ម្ចាស់សណ្ឋាគារមួយនៅទីរួមខេត្តសៀមរាប លោករូដដូហ្វ៍ ខេ (Rudolf K.) មកពីទីក្រុង ប៊ីយ៉ែន (Bienne) បានជាប់​ចោទ​ពីបទ​មានទំនាក់ទំនងផ្លូវភេទ ជាមួយអនិតិជន ហើយត្រូវបានអាជ្ញាធរកម្ពុជាចាប់ឃាត់ខ្លួនកាលពីថ្ងៃព្រហស្បត្តិ៍។ បើ​តាម​អង្គការសង្គមស៊ីវិលមួយ ដែលធ្វើការស្និតនឹងករណីនេះ បាននិយាយថា ជាករណីមួយដែលបានកើតឡើងដដែលៗ និង​ជាច្រើនដង ជាមួយម្ចាស់សណ្ឋាគាររូបនេះ។

កុមារកម្ពុជា មិនមែនជាត្រីដែលគេអាចបង់សំណាញ់ យកមកទទួលទានស្រេចនឹងចិត្តនោះទេ។ (រូបថត APLE)

រាជធានីភ្នំពេញ - ថ្ងៃព្រហស្បត្តិ៍ទី៣១ខែតុលាកន្លងមកនេះ ជាថ្ងៃបុណ្យកំណើតគម្រប់ខួប៦៦ឆ្នាំ របស់ម្ចាស់សណ្ឋាគារ​មួយក្នុងទីរួមខេត្តសៀមរាប តែវាក៏ជាថ្ងៃដែលនគរបាលកម្ពុជា បានគោះទ្វាផ្ទះរបស់គាត់ ដើម្បីនាំខ្លួនគាត់ពីបទ​សេព​សន្ធវះជាច្រើនដង ជាមួយកុមារមិនទាន់គ្រប់អាយុ។

អង្គការមួយដែលធ្វើសកម្មភាពប្រឆាំងនឹងការរំលោភសេពសន្ធវះ លើអនិតិជន មានឈ្មោះថា ប្រយុទ្ធដើម្បីកុមារ (Action pour les enfants - APLE) បានរាយការណ៍ពីសកម្មភាពរបស់លោក រូដដូហ្វ៍ ខេ ទៅប្រាប់អាជ្ញាធរ បន្ទាប់ពីអង្គការនេះ​បានតាមដានសកម្មភាពរបស់លោក តាំងពីដើមឆ្នាំនេះមក។ លោក រូដដូហ្វ៍ ទំនងជាត្រូវបានគេឃើញថា​លោកបាននៅ​ជាមួយកុមារមិនទាន់គ្រប់អាយុជាញឹកញាប់។

ម្ចាស់សណ្ឋាគាររូបនេះ បានចូលមករស់នៅក្នុងប្រទេសកម្ពុជា តាំងពីឆ្នាំ១៩៩០ ហើយធ្លាប់ត្រូវបានចោទប្រកាន់​ពីករណី​ដូចគ្នានេះ នៅឆ្នាំ២០០០ និងនៅឆ្នាំ២០០៩រួចមកហើយ ព្រមទាំងបានត្រូវតុលាការកាត់ទោស (ឆ្នាំ២០០៩) ឲ្យជាប់​ពន្ធនាគារ​ចំនួន​ពីរ​ឆ្នាំ ក្នុងករណីមួយដែលពាក់ព័ន្ធនឹងកុមារាអាយុ១៤ឆ្នាំ។

ការសែតមួយក្នុងប្រទេសស្វីសបានសរសេរឲ្យដឹងថា ការិយាល័យ​សហព័ន្ធនៃកិច្ចការបរទេស របស់ប្រទេសស្វីស នៅ​ថ្ងៃសុក្រទី០១ខែវិច្ឆិការនេះ ក៏ទើបនឹងបញ្ជាក់អះអាងដែរពីការចាប់ខ្លួន របស់ជនជាតិស្វីសចំណាកស្រុករូបនេះ នៅក្នុង​ប្រទេស​កម្ពុជា។ ប៉ុន្តែការធ្វើបត្យាប័ន​ ឬការចាប់បញ្ជូនជនជាប់ចោទ​ចេញ​ពីប្រទេសកម្ពុជា មិនទាន់ជាកើតមាននៅ​ឡើយ​ទេ ដោយសារតែមិនទាន់មានកិច្ចព្រមព្រៀងណាមួយ ត្រូវបានធ្វើរវាងប្រទេសទាំងពីរ។

អាចមានទោសជាប់ពន្ធនាគារ ៧ឆ្នាំ

លោក ខឹម វណ្ណបូ នាយកអង្គការ«ប្រយុទ្ធដើម្បីកុមារ» បានថ្លែងប្រាប់ការសែតស្វីសមួយទៀត យ៉ាងដូច្នេះថា «យើង​សង្ឃឹមជឿជាក់ថា រូដដូហ្វ៍ ខេ នឹងត្រូវគេបណ្ដេញចេញពីប្រទេសកម្ពុជា ទៅកាន់ប្រទេសស្វីសវិញ»។ ជាមួយនឹងសំនុំ​ឯកសារដែលជាលទ្ធផលនៃការស្រាវជ្រាវស៊ើបអង្កេតកន្លងមក អង្គការមួយនេះគិតថាបុរសអ្នកមានប្រាក់រូបនេះ នឹងត្រូវ​ប្រឈមនឹងទោសជាប់ពន្ធនាគារយ៉ាងហោចណាស់ ៧ឆ្នាំ។ លោក ខឹម វណ្ណបូ បានសម្ដែងនូវក្ដីសង្ឃឹមពី«សារដ៏ច្បាស់»​មួយ ដែលបញ្ជាក់ថា កម្ពុជាមិនមែនជាទិសដៅសម្រាប់ជន ដែលស្វែងរកការរួមភេទ ជាមួយកុមារ​មិនទាន់គ្រប់អាយុ​នោះ​ឡើយ។

គ្រាន់តែអង្គការនេះមួយប៉ុណ្ណោះ ធ្លាប់បាននាំទៅឲ្យប្រព័ន្ធតុលាការចាត់ការ នូវជនប្រព្រឹត្តិក្នុងករណីនេះ ចំនួន ២៧២​នាក់​រួចមកហើយ រាប់ចាប់តាំងពីពេលចាប់កំណើតមក ដែលមានប្រមាណជា១០ឆ្នាំ។ ប៉ុន្តែបញ្ហាដ៏រ៉ាំរ៉ៃ នៅតែមាន​កើត​ឡើង​រហូតមកដល់ថ្ងៃនេះ ប្រៀបបាននឹង«វែកចក»។ នោះ គឺដោយសារតែការអនុវត្តន៍ប្រព័ន្ធច្បាប់ ក្នុងប្រទេសមួយនេះ​នៅ​មាន​កម្រិត ស្ថានភាពសេដ្ឋកិច្ចរបស់ប្រជាជនកម្ពុជា នៅទីទ័លក្រ និងអំពើពុករលួយ​នៅតែកើតមាន​យ៉ាងសន្ធឹក​សន្ធាប់ រវាង​ជនល្មើសនិងអាជ្ញាធរ ឬអ្នកមានអំណាចគ្រាក់ៗ៕

--------------------------------------------------------
ដោយ៖ កេសរកូល - ថ្ងៃទី០១ ខែវិច្ឆិកា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ