ក្រុមសម្ព័ន្ថយុវជន ដែលបានធ្វើការតវ៉ានៅមុខស្ថានទូតវៀតណាម ដើម្បីឱ្យអ្នកនាំពាក្យវៀតណាម សុំទោសជា​សាធារណៈ ចំពោះការដែលនិយាយថា ទឹកដីកម្ពុជាជាទឹកដីពីដូនតារបស់ខ្លួន បានប្តូរគោលជំហរវិញ​ ដោយ​មិន​ឱ្យអ្នកនាំពាក្យរូបនោះសុំទោសនោះទេ ប៉ុន្តែរដ្ឋាភិបាលវៀតណាម ត្រូវតែធ្វើការបកស្រាយថា ទឹកដីកម្ពុជា​ក្រោម​ជាអតីតទឹកដីរបស់ខ្មែរ។

សន្និសីទសារព័ត៌មាន របស់ក្រុមសម្ព័ន្ធយុវជន។ (រូបថត MONOROOM.info/ C. Nita)

ការបាត់បង់ទឹកដី - សម្ព័ន្ធយុវជនទាំង៧ក្រុមដែលរួមមាន សហព័ន្ធនិស្សិតបញ្ញាវ័ន្តកម្ពុជា យុវជនខ្មែរមហានគរ សមាគមន៍ទស្សនៈយុវជនខ្មែរ យុវជនដើម្បីសន្តិភាព ICambodia យុវជនដើម្បីប្រជាធិបតេយ្យ I Love Cambodia Hot News និង I Love Cambodia Hot News II ដែលបានធ្វើការតវ៉ា នៅមុខស្ថានទូតវៀតណាម កាលពីព្រឹកថ្ងៃ​ទី០៨ ខែកក្កដា ម្សិលមិញនេះ នៅក្នុងសន្និសិទកាសែតនៅពីព្រឹកថ្ងៃទី០៩ ខែកក្កដា បានបញ្ជាក់គោលជាថ្មីថា នឹងត្រៀមនឹងធ្វើបាតុកម្មសារជាថ្មី ដើម្បីឱ្យប្រទេសវៀតណាម ទទួលស្គាល់ថា ទឹកដីកម្ពុជាក្រោម​ដែលវៀតណាម​កាន់កាប់សព្វថ្ងៃនេះ គឺជាអតីតទឹកដីរបស់ខ្មែរ ដែលបារាំងបានកាត់ឱ្យកាលពីឆ្នាំ១៩៤៩។

ការដែលស្នើឱ្យរដ្ឋាភិបាលវៀតណាមទទួលស្គាល់ទឹកដី កម្ពុជាក្រោមជារបស់ខ្មែរនេះ ដើម្បីឱ្យវៀតណាម​ទទួល​ខុសត្រូវនូវអ្វីដែលជាប្រវត្តិសាស្រ្ត និងដើម្បីឱ្យកូនខ្មែរជំនាន់ក្រោយ ដឹងនូវអ្វីដែលជាប្រវត្តិសាស្រ្តពិត។

បាតុកម្មជាថ្មីនេះ នឹងប្រព្រឹត្តទៅនៅថ្ងៃទី១៦ ខែកក្កដា ឆ្នាំ២០១៤ ដែលមានគម្រោងដាក់ញតិទៅស្ថានទូតនានាដូច អាមេរិច អង់គ្លេស រុស្ស៊ី ចិន វៀតណាម ជាពិសេសស្ថាទូតបារាំង។ ប្រធានយុវជនដើម្បីសន្តិភាព លោក អឿ ណារិត បានឱ្យដឹងថា ដើម្បីជាការបន្ទន់ឥរិយាបថរៀងៗខ្លួន ជាការគោរពគ្នាទៅវិញទៅមក ខាងក្រុមយុវជន នឹងមិនឱ្យ​អ្នក​នាំពាក្យ របស់ស្ថានទូតវៀតណាម លោក ទ្រឹង វ៉ាន់ថុង សុំទោសនោះទេ ប៉ុន្តែប្រទេសវៀតណាមត្រូវតែទទួល​ស្គាល់​ជាផ្លូវការ ទាំងជាតិនិងអន្តរជាតិថា ទឹកដីកម្ពុជាក្រោមជាទឹកដីរបស់ប្រទេសកម្ពុជា។

ប្រធានយុវជនរូបនេះបន្តថា៖ «យើងនឹងមានការតវ៉ា យើងនឹងបន្តការតវ៉ារហូតដល់មានដំណោះស្រាយ បើមិន​មាន​ដំណោះស្រាយទេ ពួកយើងនឹងបន្តការតវ៉ាជារៀងរហូត រហូតដល់ប្រទេសវៀតណាម ទទួលស្គាល់ថា​នេះជា​កំហុស​ឆ្គង»។

កញ្ញា ទីតា តំណាងឱ្យក្រុមយុវជនមកពី I Love Cambodia Hot News បានបញ្ជាក់ថា ចំពោះការទទួលស្គាល់ថា ទឹកដីកម្ពុជាក្រោមជារបស់ខ្មែរនេះ រដ្ឋាភិបាលបាលវៀតណាម ត្រូវតែធ្វើជាសេចក្តីថ្លែងការជាលាយល័ក្ខអក្សរ។ កញ្ញាបញ្ជាក់បន្ថែមថា៖ «ខ្ញុំសូមផ្តាំផ្ញើទៅរដ្ឋាភិបាលយួន សូមកុំបន្លំជាមួយនឹងប្រវត្តិសាស្រ្តរបស់ខ្មែរ ព្រោះអី​ប្រវត្តិ​សាស្រ្តរបស់ខ្មែរ មានជាយូមកហើយមិនមែនទើបតែមានទេ។ ក្នុងការដែលគាត់ កំពុងបន្លំប្រវត្តិសាស្រ្ត មានន័យ​គាត់កំពុងតែធ្វើចោរលួច។»៕