នាយកគ្រប់គ្រងផ្នែកស៊ើបអង្កេតអាមេរិក បានប្រកាសថា៖ «យើងបានស្គាល់វា ថាជានរណា​ហើយ» ជា​ចម្លើយ​តបទៅនឹងសំនួរ ដែលចង់ដឹងពីអត្តសញ្ញាណរបស់ឃាតករ ដោយអ្នកសារព័ត៌មាន។ ប៉ុន្តែ FBI នឹង​មិនបង្ហាញឈ្មោះ របស់ជនដៃដល់នោះ នៅពេលភ្លាមៗនេះទេ។

លោក ជេម កូម៉ី បានបដិសេធផ្ដល់នូវភាពលំអិត ទៅលើទម្រង់រូបរាង ឬសញ្ជាតិរបស់ពេជ្ឈឃាត ដែលបាន​អារ ក ដោយគ្មានញញើតដៃ អ្នកសារព័ត៌មានអាមេរិកាំងទាំងពីររូប បន្ទាប់ពីបាននិយាយដាក់ក្នុងវីដេអូ ជា​មួយសំនៀងតាមបែបពលរដ្ឋអង់គ្លេស។ ជាមួយនឹងសម្លៀកបំណាក់ខ្មៅ រុំជិតខ្លួន ជននេះបាននិយាយ នៅ​មុនសម្លាប់ចំណាប់ខ្មាំង ជាអាថ៌ថា៖ «យើងត្រឡប់មកវិញហើយ អូបាម៉ា (ឈ្មោះប្រធានាធិបតីអាមេរិក) ហើយយើងត្រឡប់មកវិញ ដោយសារតែនយោបាយក្អេងក្អាយរបស់អ្នកឯង នៅចំពោះរដ្ឋអ៊ីស្លាម។

ការសម្លាប់ដោយកាត់«ក» ទៅលើជនជាតិអាមេរិកាំងទាំងពីរ នៅថ្ងៃទី១៩ ខែសីហា និងថ្ងៃទី៣ ខែកញ្ញា ត្រូវ​បានក្រុមអង្គការ«រដ្ឋអ៊ីស្លាមនិយម» ប្រកាសចេញមកទទួលខុសត្រូវ ថាជាទង្វើរបស់ពួកគេ។​ ក្នុង​វីដេអូមួយ​ទៀត ប្រវែង៥៥នាទី ដែលមានចំណងជើងថា «ភ្លើងសង្គ្រាម (Flames of war)» ចេញផ្សាយនៅចុងខែកញ្ញា បានបង្ហាញឲ្យឃើញពីសកម្មជនជីហាដ (jihad) បិទមុខមួយនាក់ថ្មី បាននិយាយភាសាអង់គ្លេសយ៉ាងច្បាស់ ជាមួយនឹងសំនៀងតាមបែបពលរដ្ឋអាមេរិកាំង ឬកាណាដា។

លោក ជេម កូម៉ី បាននិយាយបន្ថែម នៅក្នុងសន្និសីទសារព័ត៌មាននោះទៀតថា៖ «វាគ្មានអ្វីសង្ស័យទេ ដែល​នរណាម្នាក់បាននិយាយ ជាមួយនឹងសំនៀងតាមបែបអាមេរិកខាងជើង នៅក្នុងវីដេអូនេះ។ ដូច្នេះ វាជាបញ្ហា​មួយ នៃការព្រួយបារម្ភដ៏ធំរបស់យើង នៅពេលនេះ។»៕

រូបភាពខាងក្រោម អាចធ្វើឲ្យប៉ះទង្គិចដល់អារម្មណ៍។ ដូច្នេះហាមទស្សនា ប្រសិនបើអ្នកមានបញ្ហាខាងអារម្មណ៍ ឬបេះដូងខ្សោយ។