មិនថាតែនៅក្នុងប្រទេសកម្ពុជា ដែលទើបនឹងងើបពីសង្គ្រាមហែកហួរនោះទេ តែបើសូម្បីប្រទេសបារាំង ដែល​បានចេញផុតពីសង្គ្រាមលោកលើកទីពីរ ប្រមាណជា ៧០ឆ្នាំទៅហើយ តែគ្រាប់មិនទាន់ផ្ទុះ នៅតែ​បន្ត​លងប្រទេសនេះនៅឡើយ។ បន្ទាប់ពីការស៊ើបអង្កេត លើសំនុំរឿង«ឃាតកម្មដោយ​អចេតនា»​ត្រូវបាន​បើក​ធ្វើភ្លាមៗ នៅព្រឹកថ្ងៃអាទិត្យនេះ បានបង្ហាញលទ្ធផលជាបណ្ដោះអាសន្ន នៅល្ងាចថ្ងៃដដែលថា នោះទំនង​ច្បាស់ជាគ្រាប់បែក ដែលមិនទាន់ផ្ទុះ ហើយត្រូវបានបន្សល់ទុកតាំងពីសង្គ្រាមលោកលើកទី២។

គ្រាប់បែកនេះ បានកម្រើកឡើងវិញ និងបន្ទាប់មកបានផ្ទុះ ដោយសារតែភ្លើងភ្នក់ ដែលដុតបំភ្លឺនៅពេល​យប់​ដោយក្រុមយុវជន ដែលបានទៅបោះជំរុំ ធ្វើវិសមកាលនៅតំបន់ឆ្នេរសមុទ្រ លើកោះហ្គ្រ័រ។ គ្រាប់បែក ទំនង​ជាបានងើបឡើង មកនៅក្នុងស្រទាប់ខាងលើនៃឆ្នេរខ្សាច់ ដោយសារទឹកជោរ។ នគរបាលដែលទទួល​បន្ទុក​ស៊ើបអង្កេត បាននិយាយថា៖ «ចំនុចសំខាន់ក្នុងពេលនេះ បានចាត់ទុកហេតុការណ៍ត្រឹមជា​"ឧប្បត្តិហេតុ" ប៉ុន្តែ​ចំនុចសង្ស័យផ្សេងទៀត មិនទាន់ត្រូវបានបញ្ជៀសចេញនៅឡើយ»។

ហេតុការណ៍បានកើតឡើង នៅវេលាម៉ោង២ព្រឹកព្រហាម ថ្ងៃអាទិត្យទី៧ ខែកញ្ញា ខណៈពេលដែលក្រុម​យុវជនអាយុប្រមាណជា២០ឆ្នាំ ចំនួនជាង ១០នាក់ ហៀបចូលទៅគេងនៅក្នុងតង់ក្រណាត់របស់ពួកគេ ដែល​បានបោះ​នៅលើឆ្នេរខ្សាច់«ក្រហម» ផ្នែកខាងកើតនៃកោះ។ យុវជនម្នាក់អាយុ២៦ឆ្នាំ បានស្លាប់ភ្លាម​នៅនឹងកន្លែង។ យុវជនម្នាក់ទៀត អាយុ២៥ឆ្នាំ បានរងរបួសធ្ងន់ ហើយត្រូវបានបញ្ជូនតាមឧទ្ធម្ភាគចក្រ មក​កាន់មន្ទីរពេទ្យនៅទីក្រុងណង់ (Nantes)។ យុវជនរងគ្រោះស្រាល ចំនួនប្រាំបីនាក់ផ្សេងទៀត ក៏ត្រូវបាន​បញ្ជូនទៅព្យាបាល នៅក្នុងមន្ទីរពេទ្យមួយទៀត នៅទីក្រុង ឡូរីយ៉ង់ (Lorient) ដែលសុទ្ធតែស្ថិតក្នុង​តំបន់​ជា​មួយគ្នា។

បើទោះជាមកដល់ក្នុងអំឡុងពេលនេះ គ្រោះថ្នាក់បែបនេះបានកើតឡើងដោយកម្រក្ដី តែគ្រាប់មិនទាន់ផ្ទុះ ដែលបន្សល់ទុកពីសង្គ្រាមលោក នៅតែត្រូវបានគេរកឃើញជាញឹកញាប់ ក្នុងប្រទេសនានានៅទ្វីបអ៊ឺរ៉ុប​នៅ​ឡើយ។ គ្រាប់មិនទាន់ផ្ទុះទាំងនោះ ត្រូវបានកប់ជ្រៅទៅក្នុងធម្មជាតិ ឬដីច្បារដំណាំ ហើយត្រូវបានរកឃើញ​មកវិញ បន្ទាប់ពីតំបន់ទាំងនោះ ត្រូវបានកាយគាស់ធ្វើជាការដ្ឋានសាងសង់ ឬភ្ជួររាស់ ...។ មជ្ឈមណ្ឌល​អន្តរតំបន់​​ជំនាញខាងដោះមីន របស់ប្រទេសបារាំងបានឲ្យដឹងថា គ្រាប់បែក និងគ្រាប់កាំភ្លើងធំច្រើនជាង ១,៥ពាន់​លានគ្រាប់ ត្រូវបានបាញ់ចេញ ក្នុងអំឡុងសង្គ្រាមលោកលើកទីមួយ ហើយពីក្នុងចំណោមនោះ ២០%នៅ​មិនទាន់ផ្ទុះនៅឡើយ៕