អង់គ្លេស៖ កាយឃើញឆ្អឹងខ្មោចមួយគូរកាន់ដៃគ្នា តាំងពី៧០០ឆ្នាំមុន
- ដោយ: សេក មនោរកុមារ ដោយ សេក មនោរកុមារ (ទាក់ទង៖ [email protected]) - ប៉ារីស ថ្ងៃទី២៣ កញ្ញា ២០១៤
- កែប្រែចុងក្រោយ: September 24, 2014
- ប្រធានបទ: ស្នេហ៍អមតៈ
- អត្ថបទ: មានបញ្ហា?
- មតិ-យោបល់
-
នៅក្នុងការធ្វើកំណាយ នាទីក្រុងដ៏តូចមួយឈ្មោះ ហាឡាតុន (Hallaton) ភាគកណ្ដាលនៃចក្រភពអង់គ្លេស ក្រុមបូរាណវិទូនៃសកលវិទ្យាល័យ ឡីសេស្ទ័រ (Leicester) មានការភ្ញាក់ផ្អើលជាខ្លាំង ដោយបានរកឃើញគ្រោងឆ្អឹងនៃគូរស្នេហា ដែលមានដៃកាន់ជាប់គ្នាមួយគូរ និងមានអាយុកាលតាំងពី៧០០ឆ្នាំមុន។ ការជីករកឃើញនេះ ស្ថិតនៅមិនឆ្ងាយប៉ុន្មានពីគ្រោងឆ្អឹង របស់អតីតព្រះមហាក្សអង់គ្លេស ព្រះអធិរាជ រីឆាដ ទី៣ (Richard III) ដែលត្រូវបានរកឃើញនៅក្រោមចំណតរថយន្ដ មិនឆ្ងាយប៉ុន្មានពីសកលវិទ្យាល័យ ឡឺសេស្ទ័រ កាលពីឆ្នាំ២០១៣ ទៅម៉ិញ។
គ្រោងឆ្អឹងទាំងមូលនៃគូរស្នេហ៍ ត្រូវបានគាស់ឃើញពីកូនភ្នំមួយ ដែលធ្លាប់ជាកន្លែងកប់ខ្មោច និងជាទីតាំងរបស់វិមានបូរាណមួយកន្លែង នៅក្នុងសតវត្សទី១៤។ គេបានស្គាល់ថា វិមាននោះមានឈ្មោះថា ស៊ាំង ម័រែល (Saint Morrell) សង់ក្នុងឆ្នាំ១៥៣២ ប៉ុន្តែវិមាននេះ ទើបនឹងត្រូវបានប្រវត្តិវិទូមួយរូប រកឃើញមកវិញ ក្នុងពេលថ្មីៗនេះប៉ុណ្ណោះ។
ស្មោះស្ម័គ្រជាអមតៈ
កំណាយធ្វើទៅលើតំបន់នោះ មិនមានភាពអំណោយផលប៉ុន្មានទេ។ លើសពីគ្រោងឆ្អឹងបុរសស្ត្រីមួយគូរ ដែលមានអាយុប្រហាក់ប្រហែលនឹងវិមាន ស៊ាំង ម័រែល គេបានរកឃើញប្រមាណជា១១គ្រោងឆ្អឹងទៀត ដែលមានសភាពសឹងតែនៅដូចដើម និងប្រាក់សេន ដែលគេបានប្រើប្រាស់ នៅក្នុងសម័យកាលរវាងពីសតវត្សន៍ទី១១ និងទី១៥។
បើតាមក្រុមអ្នកបូរាណវិទូ បាននិយាយថា គ្រោងឆ្អឹងដែលត្រូវបានរកឃើញ ទំនងជាគ្រោងឆ្អឹងរបស់ក្រុមអ្នកត្រាច់ចរតាមបែបសាសនា ដើម្បីស្វែងរកទឹកដីស័ក្ដិសិទ្ធិ។ អ្នកស្រាវជ្រាវបានបន្តថា ទីក្រុង ហាឡាតុន នៅក្នុងសតវត្សន៍ទី១៤ ជាតំបន់ដ៏សំខាន់មួយ សម្រាប់ក្រុមអ្នកត្រាច់ចរតាមបែបសាសនា ធ្វើដំណើរកាត់តាម និងមួយចំនួនបានស្នាក់នៅទីនេះ។
នៅក្នុងពេលនេះ រឿងរ៉ាវពិតប្រាកដ របស់គ្រោងឆ្អឺងគូរស្នេហ៍ នៅមិនទាន់ត្រូវបានអ្នកស្រាវជ្រាវអះអាងបានយ៉ាងដូចម្ដេចនៅឡើយ តែគេគ្រាន់តែដឹងថា ពួកគេទាំងពីរនាក់ត្រូវបានបញ្ចុះនៅក្នុងវាលកប់ខ្មោច ដែលសម្រាប់បញ្ចុះតែសមាជិកសាសនា ឬអ្នកស្មោះស្ម័គ្រ ប៉ុន្តែមិនមែនសម្រាប់អ្នកភូមិនោះទេ។ ជំហានដំបូង ក្រុមបូរាណវិទូ បានបញ្ជាក់ថា ពួកគេស្មោះស្ម័គ្រនឹងព្រះជាម្ចាស់ តែក៏បាន«ស្មោះស្ម័គ្រជាអមតៈ» ជាមួយនឹងសេចក្ដីស្នេហារបស់ពួកគេដែរ៕
