លោក ហ្សង់ ហ្វ្រង់ស៊័រ កូតាំង (Jean Francois Cautain) ឯកអគ្គរដ្ឋទូតសហភាពអ៊ឺរ៉ុបប្រចាំប្រទេសកម្ពុជា បាន​បង្ហាញពីភាពមិនច្បាស់លាស់នៃ «មន្រ្តីរាជការស៊ីវិល» ដែលទទួលបានប្រាក់បៀរវត្សពីរាជការ ពីពលរដ្ឋ​ តែបែរ​ជា​មិនយល់ច្បាស់ ពីការទទួល​ខុសត្រូវក្នុងការងាររបស់ខ្លួនទៅវិញ។ លោកបានថ្លែងឡើងថា សេចក្តី​ព្រាង​ច្បាប់ ស្តី​ពី​សិទ្ធិទទួលបានព័ត៌មាននេះ មានសារៈសំខាន់ណាស់ សម្រាប់ប្រទេសកម្ពុជា ដើម្បីជម្រុញឲ្យមន្ត្រីទាំងនោះ មាន​ការទទួលខុសត្រូវក្នុងភារកិច្ចរបស់ខ្លួន។

លោក ហ្សង់ ហ្វ្រង់ស៊័រ កង់តាំង ឯកអគ្គរដ្ឋទូតសហភាពអ៊ឺរ៉ុប ថ្លែងក្នុងសិក្ខាសាលានៅថ្ងៃទី០៤ខែធ្នូឆ្នាំ២០១៣ ក្នុងសណ្ឋាគារអ៊ីនធើខន។ (រូបថត MONOROOM.info/ O. Vary)

សេរីភាពផ្នែកព័ត៌មាន - ថ្លែងក្នុងសិក្ខាសាលារយៈពេលពីរថ្ងៃ នៅសណ្ឋាគារអ៊ីនធើខន ស្ដីពី«សិទ្ធិទទួលបាន​ព័ត៌មាន»​នៅកម្ពុជា ថ្ងៃទី០៤ខែធ្នូ ឆ្នាំ២០១៣នេះ លោកហ្សង់ ហ្វ្រង់ស៊័រ កូតាំង បានបញ្ជាក់ថា «ការទទួលបាន​ព័ត៌មានដោយតម្លាភាព ជាធាតុផ្សំយ៉ាងសំខាន់ ធ្វើឲ្យរដ្ឋាភិបាល និងមន្រ្តីរាជការទទួលខុសត្រូវ ចំពោះមុខ​ប្រជា​ពលរដ្ឋ»។ លោកលើកឡើងថា សិទ្ធិទទួលបានព័ត៌មាន នឹងអាចធ្វើឲ្យរដ្ឋាភិបាលធ្វើការបង្ហាញនូវតម្លាភាព ពិសេស​ទៅលើការចំណាយនៃថវិការជាតិ មើលឃើញថាមានសារៈសំខាន់បំផុត។ លោកបានភ្ជាប់បញ្ហានេះ​រវាងរដ្ឋាភិបាល​កម្ពុជា ជាមួយនឹង អាជ្ញាធរមូលដ្ឋានសម្រាប់ការអនុវត្តនូវវិមជ្ឈការ និងវិសហមជ្ឈការ ដែលអាចធ្វើឲ្យអ្នកមូលដ្ឋាន ទទួលបាននូវព័ត៌មាន ដែលជាសារៈសំខាន់ ក្នុងការកំណែទម្រង់បញ្ហាទាំងពីរ (វិមជ្ឈការ និងវិសហមជ្ឈការ) នេះ។ លោកបានចាត់ទុកថា ច្បាប់ស្តីពីការទទួលបានព័ត៌មាន មានសារៈសំខាន់ដែលធ្វើឲ្យប្រជាពលរដ្ឋ មានសិទ្ធិ​ក្នុងការ​ស្នើសុំ។

ទស្សនាវដ្តីមនោរម្យព័រអាំងហ្វូ  មិនអាចទាក់ទងមន្រ្តីនៃក្រសួងព័ត៌មានបានទេ ក្នុងល្ងាចនេះ។ ប៉ុន្តែពាក់ព័ន្ធ​នឹង​សិទ្ធិទទួលបានព័ត៌មាន កន្លងមកលោកនាយករដ្ឋមន្រ្តី ហ៊ុនសែន បានឲ្យរដ្ឋាភិបាលថ្នាក់ក្រោម និងស្ថាប័ន​សាធារណៈដែលពាក់ព័ន្ធឲ្យអនុវត្តសេចក្តីប្រកាសអន្តរក្រសូង ស្តីពីការបង្កើតមន្រ្តី និងអ្នកនាំពាក់ព័ត៌មាន​ប្រចាំ​ក្រសួង ស្ថាប័ននីមួយៗ ចុះថ្ងៃទី២៦ ខែកក្កដា ឆ្នាំ២០១២ រវាងរដ្ឋមន្រ្តីក្រសួងមហាផ្ទៃ និងរដ្ឋមន្រ្តីក្រសូងព័ត៌មាន។ លោកនាយករដ្ឋមន្រ្តី ហ៊ុន សែន កាលថ្ងៃទី៨ ខែវិច្ឆិកា ឆ្នាំ២០១៣កន្លងទៅ បានតម្រូវឲ្យ​ក្រសួង​ព័ត៌មាន​ជាអ្នកជំរុញ និងនាំមុខ ជាមួយនឹងដៃគូរពាក់ព័ន្ធមួយចំនួនទៀត រៀបចំធ្វើការអភិវឌ្ឍន៍នៃ​សេចក្តីព្រាង​ច្បាប់ស្តីពី​«សិទ្ធិទទួល​បានព័ត៌មាន»នេះ ដែលនឹងត្រូវអនុម័តនាពេលខាងមុខ។

ឯលោក សុន ឆ័យ មកពីគណបក្សសង្គ្រោះជាតិ លោកបានបញ្ជាក់ថា លោកនឹងមិនមានការសង្ឃឹមទុកជាមុន ក្នុង​ពេលដែលច្បាប់នេះដាក់ចូលទៅរដ្ឋសភាជាតិ ដែលមានតំណាងរាស្រ្តមកពីគណបក្សប្រជាជនកម្ពុជា តែមួយ​ដូច្នេះ​នោះឡើយ។ លោកបានបញ្ជាក់យ៉ាដូច្នេះថា «ខ្ញុំមិនដឹងថា តើវានឹងទៅជាយ៉ាងណាទេ តែយើងនឹងចូលរួមឲ្យបាន​ជាអតិបរមា ដើម្បីជំរុញយ៉ាងណាឲ្យសេចក្តីព្រាងច្បាប់នេះ រៀបចំទៅឲ្យមានគុណភាព។ យើងមិនដឹងថាប៉ុន្មានខែ​ទៀត ការអនុម័តនោះនឹងមានភាពប្រែប្រួលយ៉ាងណានោះទេ។»

សូមរម្លឹកថា «សេចក្តីព្រាងច្បាប់ស្តីបីសិទ្ធិទទួលបានព័ត៌មាន»នេះ អំឡុងឆ្នាំ២០០៤ ទីស្តីការគណរដ្ឋមន្រ្តី បាន​ប្រគល់​សិទ្ធិឲ្យទៅក្រសួងទំនាក់ទំនង​ជាមួយរដ្ឋសភា-ព្រឹទ្ធសភា និងអធិការកិច្ចក្នុងការបង្កើតសេចក្តី​ព្រាងគោល​នយោបាយរដ្ឋាភិបាលស្តីបីសិទ្ធិទទួលបានព័ត៌មាន។ សេចក្តីព្រាងគោលនយោបាយ​រដ្ឋាភិបាលស្តីពីសិទ្ធិទទួល​បានព័ត៌មាននេះ ក៏ត្រូវបានបញ្ចប់នៅចុងខែសីហា ឆ្នាំ២០០៧។ នៅថ្ងៃទី២៣ ខែធ្នូ ឆ្នាំ២០១០ គណបក្សសម រស្ស៊ី ក៏បានដាក់សំណើរលើកជាលើកដំបូង និងនៅថ្ងៃទី០១ ខែមិនា ឆ្នាំ២០១២ បានដាក់ជាលើកទីពីរ​ទៅកាន់រដ្ឋសភា​ជាតិ ដើម្បីស្នើសុំអនុម័តលើសេចក្តីព្រាងច្បាប់ ស្តីពីសិទ្ធិទទួលបានព័ត៌មាននេះ តែសំណើរទាំងនោះ​ត្រូវបាន​ច្រាន​ចោលដោយរដ្ឋសភា។ នេះបើយោងតាមឯកសារទស្សនាទាន របស់ វិទ្យាស្ថានតស៊ូមតិ និងគោលនយោបាយ (API) ចេញផ្សាយនៅថ្ងៃទី៤ ខែធ្នូ ឆ្នាំ២០១៣៕

---------------------------------------------------------
ដោយៈ អ៊ុម វ៉ារី - ភ្នំពេញថ្ងៃទី៤ ធ្នូ ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ