សហព័ន្ធរ៉ូស្ស៊ី បានប៉ុនប៉ងធ្វើការថ្កោលទោស ចំពោះការវាយប្រហារ កាលពីម្សិលម៉ិញ ពីសំណាក់ប្រទេសបស្ចឹមលោក ទៅលើគោលដៅមួយចំនួន ក្នុងប្រទេសស៊ីរី។ ការថ្កោលទោសនេះ ត្រូវបានប្រទេសមហាអំណាចមួយនេះ គ្រោងឲ្យមានការ​អនុម័ត្រ តាមរយៈក្រុមប្រឹក្សាសន្តិសុខ អង្គការសហប្រជាជាតិ ដែលត្រូវបានកោះប្រជុំ ជាបន្ទាន់ នៅរសៀលថ្ងៃនេះ ដោយតំណាងអចិន្ត្រៃយ៍ នៃរដ្ឋាភិបាលរ៉ូស្ស៊ី ប្រចាំនៅអង្គការសហប្រជាជាតិ។

បញ្ហានៅត្រង់ថា រដ្ឋាភិបាលលោកប្រធានាធិបតី វ្លាឌីមៀរ ពូទីន (Vladimir Poutine) ដែលជាមិត្តល្អូកល្អើន ជាមួយរបបដឹកនាំលោក បាឆារ អាល់អាសាធ (Bachar al-Assad) បានទទួលបរាជ័យ នៅចំពោះការប៉ុនប៉ងខាងលើ ហើយការអនុម័ត្រ ញត្តិថ្កោលទោសមួយ មិនអាចចេញរួច ដោយសារប្រទេសរ៉ូស្ស៊ី គ្មានសម្លេងគាំទ្រគ្រប់គ្រាន់។ 

ប្រទេសដែលគាំទ្រញត្តិគាំទ្រនោះ មានបី «រ៉ូស្ស៊ី ចិន និងបូឡេវី» ខណៈប្រទេសដែលជំទាស់ មានចំនួនដល់ទៅ៩ និងប្រទេស ដែលបោះឆ្នោត អនុប្បវាត មានចំនួនបួន។ ដើម្បីឲ្យញត្តិថ្កោលទោស អាចចេញរួច ប្រទេសរ៉ូស្ស៊ី ចាំបាច់ត្រូវមានសម្លេងគាំទ្រ យ៉ាងហោចក៏៩ប្រទេស នៅក្នុងក្រុមប្រឹក្សាសន្តិសុខដែរ។

ញត្តិថ្កោលទោស មានសរសេរបង្ហាញ ពីការព្រួយបារម្ភដ៏ធំធេង ចំពោះ«ការឈ្លានពាន» ប្រឆាំងនឹងរដ្ឋអធិបតេយ្យមួយ ដែលសម្រាប់រដ្ឋាភិបាល​ក្រុង​មូស្គូ វាបាន«រំលោភលើច្បាប់អន្តរជាតិ និងធម្មនុញ្ញ របស់អង្គការសហប្រជាជាតិ»៕