ទឹកជំនន់នៅក្នុងប្រទេសកម្ពុជា បានថមថយឥទ្ធិពលរបស់ខ្លួន នៅថ្ងៃសៅរ័៍ទី០៥ខែតុលានេះ ក្នុងតំបន់ជាច្រើន​ដែល​រង​ការប៉ះពាល់ បន្ទាប់ពីបានបង្កឲ្យមនុស្សរងគ្រោះដល់ជីវិត រហូតដល់៣៩នាក់ ក្នុងសប្ដាហ៍កន្លងមក។ នេះជាការថ្លែង​ឲ្យ​ដឹងរបស់ គណកម្មាធិការជាតិគ្រប់គ្រងគ្រោះមហន្តរាយ ហៅកាត់តាមភាសាអង់គ្លេសថា NDCM។

ទឹកជំនន់ល្ហាចល្ហឹម នៅតាមបណ្ដោយផ្លូវជាតិលេខ៦ ឆ្ពោះទៅកាន់ខេត្តកំពង់ចាម នៅថ្ងៃទី០៣ខែតុលា ឆ្នាំ២០១៣។ (រូបថត MONOROOM.info/ O. Vary)

រាជធានីភ្នំពេញ - ទីភ្នាក់ងារព័ត៌មានចិន ស៊ីនហួ (Xinhua) បានធ្វើរបាយការណ៍ ដោយបានស្រង់សម្ដីអ្នកនាំពាក្យ​នៃ​គណកម្មាធិការ លោក កែវ វី មកបញ្ជាក់ថា «ស្ថានភាពបានប្រសើរជាងមុនហើយឥឡូវនេះ កម្រិតកំពស់ទឹក បានថយ​ចុះនៅក្នុងតំបន់ជាច្រើន ដែលបានលិចលង់ដោយទឹកជំនន់»។

លោក កែវ វី បានចង្អុលបន្ថែមថា តំបន់ជាច្រើននៃខេត្តទាំង៩ ដែលរងគ្រោះដោយទឹកជំនន់ នៅតែមានការជន់​លិច​នោះ​នៅឡើយ ពីទន្លេមេគង្គ និងពីដៃទន្លេផ្សេងទៀត ដែលទទួលទឹកពីភ្នំ ឬពីតំបន់ផ្សេង។

គ្រោះទឹកជំនន់បានប៉ះពាល់ទៅដល់ប្រជាជនកម្ពុជា ប្រមាណជា ១៣០ពាន់គ្រួសារ ហើយបានបង្ខំឲ្យប្រជាជនចំនួន ១០ពាន់គ្រួសារ ត្រូវបានធ្វើការជម្លៀសខ្លួន ទៅរកទីទួលសុវត្ថិភាព។ អ្នកនាំពាក្យគណកម្មធិការជាតិ បានបន្តទៀតថា ផ្ទះសម្បែងប្រជាពលរដ្ឋប្រមាណជា ១០០ខ្នង សាលារៀនប្រមាណជា ៧៦០ និងវត្តអារាមប្រមាណជា ៣៥៣ ត្រូវ​បាន​រងគ្រោះដោយទឹកជំនន់នេះ។

ជាពិសេសទៅទៀត ដីស្រែចំការច្បារដំណាំច្រើនជាង ១១៥ពាន់ហិចតា ក៏ត្រូវបានលិចបាត់នៅក្រោមទឹកជំនន់​ដ៏​អាក្រក់​នេះដែរ។

ប្រទេសកម្ពុជាបានរងការប៉ះពាល់នឹងគ្រោះទឹកជំនន់ ច្រើនតែនៅរវាងពីខែសីហា មកទល់នឹងខែតុលា។ នៅឆ្នាំ២០១១ របាយការណ៍របស់គណកម្មធិការដដែល បានអះអាងថា ព្រះរាជាណាចក្រមួយនេះ បានស្គាល់នូវគ្រោះមហន្តរាយ​ដ៏​អាក្រក់ជាងគេ ដែលបានបង្កឲ្យមានមនុស្ស២៥០នាក់ បានបាត់បង់ជីវិត។ ឆ្នាំ២០១២កន្លងទៅ គ្រោះទឹកជំនន់មិនបាន​កាចសាហាវណាស់ណាទេ តែក៏បានសម្លាប់មនុស្ស ១៤នាក់ដែរ នៅទូទាំងប្រទេស៕

------------------------------------------------
ដោយ ៖ កេសរកូល - ថ្ងៃទី០៥ ខែតុលា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ