បន្ទាប់ពីគណបក្សសង្រ្គោះជាតិ បានបង្ហាញគោលជំហរធ្វើមហាបាតុកម្មអហិង្សាទ្រង់ទ្រាយធំជាថ្មី និងអាចបិទផ្លូវចរចា ជា​មួយគណបក្សប្រជាជនកម្ពុជា ទាក់ទងនឹងការជាប់គាំងនយោបាយក្រោយការបោះឆ្នោតនោះមក អ្នកនាំពាក្យ​រដ្ឋាភិបាល​កម្ពុជាបានលើកឡើងថា ការចរចាគឺជារឿងដែលគណបក្សសង្រ្គោះជាតិ ត្រូវធ្វើជាមួយគណបក្សប្រជាជនកម្ពុជា នៅ​រដ្ឋសភា ដោយឡែកគម្រោងធ្វើមហាបាតុកម្មរបស់គណបក្សនេះ វាគឺជាសិទ្ធិដែលមានកំណត់ក្នុងច្បាប់ តែរដ្ឋាភិបាល​នឹង​តាមដានពិនិត្យមើល ដោយមិនអនុញ្ញាតឲ្យគណបក្សជំទាស់មួយនេះ យកច្បាប់មកទ្រាប់គូថអង្គុយបានទេ។

លោក សម រង្ស៊ី (កណ្ដាលស្ដាំ) និងលោក កឹម សុខា (កណ្ដាលឆ្វេង) កាន់ទង់ជាតិចម្រុះ ដឹកនាំបាតុកម្មដង្ហែញត្តិ​ទៅដាក់​តាមស្ថានទូត។ (រូបថត គណបក្ស)

បាតុកម្មបក្សប្រឆាំង - អ្នកនាំពាក្យរដ្ឋាភិបាលកម្ពុជា លោក ផៃ ស៊ីផាន បានថ្លែងប្រាប់ទស្សនាវដ្តីមនោរម្យព័ងអាំងហ្វូ នៅ​ថ្ងៃទី១៩ ខែវិច្ឆិកា ឆ្នាំ២០១៣នេះថា៖ «ការចរចាមិនពាក់ព័ន្ធនឹងរដ្ឋាភិបាលទេ វាជារឿងរវាងគណបក្ស និងគណបក្ស គេ​ត្រូវ​ញែកឲ្យដាច់ពីគ្នា ការដោះស្រាយនយោបាយគឺជារឿងត្រូវធ្វើនៅរដ្ឋសភា មិនអាចយកច្បាប់មកទ្រាប់គូថអង្គុយបានទេ រដ្ឋាភិបាលនឹងមើលថាតើ មហាបាតុកម្ម ឬបាតុកម្មយក្សគឺជារឿងយ៉ាងម៉េច? តែអ្វីៗត្រូវស្ថិតនៅក្រោមច្បាប់ ច្បាប់បានផ្តល់​សិទ្ធិឲ្យទាំងអ្នកធ្វើបាតុកម្ម និងសិទ្ធិសាធារណៈត្រូវទទួលបានសណ្តាប់ធ្នាប់ និងការគាំពារ ផ្លូវជារបស់សាធារណៈ មិនមែន​របស់គណបក្សនយោបាយ ហើយមិនត្រូវយកផ្លូវធ្វើជាឧបករណ៍គម្រាមកំហែងណាមួយទេ គ្រប់ភាគីត្រូវមានកាតព្វកិច្ច​គោរពច្បាប់»។

នៅពេលសួរថា ប្រសិនបើមហាបាតុកម្មអហិង្សារបស់គណបក្សសង្រ្គោះជាតិ អាចរាលដាលដល់កម្រិត​ផ្តួលរំលំ​រដ្ឋាភិបាល តើរដ្ឋាភិបាលនឹងត្រូវធ្វើដូចម្តេច? លោក ផៃ ស៊ីផាន បានឆ្លើយថា នោះគឺជាបំណងរបស់គណបក្សសង្រ្គោះជាតិ សម្រេច​ឈប់ធ្វើនយោបាយ ព្រោះកម្ពុជាជាប្រទេសលិទ្ធិប្រជាធិបតេយ្យអាស្រ័យដោយច្បាប់ ដូច្នេះការប៉ុនប៉ងណាមួយ ដើម្បី​ទម្លាក់​រដ្ឋាភិបាលក្រោយការបោះឆ្នោត គឺជាសកម្មភាពរបស់ពួកឧទ្ទាមខុសច្បាប់។ លោក ផៃ ស៊ីផាន បានបន្ថែមថា សកម្មភាព និងចលនាទាំងនោះ មិនបានស្ថិតនៅក្នុងរង្វង់ដែលត្រូវការពារដោយច្បាប់នោះទេ ដូច្នេះរដ្ឋាភិបាលនឹងចាត់​វិធានការសមស្រប ដែលផ្តល់ឲ្យដោយច្បាប់ ដើម្បីគ្រប់គ្រងបញ្ហាទាំងនោះ។

សូមរម្លឹកថា លោក កឹម សុខា អនុប្រធានគណបក្សសង្រ្គោះជាតិ បានថ្លែងប្រាប់វិទ្យុសម្លេងសហរដ្ឋអាមេរិក (ផ្សាយជា​ខេមរភាសារ) នៅថ្ងៃទី១៨ ខែវិច្ឆិកា ឆ្នាំ២០១៣ ថាគណបក្សសង្រ្គោះជាតិ កំពុងរៀបចំយុទ្ធសាស្រ្ត​ធ្វើមហាបាតុកម្មអហិង្សា​ជាថ្មី ចាប់ផ្តើមនៅថ្ងៃទី១០ ខែធ្នូ ឆ្នាំ២០១៣ ដែលអាចមានរយៈពេលយូរ និងមានទ្រង់ទ្រាយធំជាងលើកមុនៗ ដើម្បី​ទាមទារឲ្យមានការគោរពសិទ្ធិមនុស្ស ជាពិសេសលើសេចក្តីសម្រេចរបស់ប្រជាពលរដ្ឋខ្មែរ គឺសិទ្ធិបោះឆ្នោតហ្នឹងឯង។ អនុប្រធានគណបក្សជំទាស់ដដែលនេះ បញ្ជាក់ថា៖ «ខ្ញុំឃើញថាការវិវត្តរបស់ប្រជាពលរដ្ឋបានផ្លាស់ប្តូរ ហើយនៅតែអ្នក​កាន់​អំណាចដែលក្រាញអំណាចទេ ដែលអត់ទាន់ផ្លាស់ប្តូរផ្នត់គំនិត។ ប៉ុន្តែខ្ញុំសង្ឃឹមថាថ្ងៃណាមួយប្រជាពលរដ្ឋ នឹង​ទាមទារអ្នកកាន់អំណាចផ្តាច់ការផ្លាស់ប្តូរជាមិនខាន»។

គណបក្សសង្រ្គោះជាតិបានធ្វើការតវ៉ា និងចរចាជាមួយគណបក្សប្រជាជនកម្ពុជាជាបន្តបន្ទាប់ ដើម្បីទម្លុះទម្លាយ​ភាពទាល់​ច្រកនយោបាយ ក្រោយការបោះឆ្នោតដ៏ចម្រូងចម្រាសនេះ។ តែរហូតមកដល់ពេលនេះ បញ្ហាទាំងនេះនៅតែមិនអាច​ដោះ​ស្រាយរួច បើទោះជាមានការដាក់សំពាធពីសហគមន៍អន្តរជាតិ លើគណបក្សនយោបាយទាំងពីរឲ្យចូលតុចរចា ដោះ​ស្រាយបញ្ហាដោយសន្តិវិធីក៏ដោយ។

ជុំវិញករណីនេះ លោក សម រង្ស៊ី ប្រធាគណបក្សសង្រ្គោះជាតិ បានលើកឡើងកាលពីពេលថ្មីនេះថា៖ «យើងត្រូវរកខុស​រក​ត្រូវ យកអំណាចមក ដោយយើងមាននីតិវិធីរបស់វា។ យើងធ្វើអ្វីៗ ដោយសន្តិវិធី។ សន្តិវិធី អហិង្សា។ ផ្លូវមានតែពីរទេ គឺ មួយជជែកគ្នា ឬមួយវ៉ៃគ្នា។ ចំពោះគណបក្សសង្គ្រោះជាតិ ជំហររបស់យើង អហិង្សា ដោយសន្តិវិធី។ គឺយើងមិនត្រូវឲ្យ​មានការបង្ហូរឈាម។ យើងក៏ត្រូវជៀសវាងការបាញ់សម្លាប់។ យើងត្រូវរក្សាកម្លាំងរបស់យើង ទុកកសាងប្រទេស៕»

---------------------------------------
ដោយ៖ អ៊ុំ បូរី - ថ្ងៃទី១៩ ខែវិច្ឆិកា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ