របស់​ពួក​គាត់ បណ្ដាល​ឲ្យ​ពួក​គាត់​គ្មាន​ជម្រក រស់​នៅ​ដោយ​គ្រាន់​តែ​បោះ​តង់ នៅ​តាម​ចិញ្ចើម​ថ្នល់​នោះ។

ប្រជា​ពលរដ្ឋ​ដែល​នៅ​តំបន់​នោះ បាន​និយាយ​ថា ពួក​គាត់​មាន​ការ​ភ្ជាក់​ផ្អើល​យ៉ាង​ខ្លាំង បន្ទាប់​ពី​មាន​ការ​រុះរើ​ផ្ទះ​សំបែង​របស់​ពួក​គាត់ ដោយ​គ្មាន​ដំណឹង​ដូច្នេះ។ ផ្ទះ​ប្រជា​ពលរដ្ឋ​ខ្លះ ត្រូវ​បាន​កង​កម្លាំង​​ធ្វើ​ការ​រុះ​រើ​ទាំង​គ្មាន​មនុស្ស​នៅ ហើយ​បាន​យក​ទ្រព្យ​សម្បត្តិ​នៅ​ក្នុង​ផ្ទះ​នោះ ទៅ​ជា​មួយ​ទៀត​ផង។

លោកយាយ សួ ឡេង បានប្រាប់ទស្សនាវដ្តីមនោរម្យ.អាំងហ្វូទាំងអួលដើមកថា គាត់បានរស់នៅ​ក្នុងតំបន់​នេះ​តាំងពីឆ្នាំ ១៩៨៣មកម្លេះ ហើយការរុះរើនេះ អាជ្ញាធរមិនបានជូនដំណឹងទៅពួកគាត់មុននោះទេ។ លោកយាយ​បាននិយាយថា បន្ទាប់ពីគាត់វិលត្រឡប់ មកពីស៊ីឈ្នួលកាត់ត្រកួនវិញ ស្រាប់តែផ្ទះរបស់គាត់ ត្រូវគេឈូស​ឆាយ​ខ្ទេចខ្ទីអស់គ្មានសល់។

ស្ត្រីចំណាស់ បានបន្ថែមទៀតថា ប្រសិនបើការរុះរើនេះ បានជូនដំណឹងដល់រូបគាត់មុន ក៍គាត់មិនខឹងដែរ ប៉ុន្តែ​អាជ្ញាមិនបានឲ្យដំណឹងមុន ហើយធ្វើការឈូសឆាយទាំងផ្ទះសំបែង ទាំងទ្រព្យសម្បត្តិនៅក្នុងនោះ គ្មានសេស​សល់អ្វីទាំងអស់ ថែមទាំងបណ្តេញប្រជាពលរដ្ឋឲ្យចេញ ដោយមិនអនុញ្ញាតិឲ្យនៅទីនោះទៀតទេនោះទេ។

ក្នុងចំនោមផ្ទះដែលបានរុះរើដោយកងកម្លាំងជម្រុះនេះ មានតែផ្ទះពីរប៉ុណ្ណោះ ដែលមិនត្រូវបានគេរុះរើ ព្រោះ​គ្រួសារទាំងពីរនេះបានសុំពន្យាពេល ក្នុងការរុះរើចំនួនមួយខែ ដើម្បីរកកន្លែងថ្មីរស់នៅ និងរកដំណោះ​ស្រាយ​ផងដែរ។ ប៉ុន្តែប្រសិនបើបន្ទាប់ពីមួយខែក្រោយគ្រួសារទាំងពីរនោះមិនព្រមរើចេញនោះទេ អាជ្ញាធរ និងរុះរើ​ដូចគ្រួសារឯទៀតដែរ។

យ៉ាងណាក៏ដោយ ក៏ពលរដ្ឋទាំងនោះបានធ្វើការអំពាវនាវព្រមគ្នា ទៅអង្គការសង្គមស៊ីវិល អ្នកមានអំណាច អ្នកចេះច្បាប់ទម្លាប់ត្រឹមត្រូវ និងជាពិសេសនោះគឺលោក ហ៊ុន សែនដើម្បីជួយរកយុត្តិធម៌ ដល់សហគមន៍ខ្វា ដែលត្រូវបានអាជ្ញាធរធ្វើការឈូសឆាយផ្ទះសំបែងរបស់ពលរដ្ឋ ដោយគ្មានលក្ខខ័ណ្ឌដូច្នេះ។

មានអ្នកនយោបាយនៅពីក្រោយ...?

យោងតាមកំណត់ហេតុមួយ នៅក្នុងកិច្ចប្រជុំ​ ស្តីពីការទន្ទ្រានកាន់កាប់ដី ចំណុចព្រំប្រទល់តំបន់​អភិវឌ្ឍន៍​បឹង​ទំពុន បឹងជើងឯកស្ថិតក្នុងភូមិខ្វា លោក ប្រាជ្ញ សីហា អភិបាលរងខ័ណ្ឌដង្កោ បានថ្លែងនៅក្នុងកិច្ចប្រជុំនេះថា ដីនេះមានអនុក្រឹត្យ ស.ជ.ណ របស់ទីស្តីការគណៈរដ្ឋមន្ត្រី និងរបស់សាលារាជធានីភ្នំពេញ។ ទីតាំងដីនេះ​កន្លងមក មិនមានការសាងសង់រោង ឫខ្ទមនោះទេ ទើបតែមុនពេលយុទ្ធនាការបោះឆ្នោត ប្រហែលពីរខែ ទើប​មានប្រជាពលរដ្ឋមកធ្វើការសាងសង់រោង ឫខ្ទមលើទីតាំងដីនេះ។ លោកបានថ្លែងឲ្យដឹងថា អាជ្ញាធរបាន​ចុះ​ទៅធ្វើការហាមឃាត់ តែពួកគាត់នាំគ្នាធ្វើការប្រឆាំងតវ៉ា ហើយក៍មានអ្នកនយោបាយនៅពីក្រោយ​រឿងនេះ​ទៀត។

លោក ប្រាជ្ញ សីហា ដែលដឹកនាំកម្លាំងចម្រុះទៅរុះរើផ្ទះសម្បែងពលរដ្ឋដោយផ្ទាល់ បានបញ្ជាក់នៅក្នុង​កំណត់​ហេតុនោះទៀតថា ក្រោយពេលបោះឆ្នោតជ្រើសតាំងតណាងរាស្ត្រនីតិកាលទី ៥រួច ពលរដ្ឋទាំងនោះ នៅតែ​សាងសង់នៅលើទីតាំងនោះ ជាបន្តបន្ទាប់ដដែល ទោះបីអាជ្ញាធរចុះទៅហាមឃាត់ក៍ដោយ ។

សូមបញ្ជាក់ថា ការរុះរើផ្ទះសំបែងរបស់សហគមន៍ខ្វានៅខ័ណ្ឌដង្កោនេះ មិនអនុញ្ញាតិឲ្យអ្នកសារព័ត៌មាន​ចូល​ទៅ​យកការណ៍នោះទេ ហើយព្រឹត្តការណ៍នេះ បានធ្វើឡើងស្របពេល ដែលអ្នកសារព័ត៌មានជាច្រើន កំពុង​ទៅយកការណ៍ នៅក្នុងសន្និសីទការសែតរបស់សម្តេចក្រុមព្រះ នរោត្តម រណឫទ្ធកាល ពីព្រឹកម្សិលម៉ិញនេះ។ រីឯគ្រួសារដែលត្រូវបានអាជ្ញាធររុះរើផ្ទះនេះ សុទ្ធសឹងតែមានឈ្មោះ ស្ថិតនៅក្នុងពាក្យបណ្តឹងរបស់ លោក​ឧកញ៉ា ម៉ៅ សុផល ដែលជាអ្នកមានទ្រព្យសម្បត្តិមួយរូបនៅក្នុងតំបន់ ប្ដឹងចោទប្រកាន់ទៅប្រជាពលរដ្ឋ ពីបទ​ការកាប់ទន្ទ្រានយកដីស្ថិតនៅភូមិខ្វា សង្កាត់ដង្កោ៕