គណបក្សសង្រ្គោះជាតិ នឹងបង្ហាញឲ្យបានច្បាស់ ពីគោលជំហរនយោបាយរបស់គណបក្សដល់អ្នកគាំទ្រ ដើម្បី​ជៀស​វាងការភ័ន្តច្រឡំ ដែលធ្វើឲ្យធ្លាក់ប្រជាប្រិយភាព។ នេះជាការពន្យល់របស់លោក កឹម សុខា អនុ​ប្រធាន​គណបក្ស​សង្រ្គោះជាតិ ខណៈដែលលោកយល់ថា ស្ថានការណ៍ចុងក្រោយនេះ ធ្វើឲ្យមានភាពស្រពិចស្រពិល​ពីជំហរ​គណបក្ស។

លោកកឹម​ សុខា នៅពិធីជួបជាមួយអ្នកគាំទ្រគណបក្សលោក។ (រូបថតគណបក្ស)

នយោបាយ - គោលដៅអត្ថិភាពរបស់គណក្សសង្រ្គោះជាតិ ដែលត្រូវធ្វើនៅក្នុងរដ្ឋសភា មុននឹងសម្រេច​ធ្វើកិច្ចការ​អ្វីផ្សេងទៀត គឺការកែទម្រង់គណៈកម្មាធិការជាតិរៀបចំការបោះឆ្នោត គ.ជ.ប និងការពង្រឹងតួនាទីរបស់គណបក្ស​ជំទាស់ នៅក្នុងរដ្ឋសភា។ នេះជាការបញ្ជាក់របស់លោក កឹម សុខា អនុប្រធានគណបក្សសង្រ្គោះជាតិ ដល់អ្នក​សារព័ត៌មាន នៅមុខសាលាដំបូងរាជធានីភ្នំពេញ នៅថ្ងៃទី២៥ ខែកក្កដា ឆ្នាំ២០១៤ នេះ។

អនុប្រធានគណបក្សសង្រ្គោះជាតិដដែលនេះ សង្កត់ធ្ងន់ថា៖ «បើការបោះឆ្នោតកែទម្រង់មិនបានល្អទេ ស្រុកយើង​មិនបានសុខទេ។ បោះឆ្នោតហើយនឹងឈ្លោះគ្នាទៀត។ បោះឆ្នោតរឿងធំជាងគេ។» លោកកឹម សុខា ពន្យល់ទៀតថា បើគ្មានការបោះឆ្នោតត្រឹមត្រូវ ដែលអាចផ្តល់ឱកាសដល់ប្រជាពលរដ្ឋ មានសិទ្ធិជ្រើសរើសមេដឹកនាំ ដែលគាត់​ពេញចិត្ត បញ្ហានឹងនៅតែមាន។

សន្និបាតគណបក្សសង្រ្គោះជាតិ នៅថ្ងៃទី២៧ ខែកក្កដា ឆ្នាំ២០១៤ គណបក្សសង្រ្គោះជាតិ នឹងដាក់ទិសដៅទៅមុខ​សម្រាប់គណបក្សសង្រ្គោះជាតិ ដើម្បីបង្កើនសកម្មភាពរបស់ខ្លួន ព្រោះរហូតមកដល់ពេលនេះ អ្នកគាំទ្ររបស់​គណបក្ស ហាក់ដូចជាមានមន្ទិលសង្ស័យ ពីគោលជំហររបស់គណបក្ស។ លោកកឹម សុខា បានអះអាងទៀតថា គណបក្សសង្រ្គោះជាតិ នឹងពង្រឹកជំនឿរបស់ប្រជាពលរដ្ឋ មកលើគណបក្ស។

ប្រតិកម្មសម្តែងការពេញចិត្តពីសហគមន៍ជាតិ និងអន្តរជាតិបានធ្លាក់មកជាបន្តបន្ទាប់ ក្រោយពី​គណបក្សសង្រ្គោះ​ជាតិ និងគណបក្សប្រជាជនកម្ពុជា បង្កើតកិច្ចព្រមព្រៀងនយោបាយ ដើម្បីបិតបញ្ចប់វិបត្តិ​នយោបាយ ដែលបាន​អូសបន្លាយពេលជិតមួយឆ្នាំមកហើយនោះ។ តែទន្ទឹមនឹងនេះ ក៏មានប្រតិកម្មសម្តែងការមិនពេញចិត្តមួយចំនួន ចំពោះកិច្ចព្រមព្រៀងនយោបាយ របស់គណបក្សទាំងពីរផងដែរ ពិសេសអ្នកគាំទ្រគណបក្សសង្រ្គោះជាតិ៕