បន្ទាប់ពីបានធ្វើ សេចក្ដីប្រកាសនៃការខិតចូលជិតគ្នា កាលពីខែមិនាកន្លងមកនោះ ថ្នាក់ដឹកនាំរបស់គេហទំព័រ ដែលធំ ជាងគេទាំងពីរនៅចិន គឺ យូគូ (Youku) និង ទូដូ (Tudou) បានសម្រេចកាលពីថ្ងៃច័ន្ទទី២០សីហាកន្លងទៅ ថានឹងច្របាច់ បញ្ចូលគ្នាទៅជាគេហទំព័រតែមួយ។ ក្រុមហ៊ុនទាំងពីរ នឹងចាប់ផ្ដើមធ្វើបម្លាស់ប្ដូរភាគហ៊ុនរបស់ខ្លួន ក្នុងពេលខាងមុខនេះ ហើយដែលគិតជាទឹកប្រាក់ មានប្រមាណជា ១កោដដុល្លាអាមេរិក (ប្រហែលជា ៨០៥លានអ៊ឺរ៉ូ)។

នៅក្នុងទិន្នន័យរបស់ ទីផ្សារភាគហ៊ុនធំជាងគេទាំងពីរ (Nasdaq និង New York Stock Exchange) របស់សហរដ្ឋអាមេរិក បានអោយដឹងថា បណ្ដាញគេហទំព័រទាំងពីរ មានតម្លៃភាគហ៊ុន​ប្រហាក់ប្រហែលគ្នា។  គេហទំព័រ យូគូ ដែលបង្កើតឡើង នៅឆ្នាំ២០០៦នោះ បានទទួលអ្នកចូលទៅទស្សនា ប្រមាណជា ២០០លាននាក់ផ្សេងគ្នា ជារៀងរាល់ខែ។ បណ្ដាញវិទ្យុ និងទូរទស្សន៍របស់អង់គ្លេស ប៊ីប៊ីស៊ី (BBC) បានរាយការណ៍ថា គោលបំណងធំនៃការច្របាច់បញ្ចូលគ្នានេះ គឺដើម្បីកាត់ បន្ថយទំហំចរាចរណ៍ទិន្នន័យ ដែលមានតំលៃយ៉ាងច្រើនលើសលប់ និងធ្វើអោយចេញជារូបរាង នូវសេដ្ឋកិច្ចតាមបែប មាត្រាដ្ឋានមួយ។ បណ្ដាញវិទ្យុ និងទូរទស្សន៍នេះបានបន្ថែមថា ការរួបរួមគ្នានេះ នឹងសន្សំសំចៃបានរវាងពី ៥០ទៅ៦០ លានដុល្លាអាមេរិក (៤០ទៅ៤៨លានអ៊ឺរ៉ូ) បើនិយាយពីពេលនេះទៅមួយឆ្នាំកន្លះខាងមុខទៀត។

គេហទំព័រធំទាំងពីរ ទំនងនឹងទទួលបានផងដែរ ពីការច្របាច់បញ្ចូលគ្នានេះ នូវផ្នែកមួយទៀតនៃទីផ្សារ ដែលនឹងធ្វើអោយ មានការទាក់ទាញ ក្នុងការធ្វើវិនិយោគ ទៅលើការផ្សព្វផ្សាយពាណិជ្ជកម្ម។ ជាការរួមបញ្ចូលគ្នាមួយ ដែលមានទំរង់ល្អ តែទស្សនាវដ្ដីឌឺ ណេត វេប (The Next Web) បានរំលឹកថា មើលទៅវាជាមិនជាស្រួលប៉ុន្មានឡើយ ព្រោះប្រសិនជាគេ និយាយពីប្រវត្តិក្នុងអតីតាកាល គេហទំព័រទាំងពីរធ្លាប់ឈ្លោះទាស់ទែងគ្នា នៅតាមបណ្ដាញអាំងទើណែត ហើយថែមទាំង ធ្លាប់បានឡើងតុលាការទៀតផង៕

-----------------------------------------------
ដោយ៖ សេក មនោរកុមារ - ប៉ារីស ថ្ងៃទី ២២ ខែសីហា ឆ្នាំ២០១២
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ