រំជួលចិត្ត ជាមួយម្ចាស់ពានដឹវយ្សន៍ កាលពីយប់ម៉ិញ (vdo)
- ដោយ: ប្រាថ្នា ដោយ ប្រាថ្នា (ទាក់ទង៖ [email protected] ) - ភ្នំពេញ ថ្ងៃទី១៧ វិច្ឆិកា ២០១៤
- កែប្រែចុងក្រោយ: November 17, 2014
- ប្រធានបទ: The Voice
- អត្ថបទ: មានបញ្ហា?
- មតិ-យោបល់
-
ក្នុងវិនាទី នៃការប្រកាសលទ្ធផល បេក្ខជនទាំងបួននាក់ចុងក្រោយ របស់កម្មវិធីប្រលងចម្រៀង លំដាប់ថ្នាក់ពិភពលោក ឌឹវយ្សន៍ បានធ្វើឱ្យទស្សនិកជនអង្គុយកៅអីមិនជាប់ អ្នកខ្លះស្ទើភ្លេចដកដង្ហើម ព្រោះតែចាំផ្ទៀងស្តាប់ នូវការប្រកាសលទ្ធផល។ ប៉ុន្តែនៅក្រោយការប្រកាសលទ្ធផល សម្លេងលាន់ទ្រហឹងពេញឆាក ឌឹវយ្ស បានបន្លឺឡើង ដើម្បីអបអរដល់ម្ចាស់ជ័យលាភី។
ប៊ុត សីហា ជាបេក្ខជនម្នាក់មកពីខេត្តកំពង់ស្ពឺ និងជាកូនទើបតែកំព្រាឪពុកថ្មីៗនេះ បានធ្វើឱ្យទស្សនិកជនរំជួលចិត្តយ៉ាងខ្លាំង ជាមួយនឹងបទចម្រៀងពីរបទ ដែលខ្លួនបានបកស្រាយ នៅវគ្គផ្តាច់ព្រ័ត្រជាចង្វាក់ញាក់ និងបទបែបមនោសញ្ចេតនា។ បទចម្រៀង ដែលបេក្ខជនម្ចាស់ជ័យលាភីនេះ បានបកស្រាយផ្តួលបេក្ខជនបីទៀត មានចំណងជើងថា «ស្រលាញ់បងគ្មានអនាគតទេ» និងបទ«គ្មានអូនបងនៅតែជាបង» ដែលធ្វើឱ្យទស្សនិកជនជាច្រើន បានបោះឆ្នោតគាំទ្រក្លាយជាម្ចាស់ជ័យលាភី The Voice Cambodia ក្នុងរដូវកាលទីមួយនេះ។
នៅវគ្គផ្តាច់ព្រ័ត្រ នាយប់ថ្ងៃអាទិត្យទី១៦ ខែវិច្ឆិកានេះ បេក្ខជនទាំង៤នាក់ ម្នាក់ៗច្រៀងចម្រៀងចំនួន២បទ គឺបទមនោសញ្ចេតនា១បទ និងបទញាក់កន្រ្តាក់អារម្មណ៍១បទ ។
ប៊ុត សីហា បានយកឈ្នះបេក្ខជនបីរូបទៀត ដែលគេមើលឃើញថា មានសមត្ថភាពមិនចាញ់ខ្លួនឡើយ។ ព្រមគ្នានឹងមោទនភាពក្លាយជាម្ចាស់ពានដំបូង បេក្ខជនមកពីខេត្តកំពង់ស្ពឺរូបនេះ ទទួលបានទឹកប្រាក់ចំនួន ១០០លានរៀល និងក្លាយជាតារាចម្រៀងចុះកុងត្រា ជាមួយផលិតកម្មរស្មី ហង្សមាស។ លើសពីនេះ ម្ចាស់ជ័យលាភីឌឹវយ្សន៍ក្នុងរដូវកាលទីមួយនេះ បានទទួលបានរង្វាន់ម៉ូតូហុងដា ២០១៥ ចំនួន១គ្រឿង និងស្រាបៀកម្ពុជា ២០កេសទៀត។
ដោយឡែកបេក្ខជនបីនាក់ទៀត មិនបានជាប់ជយលាភីកាលពីយប់ម៉ិញ ក៏ទទួលបានម៉ូតូហុងដាម្នាក់មួយគ្រឿង ទឹកប្រាក់ចំនួន ១០០០ដុល្លារសហរដ្ឋអាមេរិកដែរ ពីកម្មវិធី និងស្រាបៀរកម្ពុជា ២០កេសផងដែរ ៕
សូមស្ដាប់ និងទស្សនាឡើងវិញ នូវទឹកដម និការសម្ដែង របស់អ្នកចម្រៀងថ្មី លោក ប៊ុត សីហា៖