ប្រធានគណបក្សសង្រ្គោះជាតិលោក សម រង្ស៊ី ក្រោមហេតុផលមនុស្សធម៌ បានទទូចដល់លោកស្រី ប៊ុន រ៉ានី ប្រធានកាកបាទក្រហមកម្ពុជា និងជាភរិយាលោកនាយករដ្ឋមន្រ្តី ហ៊ុន សែន ឲ្យជួយផ្តល់ជំនួយមនុស្សធម៌បន្ទាន់ ដល់ជនរងគ្រោះមកពីខេត្តក្រចេះ។

លោកស្រី ប៊ុន រ៉ានី ហ៊ុន សែន ប្រធានកាកបាទក្រហម។

ជំនួយ - លោកសម រង្ស៊ី ប្រធានគណបក្សសង្រ្គោះជាតិ បានបញ្ជាក់លើទំព័រហ្វេសប៊ុក ផ្លូវការរបស់ខ្លួន នៅថ្ងៃទី២៤ ខែឧសភា នេះថា៖ «ម្សិលមិញនេះ ខ្ញុំបានស្នើឲ្យលោកជំទាវ ប៊ុន រ៉ានី ហ៊ុន សែន ប្រធានកាកបាទក្រហម ផ្តល់​ជំនួយមនុស្សធម៌ ដល់ពលរដ្ឋប្រមាណ ៤០០គ្រួសារ ដែលរងគ្រោះ ដោយសារការបណ្តេញចេញពីដីធ្លី ផ្ទះសម្បែង នៅឃុំឃ្សឹម ស្រុកស្នួល ខេត្តក្រចេះ។»

ប្រមុខគណបក្សជំទាស់រូបនេះ បានពន្យល់ថា ប្រជាពលរដ្ឋ ទាំង៤០០គ្រួសារនោះ ត្រូវបានក្រុមហ៊ុនយួន ដែល​ទទួលបានសម្បទានដីនៅខេត្តក្រចេះ ដុតផ្ទះសម្បែង និងបណ្តេញចេញពីដីធ្លី ដែលពួកគាត់ធ្លាប់រស់នៅ។ ពេលនេះ ពួកគាត់បានឡើងមកតវ៉ានៅភ្នំពេញ ហើយកំពុងស្នាក់នៅវត្តសាមគ្គីរង្ស៊ី សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ។

លោក សម រង្ស៊ី បន្ថែមថា ក្នុងអំឡុងពេលស្នាក់នៅភ្នំពេញនេះ ប្រជាពលរដ្ឋរងគ្រោះទាំងនោះ ដែលជាជន​ភៀស​ខ្លួនក្នុងស្រុក ពុំមានជម្រកស្នាក់នៅ និងអាហារហូបចុកគ្រប់គ្រាន់ ថែមទាំងខ្វះថ្នាំសង្កូវ និងការព្យាបាលជម្ងឺ​ទៀត​ផង។

ភ្លាមៗទស្សនាវដ្តីមនោរម្យ.អាំងហ្វូ មិនអាចទាក់ទងមន្រ្តីណាម្នាក់របស់កាកបាទក្រហមកម្ពុជា ដើម្បីធ្វើការ​អត្ថាធិប្បាយ​បាននៅឡើយ។ តែកន្លងមក បើទោះជាកាកបាទក្រហមកម្ពុជា បានអះអាងពីការមិន​រើសអើងជន​រងគ្រោះក៏ដោយ ក៏ក្រុមជនរងគ្រោះពីបញ្ហារំលោភបំពានដីធ្លី មិនមែនជាមុខសញ្ញាចំបងរបស់កាកបាទក្រហម ក្នុងការផ្តល់អំណោយនោះដែរ។

ពលរដ្ឋមកពីខេត្តក្រចេះ ប្រមាណជា៤០០គ្រួសារ ដែលបានអះអាងថា ជាជនរងគ្រោះពីការរំលោភបំពានដីធ្លី រហូតមកដល់ពេលនេះ កំពុងបន្តស្នាក់នៅវត្តសាមគ្គីរង្ស៊ី សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ ខណៈ​ការស្វែងរកដំណោះរបស់ពួកគេជាមួយស្ថាប័នពាក់ព័ន្ធ តាំងពីរដ្ឋបាលថ្នាក់ក្រោមជាតិ ដល់រដ្ឋបាលថ្នាក់ជាតិ មិនទាន់រកច្រកចេញរួច៕