ខ្លឹមសារ​ថ្ងៃ​៧មករា កាន់​តែ​«គ្មាន​ន័យ»​សម្រាប់​យុវជន​ថ្ងៃ​នេះ

ជារៀងរាល់ឆ្នាំ រដ្ឋាភិបាលកម្ពុជាបានយកថ្ងៃ៧មករា នេះជាថ្ងៃរំលឹក​ខួប​នៃកំណើតទី២ របស់ប្រជាជនកម្ពុជា​ដែល​​បាន​រងគ្រោះ​នៅក្នុងរបប​ខ្មែរ​ក្រហម។ មកទល់ថ្ងៃទី៧ ខែមករា ឆ្នាំ២០១៤ នេះ វាជាការរំលឹកខួប​លើកទី​៣៥។ តែ​ចំពោះ​ការគិត​របស់យុវជនមួយចំនួនយល់ថា ខ្លឹមសារថ្ងៃ៧មករា បានក្លាយជារឿង​ដ៏ចាស់​គម្រិល​មួយ និងដូចជា​​គ្មាន​ឥទ្ធិពល​អ្វីសោះ​ទៅលើ​ពួកគេ ដោយសារតែពួកគេ​ទាំងនោះយល់​ថា វាជាថ្ងៃរំលឹកខួប​​«វៀតណាម​ចូល​ស្រុក»។
ខ្លឹមសារ​ថ្ងៃ​៧មករា កាន់​តែ​«គ្មាន​ន័យ»​សម្រាប់​យុវជន​ថ្ងៃ​នេះ
កងទ័ពវៀតណាម អង្គុយនៅលើរថក្រោះ បរចូលទីក្រុងភ្នំពេញ នាឆ្នាំ១៩៧៩។ (រូបថត MONOROOM.info/ ឯកសារ)
Loading...
  • ដោយ: ប្រាថ្នា ([email protected]) - ភ្នំពេញ ថ្ងៃទី០៧ ខែមករា ឆ្នាំ២០១៤
  • កែប្រែចុងក្រោយ: January 08, 2014
  • ប្រធានបទ: រំលឹកខួប
  • អត្ថបទ: មានបញ្ហា?
  • មតិ-យោបល់

អតីតកាលនិងបច្ចុប្បន្ន - សំរាប់​ប្រជា​ពលរដ្ឋ​កម្ពុជា រួច​ផុត​ពី​របប​ខ្មែរ​ក្រហម​មួយ​ភាគ  បាន​បក​ស្រាយ​ថា ថ្ងៃ​រំដោះ​​៧មករា ​ជា​ថ្ងៃ​កំណើត​ទី​២​របស់​ខ្មែរ ដែល​ប្រជាជន​ខ្មែរ​គួរ​តែ​ដឹង​គុណ«សម្តេច»​ទាំង​បី និង​វៀតណាម ព្រោះ​​បើ​គ្មាន​​កងទ័ព​វៀតណាម​ទេ​នោះ កម្ពុជា​នឹង​គ្មាន​ថ្ងៃ​រួច​ផុត​ពី​របប​នេះ​ឡើយ។ យុវជន​មួយ​ចំនួន ដែល​គាំទ្រ​ថ្ងៃ​៧មករា ពួក​​គេ​សុទ្ធ​តែ​បាន​ដឹង​រឿង​ហេតុការណ៍ ក្នុង​សម័យ​កាល​នោះ តាម​រយៈ​ឪពុក​ម្ដាយ​របស់​ពួក​គេ ហើយ​ភាគ​ច្រើន​​ពី​ក្នុង​​នោះ បាន​ទទួល​ដឹង​គុណ​ថ្ងៃ​នេះ ដោយ​សារ​បាន​ជួយ​សង្គ្រោះ​ឪពុក​ម្ដាយ​របស់​ពួក​គាត់ និង​ប្រជាជន​កម្ពុជា។

កញ្ញា សុវណ្ណសា ដែល​ជា​គណនេយ្យករ​ម្នាក់ បាន​ថ្លែង​ឡើង​ថា «៧មករា មាន​សារៈ​សំខាន់ ខ្ញុំ​អរគុណ​ដល់​សម្តេច​​ទាំង​បី​ដែល​គាត់​បាន​ជួយ​ខ្មែរ អោយ​រួច​ផុត​ពី​របប​ប្រល័យ​ពូជ​សាសន៏ ហើយ​វា​ជា​កំណើត​ទី​ពីរ​របស់​យើង​ទាំង​អស់​គ្នា ក៏​ដូច​ជា​របស់​ម៉ាក់​ខ្ញុំ​ដែរ»។

ជំពាក់ដៃ សងដៃ មិនមែនត្រូវសងទាំងខ្លួន ហើយថែមអស់ទាំងពូជនោះទេ !

រីឯកញ្ញា ជា ម៉ានិត ជានិស្សិតនៃសាកលវិទ្យាល័យន័រតុន បានអះអាងថា ថ្ងៃ៧មករា ជាថ្ងៃដ៏ពិសេសសំរាប់​យើង​ទាំង​អស់គ្នា ហើយវាក៏នៅតែមាន​សារៈសំខាន់​សំរាប់កញ្ញា ព្រោះទាល់តែកងទ័ពវៀតណាមនេះមកជួយ ទើបអាចយក​ជ័យជំនះលើរបបខ្មែរក្រហមបាន។ តែកញ្ញាបានថ្លែងបន្ត ដោយ​ភាព​ប្រាកដនិយម​ថា «យើងគួរ​សងគុណ​ចំពោះ​វៀតណាម។ តែមិនមែនសងគុណ ដោយអោយពលរដ្ឋវៀតណាម មករស់នៅលើទឹកដីកម្ពុជា​ដោយស្រេច​តែចិត្ត​​នោះទេ។ រដ្ឋាភិបាលគួរ​តែចាត់វិធានការតឹ​ងរ៉ឹង ចំពោះការមករស់​ដោយគ្មានច្បាប់នេះ។»

សំរាប់យុវជនមួយចំនួន​ផ្សេងទៀត យល់ថា ថ្ងៃ៧មករា មិនមែនគ្រាន់តែជាការរំដោះប្រជាជនកម្ពុជាប៉ុណ្ណោះទេ តែ​វាជាមហិច្ឆតានយោបាយឈ្លានពាន របស់ប្រទេសវៀតណាម។ យុវជន ណៃ ឧត្តម និស្សិតមួយរូបឯកទេស​ខាង​សេដ្ឋកិច្ច នៃសាកលវិទ្យាល័យបញ្ញាសាស្រ្តកម្ពុជា បានបញ្ចេញទស្សនៈថា «បើតាមខ្ញុំសិក្សាតាមឯកសារ ថ្ងៃនេះ​មិនមែនជាថ្ងៃរំដោះទេ តែជាថ្ងៃដែលវៀតណាមឈ្លានពាន ហើយបើគ្មានអាមេរិកជួយទេនោះ ខ្មែរ​ប្រហែល​​ជា​រលាយ​នៅថ្ងៃនោះហើយ។»

និស្សិតខាងប្រវត្តិវិទ្យាមួយរូបទៀត មកពីសាកលវិទ្យាភូមិន្ទភ្នំពេញ កញ្ញា សុវណ្ណារ៉ា បាននិយាយដោយ​ច្បាស់ៗ​​​តែ​ម្ដងថា ថ្ងៃ៧មករា ជាថ្ងៃដែល​គណបក្ស​កាន់អំណាចឆ្លៀតឱកាស ដើម្បីកេងចំណេញ​ទឹកចិត្ត​ប្រជាជន សំរាប់​នយោបាយ​របស់គណបក្សនេះ។ កញ្ញាបានបកអាក្រាតថា «ថ្ងៃនេះដែរ ជាថ្ងៃដែល​ប្រជាជន​ខ្មែរ​​បាត់​បង់​នូវវត្ថុអ្វី​ផ្សេងៗ ហើយជាថ្ងៃដែលវៀតណាម ចូលវាតទីឈ្លានពានទឹកដីកម្ពុជាយើង។»

មិនខុសគ្នាប៉ុន្មានឡើយ យុវជនភាគច្រើនដែលប្រើប្រាស់បណ្តាញទំនាក់ទំនងសង្គមហ្វេសប៊ុក សំរាប់បញ្ចេញ​យោបល់នោះ ក៏បានបញ្ចេញទស្សនៈ​ផ្សេងៗ ទៅតាមការយល់ឃើញរបស់ពួកគេដែរ។ យុវតីមួយរូបដាក់​រហស្សនាម​ថា ហាន់នី យ៉ាយ៉ា (Honie Yaya)  បានសរសេរនៅក្នុង​ទំព័រហ្វេសប៊ុក​របស់ខ្លួន រិះគន់ថ្ងៃ៧មការ យ៉ាងជូរចត់ថា «៣៥ឆ្នាំហើយ ដែលយួនបានចូលមកទឹកដីខ្មែរ ហើយបានជិះជាន់រាស្រ្តខ្មែរគ្រប់រូប ឲ្យ​រស់​នៅ​ពោរពេញ​ដោយ​ទុក្ខ វេទនាគ្រប់បែបយ៉ាង»។

ម្ចាស់ទំព័រហ្វេសប៊ុកមួយទៀត ឈ្មោះថា ឌី ឡាង (Dy Lang) ដែលបានផ្សាយរូបភាពមួយចំនួន ដែលមាន​សរសេរ​​អក្សរដោយដៃ បង្ហើរន័យឌឺដង​ចំពោះ​ថ្ងៃ ៧មករា ទៅកាន់កងទ័ពរំដោះរបស់វៀតណាមថា «សូម​អគុណ​ដែល​កង​ទ័ពយួន ដែលបានរំដោះខ្មែរអោយផុតពីរបបខ្មែរក្រហម ហើយដែល​បាន​បំផ្លាញ​​ព្រៃឈើ​ខ្មែរ បានដកហួត​ធន​ធាន​ធម្មជាតិខ្មែរ និងដែលបានផ្តល់ឱកាសអោយពលរដ្ឋយួន ក្លាយជារដ្ឋមន្រ្តីមុខងារ​សាធារណៈ និងមន្រ្តី​​នយោបាយ​ក្នុងស្ថាប័នរដ្ឋ ដែលធ្វើអោយខ្មែរមានអំណាចប្រមូលផ្តុំ និងអំពើពុករលួយ»។

យុវជន ឌី ឡាង បានអោយទស្សនាវដ្ដីមនោរម្យ.អាំងហ្វូ ដឹងបន្ថែមទៀតថា «៧មករា វាជាលទ្ធផលវិជ្ជមាន​មួយ តែក្រោយពី៧មករាហើយ វាមាន​ខ្លឹមសារ​អី្វ តើវាអាចប្រជាជនខ្មែររស់នៅដោយសមរម្យ ដោយយុត្តិធម៌ មាន​សុខ​សន្តិភាពពេញលេញហើយឬនៅ? ម្យ៉ាងទៀតហេតុអ្វីក៏រដ្ឋាភិបាលអាមេរិក បារាំង ជប៉ុនគេផ្តល់ជំនួយ​សំរាប់​កាត់​ទោស​មេដឹកនាំខ្មែរក្រហម ហើយចុះហេតុអ្វីរដ្ឋាភិបាលវៀតណាម និងចិនមិនផ្តល់ជំនួយ?»

ទាក់ទងនឹងជំនួយបែបនេះ គេពិបាកនឹងរកចម្លើយឲ្យត្រឹមត្រូវណាស់ ជាពិសេសពេលដែលវៀតណាម  បាន​នាំ​ទ័ព​ចូលកម្ពុជា ដែលជាប្រទេស​មាន​អធិបតេយ្យ​កាល​ពីឆ្នាំ​១៩៧៩នោះ ក៏ស្ថិតនៅក្រោមលេសថា​«ជួយ»ដែរ។ ហេតុ​នេះ​ហើយ ទើបកញ្ញា សុវណ្ណារ៉ា បានបកអាក្រាតទៀតថា «ការជួយ​របស់​កងទ័ព​វៀតណាម មិនមែនជា​ការជួយ​ដោយ​​សុទ្ធ​ចិត្ត​ទេ។ តែជាការជួយ ដើម្បីចង់បានអ្វីផ្សេង។ ធម្មតាគ្មានអ្នកណាដែលជួយ គ្មានចង់បាន​សំណង​មក​វិញទេ មក​ពីគេ​ចង់បានអ្វីមួយពីយើង ទើបគេជួយយើង។ ហើយវៀតណាមគេបានសំលឹង​ឃើញ​អ្វី​មួយ ដែល​សំខាន់​ពី​យើង​ហើយ ទើបគេហ៊ាន​ចំណាយ​តាំង​ពី​កងទ័ព និងថវិការមកជួយយើង។»៕

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...