ក្បួនដង្ហែររបស់ក្រុមអ្នករងគ្រោះដោយការរំលោភបំពានដីធ្លី បានធ្វើការតស៊ូមតិ តាមរយៈការហែរក្បួន ដាក់ញត្តិ​ទៅ​ក្រសួងយុត្តិធម៌ សាលាឧទ្ធរណ៍ និងតាមបណ្តាសស្ថានទូតនានាមួយចំនួនទៀត។ ក្នុងថ្ងៃជាមួយគ្នានេះដែរ តំណាង​សហជីពបន្ទាប់ពីបញ្ចប់កិច្ចប្រជុំរបស់ខ្លួន ដែលមានសហជីពចំនួនប្រាំបួន និងតំណាងសហជីព​តាមបណ្តា​រោងចក្រ​មួយចំនួន ដែលមានសមាជិកជិត២០០នាក់ ជាមួយនឹងវត្តមាននៃព្រះសង្ឃប្រហែលជិតមួយរយអង្គ ក៏បាន​ធ្វើការ​ដង្ហៃរជាក្បួនទៅកាន់ព្រះអង្គដង្កើ មុខព្រះបរមរាជវាំងប្រកបដោយសន្តិភាព។

ការជួបប្រជុំគ្នារវាងក្រុមអ្នកតវ៉ា នៅក្បែរព្រះអង្គដងកើរ នៅថ្ងៃទី១០ ខែកុម្ភះ ឆ្នាំ២០១៤។ (រូបថត MONOROOM.info/ O.Vary)

ការទាមទារសិទ្ធិ -ការដង្ហែរក្បួននៃក្រុមទាំងពីរ ដោយឡែកៗពីគ្នានេះ គេសង្កេតឃើញថា មិនមានការរារាំង ឬ​បង្ក្រាបពីក្រុមប្រដាប់អាវុធ ឬក្រុមសន្តិសុខនៃសណ្តាប់ធ្នាប់សាលាខណ្ឌដូនពេញនោះឡើយ។ លោក រ៉ុង ឈុន ប្រធានសហភាពសហជីពកម្ពុជា បានលើកឡើងថាប្រជាពលរដ្ឋ សហជីពដែលធ្វើការទាមទារ ដោយមានការដង្ហែរ ក្នុងការដាក់ញ្ញតិទៅកាន់ស្ថានទូត ឬស្ថាប័នរដ្ឋនានាតែងតែប្រកាន់នូវជំហររបស់ខ្លូនដោយអហិង្សា និងតាមទិសដៅ​កំណត់របស់ខ្លូន។ លោកបានបន្តរថា ពេលដែលក្បួននដង្ហែរម្តងៗរបស់ប្រជាពលរដ្ឋ និងសហជីពចេះតែមាន​ការ​រំខានពីក្រុមអាជ្ញាធរ នោះហើយជាមូលហេតុនៃការប៉ះទង្គិចគ្នា។ «ព្រិត្តិការណ៍មួយមានអ្នកចូលរូមតិចទេ តែដល់​ពេលកម្លាំងដាក់មកព្រឹប ឃើញថាព្រឹត្តិការណ៍នោះនឹងផ្ទុះឡើងធំភ្លាម។»

តាមការទទួលបញ្ជាពីលោក សុខ ប៉េងវុធ អភិបាលរងខណ្ឌដូនពេញ ដែលកំពុងមានវត្តមាន ពីផ្នែកម្ខាងទៀតមុខ​ព្រះបរមរាជវាំង ស្ថិតនៅខាងជើង ឈាងខាងកើតនោះ លោក គឹម វុធថា តំណាងឲ្យសាលាខណ្ឌដូនពេញ និងជា​ប្រធានក្រុមសណ្តាប់ធ្នាប់ខណ្ឌដូនពេញ បានបញ្ជាក់ជាមួយលោក រ៉ុង ឈុន ក៏ដូចជាលោក អាត់ ធុន ក្បែរព្រះអង្គ​ដងកើរថា ខាងសាលាខណ្ឌមិនចង់ឲ្យមានការកកស្ទះចរាចរ ដោយសារតែការជួបជុំ ឬដង្ហែរក្បួននោះទេ។ «កន្លង​មកតែងតែមានការដង្ហែរជាក្បួន ដែលធ្វើឲ្យចរាចរមានការកកស្ទះ។ (…) បើដាក់តាមទូត សុំកុំឲ្យមានការដើរ​ដង្ហែរ​ជាក្បួន ឬមានដូចជាម៉ូតូកង់ដីជាដើម។»

ឆ្លើយតបទៅនឹងការលើកឡើងនេះ លោកអាត់ ធន់ ប្រធានសហព័ន្ធសហជីព (CCAWDU) បានលើកឡើងថា សកម្មភាពនៃការដាក់នោះ (វា) មិនអាចធ្វើឡើងដោយស្ងៀមស្ងាត់បាននោះទេ តែងតែមានគ្នាច្រើនជាងធម្មតា។
ឯប្រធានសហភាពសហជីពកម្ពុជាលោក រ៉ុង ឈុន ក៏បានបន្ថែមថា «(វា)កកស្ទះតែមួយភ្លេតទេ តែលោកត្រូវចាំ ដូចជាព្រឹត្តិការណ៍នៅមុខក្រសួងព័ត៌មាន កម្លាំងអ្នកចូលរួម តិចជាងកម្លាំងអាជ្ញាធរមកបង្ក្រាប។ (វា) មិនមែនកក​ស្ទះដោយសារតែអ្នកចូលរួមទេ កកស្ទះដោយសារតែកម្លាំងអាជ្ញាធរហ្នឹង មកធ្វើសកម្មភាពតែផ្តេសតែផ្តាស។»

ប្រធានសហព័ន្ធសហជីព (CCAWDU) លោក អាត់ ធុន ក៏បានធ្វើការថ្កោលទោសចំពោះទង្វើរបស់អាជ្ញាធរ ឬក្រុម​សណ្តាប់ធ្នាប់ដែលតែងតែមកវាបង្ក្រាប ឬចាប់តំណាងអ្នកដឹកនាំនាពេលកន្លងមក។ លោកក៏បង្ហាញថា កុំឲ្យសាលា​ខណ្ឌមានការព្រួយបារម្ភចំពោះការហែរដាក់ញតិទាំងនោះ ព្រោះវាមិនបណ្តាលឲ្យមានការកកស្ទះឡើយ ឲ្យតែ​ខាង​ខណ្ឌកុំមកធ្វើការរារាំង និងជួយសម្រួលនោះវានឹងចប់ ហើយគ្មានរឿងអ្វីកើតឡើងនោះទេ។ «យើងបំបែកគ្នាជា​ក្រុម​តូចៗ ដាក់ញតិទៅតាមស្ថានទូត ដោយឡែកៗពីគ្នា មានចំនួនតិច នោះមិនមានការស្ទះចរាចរឡើយ។ (…) ដល់​ពេលធ្វើកូដកម្មធំ យើងនឹងជូនដំណឹងតាមផ្លូវច្បាប់។»

ចំណែកលោក ស ម៉ូរ៉ា ប្រធានសហព័ន្ធសហជីពកម្មករចំណីអាហារ និង សេវាកម្មកម្ពុជា បានសារទចំពោះការមិន​ប្រើកម្លាំងអាជ្ញាធរមកធ្វើការរារាំង ឬរំខានក្នុងថ្ងៃនេះ។ លោកបានបញ្ជាក់យ៉ាងដូច្នេះថា «សូមបញ្ឈប់ជាបន្ទាន់​នូវ​អំពើហិង្សាទាំងឡាយ។ ព្រោះអំពើហិង្សាមិនមែនជាដំណោះស្រាយទេ។ យកបញ្ហាប្រជាពលរដ្ឋមកដោះស្រាយ នោះទើបជាដំណោះស្រាយ។»

សម្រាប់លោក ណៃ វ៉ង់ដា បានលើកឡើងថា អាជ្ញាធរចាប់ផ្តើមយល់ដឹង ក្នុងការអនុញ្ញាតិឲ្យមាន​ការបញ្ចេញនូវ​សិទ្ធិសេរីភាព ការតវ៉ា ការទាមទារ ពិសេសការស្នើសុំដោះលែងអ្នកទាំង២៣នាក់នេះ។ លោកថា «អាជ្ញាធរគួតែ​បន្ត​ឲ្យសេរីភាពក្នុងការជួបជុំ ការដាក់ញ្ញតិ (…) ការរារាំង ការវាយបង្ក្រាប មិនមែនជាដំណោះស្រាយ​ទេ។ (វា) ធ្វើឲ្យ​ប៉ះ​ពាល់សណ្តាប់ធ្នាប់សាធារណៈទៅវិញទេ។ តែប្រសិនជាអនុញាតិឲ្យធ្វើយ៉ាងរលូនចឹង នោះដំណើរការគ្មានបញ្ហា និងក៏បញ្ចប់ទៅយ៉ាងរលូន គ្មានការកកស្ទះចរាចរ គ្មានប៉ះពាល់ដល់សណ្តាប់ធ្នាប់សាធារណៈ។ តែបើមានការរារាំង ការបង្ក្រាប នោះវាធ្វើឲ្យមានភាពរញ៉េរញ៉ៃក្នុងសង្គមទៅវិញទេ។»

សូមបញ្ជាក់ថា ក្នុងថ្ងៃទី១០ ខែកុម្ភៈនេះ ក៏បានការដាក់ញតិនៅតាមបណ្តាខេត្តក្រុងមួយចំនួនក្នុងប្រទេសកម្ពុជា នឹងនៅតាមប្រទេសជាច្រើនទៀតក៏បានជួបជុំគ្នា ដើម្បីទាមទាឲ្យរដ្ឋាភិបាលដោះលែងអ្នកទាំង២៣នាក់ ដែលកំពុង​បន្តរជាប់ពន្ឋនាគារត្រពំាងផ្លុង(ម៣) ក្នុងខេត្តកំពង់ចាមក្នុងថ្ងៃទី១១ ខែកុម្ភៈស្អែកនេះ។ ជាមួយគ្នានេះក៏មានការ​ទាមទារឲ្យមានការតម្លើងប្រាក់ខែគោល ១៦០ដុល្លារក្នុងមួយខែ ដល់កម្មករទាំងអស់គ្រប់វិស័យ៕

--------------------------------------------------
ដោយ អ៊ុម វ៉ារី (ទំនាក់ទំនង៖ [email protected]) - ភ្នំពេញថ្ងៃទី១០ ខែកុម្ភៈ ឆ្នាំ២០១៤