កឹម សុខា៖ បក្ស​សង្រ្គោះ​ជាតិ មិន​ស្ទាក់​ស្ទើរ​នឹង​ពឹង​ពាក់​បរទេស

អនុប្រធានគណបក្សសង្រ្គោះជាតិ លោកកឹម សុខា បានអះអាងថាគោលនយោបាយ របស់គណបក្សរបស់លោក មិនមានការរារែកនឹងស្នើភាគីបរទេស ឲ្យជួយអន្តរាគមន៍ ក្នុងវិបត្តិនយោបាយកម្ពុជានោះទេ ហើយក៏មិនអល់អែក​ជំរុញឲ្យភាគីបរទេសទាំងនោះ បដិសេធមិនទទួលស្គាល់ការគ្រប់គ្រងអំណាច របស់ គណបក្សប្រជាជនកម្ពុជា​ផងដែរ។
Loading...
  • ដោយ: អ៊ុំ បូរី
  • កែប្រែចុងក្រោយ: April 08, 2014
  • ប្រធានបទ:
  • អត្ថបទ: មានបញ្ហា?
  • មតិ-យោបល់

អនុប្រធានគណបក្សសង្រ្គោះជាតិ លោកកឹម សុខា បានអះអាងថាគោលនយោបាយ របស់គណបក្សរបស់លោក មិនមានការរារែកនឹងស្នើភាគីបរទេស ឲ្យជួយអន្តរាគមន៍ ក្នុងវិបត្តិនយោបាយកម្ពុជានោះទេ ហើយក៏មិនអល់អែក​ជំរុញឲ្យភាគីបរទេសទាំងនោះ បដិសេធមិនទទួលស្គាល់ការគ្រប់គ្រងអំណាច របស់ គណបក្សប្រជាជនកម្ពុជា​ផងដែរ។


លោក កឹម សុខា អនុប្រធានគណបក្សសង្គ្រោះជាតិ នៅថ្ងៃទី២៦ ខែមករា ឆ្នាំ ២០១៤។ (រូបថត MONOROOM.info/ O. Vary)

នយោបាយ - ថ្លែងទៅកាន់អ្នកគាំទ្រនៅសហរដ្ឋអាមេរិក លោកកឹម សុខា បានបញ្ជាក់ថា៖ «ឲ្យជួយដោះស្រាយ​បញ្ហាខ្មែរ ឬបញ្ហាជាប់គាំងនយោបាយ ឲ្យធ្វើអាជ្ញាកណ្តាល គណបក្សសង្រ្គោះជាតិ មិនមែនពឹងតែចិនទេ ឲ្យតែ​អ្នក​ជួយបាន ជប៉ុន អាមេរិក អូស្រ្តាលី អ៊ឺរ៉ុប ក៏សុំទាំអស់ សុំឲ្យអ្នកឯងជួយមកធ្វើអាជ្ញាកណ្តាល។ (...) យើងត្រូវការ​មហាអំណាចទាំងអស់ឲ្យមកនៅខាងយើង កុំឲ្យនៅខាងគណបក្សប្រជាជន»។  ហើយ​ដែលត្រូវបាន នៅថ្ងៃទី០៨ ខែមេសា ឆ្នាំ២០១៤។

សារនយោបាយដដែល ដែលត្រូវបានបង្ហោះលើទំព័រហ្វេកប៊ុកផ្លូវការរបស់លោកនោះ អនុប្រធាន​គណបក្សជំទាស់​ បានអះអាងថា វាមានភាពចាំបាច់ណាស់ដែលតម្រូវឲ្យគណបក្សសង្រ្គោះជាតិ ជំរុញឲ្យប្រទេសមហាអំណាច​ទាំង​អស់បានដឹងការពិតថា គណបក្សប្រជាជនកម្ពុជា គឺជាគណបក្សចាញ់ឆ្នោត ហើយគណបក្សសង្រ្គោះជាតិ គឺជាអ្នក​ទទួលជ័យជំនះយ៉ាងពិតប្រាកដ នៅក្នុងការបោះឆ្នោតកាលពីពេលកន្លងមក។

នៅក្នុងជម្លោះនយោបាយដ៏ប្រទាំងប្រទើស កើតមានតាំងពីក្រោយការបោះឆ្នោតសកល ខែកក្កដា ឆ្នាំ២០១៣កន្លង​មកនោះ បណ្ដាប្រទេស​មហា​អំណាច រួមនឹងអង្គការសហប្រជាជាតិផង បានបង្ហាញជំហរបែបការទូតរបស់ពួកគេ ជំរុញឲ្យភាគីមានជម្លោះ ក្នុង​ប្រទេសកម្ពុជា មានការអត់ធ្មត់ ហើយប្រើប្រាស់យន្ដការដោះស្រាយ ភាពជាប់គាំង​ផ្នែក​នយោបាយដោយសន្តិវិធី។

យ៉ាងណាក៏ដោយ មហាប្រទេសទាំងនោះ នៅតែមានភាពស្ទាក់ស្ទើរ ក្នុងការទទួលស្គាល់លទ្ធផល​នៃការបោះឆ្នោត​ដែលត្រូវបានរាយការណ៍ថា មានការលួចបន្លំយ៉ាងខ្លាំងមួយ។ សហរដ្ឋអាមេរិកតាមរយៈរបាយការណ៍មួយរបស់​ខ្លួន កាលពីពេលកន្លងមក បានលើកពីការបោះឆ្នោតសកល ក្នុងខែកក្កដា ថាពោរពេញទៅដោយភាពមន្ទិល ហើយ​បាន​ស្នើសុំឲ្យមានការស៊ើបអង្កេត ​ប្រកប​ដោយឯករាជ្យភាពឡើងវិញ។

ដោយឡែក ប្រទេសចិនដែលជាមហាអំណាចមួយក្នុងតំបន់ បានទទួលស្គាល់ និងស្វាគមន៍រួចហើយ នូវ​ជ័យជំនះ​របស់​គណបក្សប្រជាជនកម្ពុជា នៅក្នុងការបោះឆ្នោតសកលនេះ តែបានអំពាវនាវឲ្យភាគីជម្លោះទាំងសង​ខាង​ឲ្យ​ចូលមកអង្គុយក្នុងតុចរចា ដើម្បីដោះស្រាយបញ្ហារវាងភាគីខ្មែរ និងខ្មែរ។

សម្រាប់គណបក្សប្រជាជនកម្ពុជាវិញ មិនចង់ឲ្យមានការលូកដៃពីភាគបរទេស ណាមួយឡើយ។ អតីតគណបក្ស​កុម្មុយនីស ​ដែល​បានដឹកនាំប្រទេសកម្ពុជា តាំងពីជាង៣០ឆ្នាំមកហើយនេះ បានលើកឡើងថា ស្ថានការណ៍​នយោបាយ​នៅកម្ពុជាក្នុងពេលនេះ មិនមានភាព​ចាំបាច់ សុំការអន្តរាគមន៍ពីភាគីបរទេស ឬអង្គការសហប្រជាជាតិ​នោះទេ៕

-------------------------------------
ដោយ អ៊ុំ បូរី (ទំនាក់ទំនង៖ [email protected]) - ភ្នំពេញ ថ្ងៃទី០៨ មេសា ២០១៤

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...