នៅមន្ទីរប៉ង់តាហ្គោន បុគ្គលិកអាចកាន់«គ្រាប់បែក»ចូលធ្វើការបាន!
គ្មានបញ្ហាទេ បើអ្នកចង់យកគ្រាប់បែកជាប់នឹងខ្លួន ចូលទៅធ្វើការនៅក្នុងមន្ទីរប៉ង់តាហ្គោន (Pentagone - ក្រសួងការពារជាតិអាមេរិក) អ្នកគ្រាន់តែបំពេញសំនុំបែបបទបន្តិចទៅ អ្វីៗនឹងរួចរាល់ហើយ។ លោក ស្ទីវេន ខាវើរី (Steven Calvery) នាយកងរក្សាសន្តិសុខ ឲ្យអាគារដែលល្បីពេញពិភពលោក ថាស្ថិតក្រោមការឃ្លាំមើលសុវត្ថិភាពយ៉ាងខ្លាំងបំផុតនោះ បានបង្កើតឲ្យមានការបំពេញបែបបទនេះ ក្រោយបន្ទាប់ពីមានហេតុការណ៍មួយបានកើតឡើង កាលពីខែមុន។
មន្ទីរប៉ង់តាហ្គោន ឬ ក្រសួងការពារជាតិអាមេរិក។ (រូបថត Wikipedia.org)
ចម្លែកនៅអាមេរិក - កាលពីថ្ងៃ១៩ខែវិច្ឆិកាកន្លងទៅ បុគ្គលិកស៊ីវិលមួយរូបបម្រើការឲ្យមន្ទីរប៉ង់តាហ្គោននេះ ត្រូវបានចាប់ឃាត់ខ្លួន នៅតាមច្រកចូល នៅខណៈពេលដែលបុរសនេះ បានព្យាយាមចូលទៅក្នុងអាគារ ដោយនាំយកទៅជាមួយ នូវគ្រាប់បែកឆ្នៃមួយគ្រាប់។ តាមពិតទៅ គ្រាប់បែកនោះមិនអាចបង្កគ្រោះថ្នាក់អ្វីទេ ព្រោះជាគ្រាប់បែកធ្វើឲ្យដៃគ្មានជាតិផ្ទុះ ឬហៅថាគ្រាប់បែកស្អុយតែប៉ុណ្ណោះ ហើយបុរសនោះមានបំណង ចង់យកវាមកបង្ហាញ តាមការបញ្ជារបស់អ្នកទទួលខុសត្រូវជាន់ខ្ពស់ក្នុងស្ថាប័ននេះ។
បុគ្គលិកស៊ីវិលរូបនេះ ដែលបានភ្លេចសុំការអនុញ្ញាតដោយលាយលក្ខណ៍អក្សរ ហើយធ្វើឲ្យគេឃាត់ខ្លួននៅនឹងច្រកចូលនោះ ត្រូវបានអនុញ្ញាតនៅទីបំផុត ឲ្យចូលទៅក្នុងអាគារ បន្ទាប់ពីមានទូរស័ព្ទអន្តរាគមន៍ និងធ្វើការផ្ទៀងផ្ទាត់មួយចំនួនមក។
ចាប់ពីពេលនោះមក លោក ស្ទីវេន ខាវើរី បានកំណត់ឲ្យមាន«និតិវិធី»តឹងរ៉ឹង សម្រាប់បុគ្គលិណាក៏ដោយ ដែលចង់នាំយកអាវុធមិនដំណើរការ ឬគ្រាប់បែកស្អុយចូលទៅក្នុងបរិវេណអាគារ។ លោកបានសរសេរ នៅក្នុងសេចក្ដីប្រកាសព័ត៌មានមួយថា «វាសំខាន់ណាស់ ដែលត្រូវប្រកាសដល់បុគ្គលិកទាំងអស់ ឲ្យដឹងពី"និតិវិធី សុំការអនុញ្ញាត" ជាលាយលក្ខណ៍អក្សរជាមុន ដើម្បីអាចនាំចូលទៅក្នុងអាគារនូវវត្ថុទាំងនេះ ទៅកន្លែងធ្វើការ»។
ការឆែកឆេរដ៏ភ្ញាក់ផ្អើលមួយ កាលពីខែវិច្ឆិកាដដែលនេះ កងរក្សសន្តិសុខអាគារ បានរកឃើញនិងបានចាប់ទុក នូវកាំបិតចំនួន២១ គ្រាប់បែកស្អុយ៧គ្រាប់ និងគ្រាប់កាំភ្លើង៥បង់ ដែលបុគ្គលិកបានដាក់មកជាប់នឹងខ្លួន។ ចំណាត់ការឆែកឆេរនោះ បាននាំទៅដល់ការឃាត់ខ្លួនបុគ្គលិកស៊ីវិលម្នាក់ថែមទៀត ធ្វើការឲ្យបញ្ជាការដ្ឋានកងទ័ពជើងគោកអាមេរិក ខណៈពេលបុគ្គលិករូបនោះ មាន«គ្រឿងញៀន»ដាក់នៅជាប់នឹងខ្លួន។
ប៉ុន្តែបើបានបំពេញសំនុំបែបបទ «សុំអនុញ្ញាត»ហើយ នោះនឹងគ្មានបញ្ហាអ្វីទាំងអស់។ នេះបើតាមការបញ្ជាក់ របស់លោក ស្ទីវេនដដែល។ លោកបានបន្ថែមទៀតថា «វាមិនមែនជារឿងខុសធម្មតាទេ ដែលអ្នកទាំងនេះយកកាំភ្លើងខ្លី ឬកាំភ្លើងបាញ់ម្ដងបានមួយគ្រាប់ ចូលទៅក្នុងកម្មវិធីអ្វីមួយ ឬសម្រាប់ជូនជាអំណោយទៅឲ្យគ្នានោះ»៕
--------------------------------------------------
ដោយ ៖ ឈូករ័ត្ន - ប៉ារីស ថ្ងៃទី០៤ ខែធ្នូ ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ