ក្រុមបាតុករប្រឆាំងនឹងនាយករដ្ឋមន្ត្រីថៃ លោកស្រី យីងឡាក់ បានសម្រុកចូលទៅកាន់កាប់ទីស្ដីការនាយករដ្ឋមន្ត្រី នៅថ្ងៃអង្គារទី៣ ខែវិច្ឆិកា នេះ ដោយគ្មានការទប់ស្កាត់អ្វីទាំងអស់ និងទំនងជាមានការអនុញ្ញាតផង ពីសំណាក់​កង​កម្លាំងនគរបាល។ អ្នកតាមដានសភាពការណ៍បាននិយាយថា នេះអាចជាកាយវិការមួយ ដែលរដ្ឋាភិបាលលោកស្រី យីងឡាក់ បានធ្វើដើម្បីឲ្យសភាពការណ៍ត្រឡប់មកភាពស្ងប់ស្ងៀមវិញ នៅមុនចម្រើនព្រះជន្ម នៃព្រះមហាក្សត្រថៃ ដែលត្រូវបានចាត់ទុក ជា«អាទិទេព»នៅក្នុងប្រទេសនេះ។

ក្រុមបាតុករនៅមុខទីស្ដីការនាយករដ្ឋមន្ត្រីថៃ កណ្ដាលទីក្រងុបាងកក។ (រូបថត Reuters)

នយោបាយថៃ - បាតុករជាច្រើនពាន់នាក់ ត្រូវបានអនុញ្ញាតឲ្យចូលទៅកាន់កាប់ «មួយរយៈពេលខ្លី» នូវវិមាន​រដ្ឋាភិបាល នៅថ្ងៃអង្គារនេះ។ កងកម្លាំងនគរបាល ត្រូវបានរដ្ឋាភិបាលបញ្ជាមិនឲ្យមានសកម្មតបតរ ឬទប់ស្កាត់​អ្វី​ទាំងអស់ ប្រឆាំងនឹងក្រុមបាតុករទាំងនេះ។ អាជ្ញាធរទំនងជាចង់ទប់សភាពការណ៍ ឲ្យត្រឡប់មករកភាពស្ងប់ស្ងាត់​វិញ នៅមុនបុណ្យចម្រើនព្រះជន្ម នៃព្រះមហាក្សត្រ«អាទិទេ» បន្ទាប់ពីការរំជើបរំជួលជាងមួយខែមួយ នៃការធ្វើ​បាតុកម្មចង់ផ្ដួលរំលំរដ្ឋាភិបាល លោកស្រីយីងឡាក់ ស៊ីណាវ៉ាត្រា។

ឧបនាយករដ្ឋមន្ត្រីថ្ងៃ លោក ស៊ូរ៉ាពង្ស តូវីចាក់ចៃគល់ (Surapong Tovichakchaikul) បានបញ្ជាក់ថា «វាជាការ​បង្កើត​ឲ្យមានបរិយាកាសល្អ ដើម្បីឲ្យរាជពិធីបុណ្យចម្រើនព្រះជន្ម ព្រះមហាក្សត្រ អាចប្រព្រឹត្តិទៅ ដោយភាព​ថ្លៃថ្លា»។ សូម​បញ្ជាក់ថា នៅក្នុងរបបរាជានិយមអាស្រ័យរដ្ឋធម្មនុញ្ញ នៃប្រទេសថៃ ព្រះមហាក្សត្រ ភូវិបុល ដែល​នឹង​មាន​ព្រះជន្ម​៨៦ព្រះវស្សានេះ ត្រូវបានចាត់ទុកដូចជា «ព្រះអាទិទេព»ដូច្នេះ។

បន្ទាប់ពីបានឡោមព័ទ្ធសង្កាត់រដ្ឋបាលនៃរដ្ឋាភិបាលថៃ តាំងពីច្រើនថ្ងៃមកហើយ ក្រុមបាតុករបានសម្រេចបាន នូវការឆ្លងកាត់រនាំងបេតុងជាច្រើន ចូលទៅកាត់ទីលាននៃទីស្ដីការនាយករដ្ឋមន្ត្រី។ ពួកគេបានដើរកំសាន្ដ ថតរូប និងបានញញឹមញញែមចាប់ដៃនគរបាល ដែលឈរយាមនៅទីនោះ។ បន្ទាប់មក ក្រុមបាតុករបានដើរចេញ ត្រឡប់ទីវិញដោយខ្លួនឯង។

ក្រុមមេដឹកនាំបាតុករ ជាពិសេសលោក ស៊ូថេប ថោងស៊ូបាន បានប្រកាសថាជាជ័យជំនះ តែមិនបាន​ទម្លាក់ចោល​ការតស៊ូតទៅទៀតនោះទេ។ លោកបានអំពាវនាវ ទៅកាន់បាតុករ ដើម្បីធ្វើការតស៊ូជាបន្តទៀត រហូតដល់​នាយក​រដ្ឋមន្ត្រី យីងឡាក់ លាលែងចេញពីតំណែង។ ប៉ុន្តែការអំពាវនាវនេះ បានធ្វើទៅកាន់ចលនាបាតុកម្ម ដែលកាន់តែ​ថមថយកម្លាំង ពី១សែន៥ម៉ឺននាក់ កាលពីដើមសប្ដាហ៍មុន មកត្រឹមតែ៣ម៉ឺន៥សែននាក់ នៅចុងសប្ដាហ៍មុននេះ បន្ទាប់ពីការចុះតាមដងផ្លូវ អស់រយៈពេលជាងមួយខែមកហើយ។ នេះបើតាមតួលេខប្រកាសឲ្យដឹង របស់នគរបាល​ជាតិថៃ។

ពួកគេបានបានទាមទារឲ្យទម្លាក់ចោល នូវរដ្ឋាភិបាលរបស់នាយករដ្ឋមន្ត្រីលោកស្រី យីងឡាក់ ស៊ីណាវ៉ាត្រា ដែល​ពួកគេបានចោទប្រកាន់ថា ស្ថិតនៅក្រោមខ្សែញាក់របស់ លោក ថាក់ស៊ីន ស៊ីណាវ៉ាត្រា បងប្រុសរបស់នាយក​រដ្ឋមន្ត្រី​បច្ចុប្បន្ន។ លោក ថាក់ស៊ីន ដែលត្រូវបានបណ្ដេញចេញពីអំណាច ដោយសាររដ្ឋប្រហារយោធាមួយ ក្នុងឆ្នាំ​២០០៦ ហើយបានរស់នៅដោយភៀសខ្លួនទៅក្រៅប្រទេស ដើម្បីគេចចេញពីការផ្ដន្ទាទេស នៃប្រព័ន្ធយុត្តិធម៌ថៃ រហូតមក​ទល់បច្ចុប្បន្ន៕

------------------------------------------------
ដោយ ៖ កេសរកូល - ភ្នំពេញ ថ្ងៃទី០៣ ខែធ្នូ ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ