ភ្នំពេញ៖ ការិយាល័យបោះឆ្នោត ក្នុងមណ្ឌលខេត្តសៀមរាបចំនួនដប់ពីរ ត្រូវបានក្រុមប្រឹក្សាធម្មនុញ្ញសេចក្ដីសម្រេច ត្រឹម​តែឲ្យបើកកញ្ចប់សុវត្ថិភាព«ក» ក្នុងការផ្ទៀងផ្ទាត់សម្លេងឆ្នោត ដែលផ្ទុយនឹងការព្រមព្រៀងរបស់ខ្លួន ជាមួយគណបក្ស​សង្គ្រោះជាតិ ថាឲ្យរាប់សន្លឹកឆ្នោតបានការ និងមិនបានការឡើងវិញ ចំនួន៣២ការិយាល័យពីក្នុងការិយាល័យចំនួន២០០ ក្នុងពាក្យបណ្តឹងនោះ។

កញ្ចាប់សុវត្ថិភាពនៃលទ្ធផលឆ្នោត ពីការិយាល័យមួយចំនួនក្នុងខេត្តសៀមរាប ដែលត្រូវយកមកបើកផ្ទៀងផ្ទាត់ឡើងវិញ។ (រូបថត MONOROOM.info/ O.Vary)

នេះជាលើកទីបី ក្នុងការផ្ទៀងផ្ទាត់សម្លេងឆ្នោត ក្នុងកញ្ចប់សុវត្ថិភាព «ក» បន្ទាប់ពីខេត្តក្រចេះ និងខេត្តបាត់ដំបង។ វត្តមាន​នៃអ្នកចូលរួម ក្នុងការផ្ទៀងផ្ទាត់ នាព្រឹកថ្ងៃទី៣០ ខែសីហានេះ រួមមានតំណាងក្រុមប្រឹក្សាធម្មនុញ្ញបីរូប ដូចជាសម្តេច នរោត្តម ចក្រពង្ស, លោក ពិត តាំងសាន និងលោកស្រី ចែម វេយ្យរិទ្ធ។ សមាជិក គ.ជ.ប តំណាងគណបក្ស​នយោបាយ​ពាក់ព័ន្ធ អ្នកអង្កេតការណ៍ជាតិ អន្តរជាតិ និងអ្នកសារព័ត៌មានជាច្រើន ចូលរួមក្នុងការផ្ទៀងផ្ទាត់ នៃការបើកនូវកញ្ចប់​សុវត្ថិភាព«ក»នេះ។

ដោយលោក ហ៊ីង រ៉ុង តំណាង គ.ជ.ប ស្នើសុំដល់តំណាងក្រុមប្រឹក្សាធម្មនុញ្ញ អនុញ្ញាតិដើម្បីកាត់យកកញ្ចប់សុវត្ថិភាព«ក» ក្នុងការផ្ទៀងផ្ទាត់សម្លេងឆ្នោតនោះ ម្ចាស់បណ្តឹងតំណាងគណបក្សសង្គ្រោះជាតិ លោកស្រីកែ សុវណ្ណរត្ន ក៏បដិសេធ ដោយ​ចាត់ទុកថា ការផ្ទៀងផ្ទាត់នេះ«ឥតមានន័យ» ព្រោះមិនត្រូវទៅតាមអ្វី ដែលក្រុមប្រឹក្សាធម្មនុញ្ញបានព្រមព្រៀងគ្នា ក្នុងការ​បើកកញ្ចប់សុវត្ថិភាព«ក» ចំនួន៣២ការិយាល័យ តែបែរជាធ្លាក់មកសល់តែ១២ការិយាល័យទៅវិញនោះ។ លោកស្រី​ក៏​បានបញ្ជាក់បន្ថែម ជូនតំណាងក្រុមប្រឹក្សាធម្មនុញ្ញថា «ខ្ញុំទាមទាឲ្យមានការរាប់សន្លឹកឆ្នោត មិនបានការឡើងវិញ»។

ឯលោក គួយ ប៊ុនរឿន តំណាងគណបក្សសង្គ្រោះជាតិ ក៏បានចាត់ទុកថាការផ្ទៀងផ្ទាត់ ដែលជាសេចក្ដីសម្រេច​របស់ក្រុម​ប្រឹក្សាធម្មនុញ្ញនេះ​មានភាពផ្ទុយស្រឡះពីគោលដៅរបស់គណបក្សសង្គ្រោះជាតិ ព្រោះក្នុងបណ្ដឹង គណបក្សរបស់លោក​បានទាមទារឲ្យមានការបោះឆ្នោត និងផ្ទៀងផ្ទាត់សម្លេងឆ្នោតឡើងវិញ។

ជាការឆ្លើយតមលោកស្រី ចែម វេយ្យរិទ្ធ តំណាងក្រុមប្រឹក្សាធម្មនុញ្ញ បានបញ្ជាក់យ៉ាងច្បាស់ថា «ការចូលរួមក្នុងពេលនេះ គ្រាន់តែធ្វើតាមបញ្ជា និងសេចក្តីសំរេច របស់ក្រុមប្រឹក្សាធម្មនុញប៉ុណ្ណោះ»។ លោកស្រីក៏បានបង្គាប់បញ្ជាឲ្យតំណាងគ.ជ.ប បន្តរនីតិវិធីរបស់ខ្លួន ដោយធ្វើកំណត់ត្រា នូវអ្វីដែលគណបក្សសង្គ្រោះជាតិមិនពេញចិត្ត និងលើកឡើងក្នុងកំណត់ហេតុ​ឲ្យបានត្រឹមត្រូវ។

ក្រោយការពិនិត្យ និងផ្ទៀងផ្ទាត់ ភាពមិនប្រក្រតីបានបង្ហាញជាបណ្តើរៗ ក្រោយពិការផ្ទៀងផ្ទាត់ទៅ​តាមការិយាល័យ​នីមួយៗ រហូតគ្រប់១២ការិយាល័យ។ បញ្ហាដែលត្រូវបានរកឃើញនោះរួមមាន កញ្ចប់សុវត្ថិភាព«ក» ចំនួនប្រាំពីរមិន​បាន​បិទជិតត្រឹមត្រូវ តួលេខនៃទម្រង់១១០២,១១០៨ និងក្រដាសធំ មិនដូចគ្នាទាំងបីទម្រង់ ក៏ដូចជាការមិនចុះទិន្នន័យ​នៃ​សម្លេងឆ្នោត ពិសេសមានកញ្ចប់សុវត្ថិភាព«ក» មួយត្រូវបានរហែកជាដើម។

ខុសពីការព្រមព្រៀង ...

ពាក់ព័ន្ធនឹង«បញ្ហា»ខាងលើ ក្នុងសន្និសិទកាសែត បន្ទាប់ពីបញ្ចប់ការបើកកញ្ចប់សុវត្ថិភាព«ក» លោក គួយ ប៊ុនរឿន ក៏បាន​សម្តែងនូវការ«ខក»ចិត្តថា គោលបំណងនៃបណ្តឹងមានបីបញ្ហា ដែលបានស្នើរឡើងដូចជា «ស្នើឱ្យមានការបោះឆ្នោត​ឡើង​វិញ ចំនួន១៦ការិយាល័យ, ស្នើសុំឲ្យមានការរាប់សន្លឹកឆ្នោតមិនបានការ និងការផ្តល់សុពលភាព​ឡើងវិញចំនួន២០០​ការិយាល័យ និងចំនួន៧៥ការិយាល័យទៀត ត្រូវធ្វើការផ្ទៀងផ្ទាត់សន្លឹកឆ្នោត»។ តំណាងរូបនេះបន្តថា ផ្ទុយមកវិញ​មាន​តែ១២ការិយាល័យប៉ុណ្ណោះ ដែលក្រុមប្រឹក្សាធម្មនុញ្ញសម្រេចឲ្យបើក «ដែល(វា)មិនបានឆ្លុះបញ្ចាំង ពីកំណត់ហេតុដែល​ក្រុម​ប្រឹក្សាធម្មនុញ្ញ បានព្រមព្រៀងជាមួយតំណាងគណបក្សសង្គ្រោះជាតិនោះ»។

លោក គួយ ប៊ុនរឿន បានថ្លែងបញ្ចាក់ថា «យើងនៅតែទ្រាំមើល ចំពោះការធ្វើខុសគោលដៅនេះ។ លទ្ធផល១២ ការិយាល័យ នៅតែមានភាពមិនប្រក្រតីយ៉ាងធ្ងន់ធ្ងរដដែល។ ១២ការិយាល័យមានកញ្ចប់«ខ» ៣ មិនបានកឹបសោរ។ ៧ការិយាល័យមិនបានបិទកញ្ចប់សុវត្ថិភាព "ក" និងតួលេខខុសគ្នាពីទម្រង់របស់បក្ស ហើយសូម្បីទម្រង់១១០២ និង១១០៨ របស់ គ.ជ.ប ខ្លួនឯងក៏ខុសគ្នាដែរ។»

រីឯតំណាង គ.ជ.ប ដែលទទួលបន្ទុកដឹកនាំការពិនិត្យ និងផ្ទៀងផ្ទាត់កញ្ចប់សុវត្ថិភាព«ក»នេះលោក ហ៊ឺ រ៉ុង បានបង្ហាញថា រាល់ការផ្ទៀងផ្ទាត់ឡើងវិញនេះ អនុវត្តទៅតាមច្បាប់ និងធ្វើទៅតាមសេចក្តីសម្រេចរបស់ក្រុមប្រឹក្សាធម្មនុញ្ញ ដែលបាន​អនុញ្ញាតឲ្យ គ.ជ.ប បើកកញ្ចប់សុវត្ថិភាព«ក» ដើម្បីពិនិត្យផ្ទៀងផ្ទាត់លទ្ធផលបោះឆ្នោតលើទម្រង់១១០២, ១១០៨ និង​ការកត់ត្រាសំឡេងឆ្នោត។ លោកបញ្ជាក់ថាបើគិតពីទិន្នន័យ របស់គណបក្សនយោបាយ មិនមានអ្វីខុសគ្នាទេ (វា) ដូចគ្នា​ទៅនឹងលទ្ធផលបោះឆ្នោត បណ្តោះអាសន្នដែល គ.ជ.ប បានផ្សាយដែរ។

«តំណាងគណបក្សនីមួយៗ​ចុះ​ហត្ថលេខា យ៉ាងហោចណាស់ពីរនាក់ ...»

ចំពោះតំណាងគណបក្សប្រជាជនកម្ពុជា លោក ស៊ិក ប៊ុនហុក និងជាបេក្ខភាពតំណាងរាស្រ្ត មណ្ឌលខេត្តកំពង់ធំនីតិ​កាល​ទីប្រាំ ដែលបានចូលរួមក្នុងការផ្ទៀងផ្ទាត់នោះ ក៏បានបញ្ជាក់ថា ក្រោយពីមានការផ្ទៀងផ្ទាត់ចំនួនពីរលើករួចមកឃើញថា គណបក្សសង្គ្រោះជាតិនាំមុខស្ទើរគ្រប់ការិយាល័យ នេះបង្ហាញថាគ្មានការលួចបន្លំអ្វីនោះទេ។ លោកបន្តរថា ថ្ងៃនេះទោះបី​ជាគណបក្សប្រជាជន នាំមុខចំនួន១១ការិយាល័យ តែនៅគ្រប់ការិយាល័យទាំងអស់ មានតំណាងគណបក្សនីមួយៗ​ចុះ​ហត្ថលេខា យ៉ាងហោចណាស់(តិចបំផុត)ក៏មានពីរនាក់ដែរ។ លោកបង្ហាញថា «ឆ្លងតាមការត្រួតពិនិត្យ និងផ្ទៀងផ្ទាត់​ទាំង​បីខេត្តនេះ ចំពោះការថែម ឬថយដែលបង្ករឲ្យមានការចោទថា មានភាពមិនប្រក្រតីនោះ គ្មានអ្នកណាម្នាក់ ដែលអាច​ធ្វើ​ការលួចបន្លំបាននោះទេ ព្រោះគ្រប់កញ្ចប់ទាំងអស់ ត្រូវច្រកបន្តរគ្នាដូចជា កញ្ចប់«ក» ក្នុងកញ្ចប់«ខ» ក្នុងកញ្ចប់«គ» ក្នុង​កញ្ចប់«ឃ» ដូច្នេះយ៉ាងហោចណាស់ក៏កញ្ចប់«ឃ» ឬ«គ» ត្រូវបានបិទជិត ដែលមិនអាចឲ្យនណាម្នាក់ដកហូត ឬថែម​ថយ​ទៅក្នុងកញ្ចប់«ក» ដែលនៅខាងក្នុងបង្អស់នោះ បានដោយមិនកាត់ខ្សែនៃកញ្ចប់ខាងក្រៅជាបន្តបន្ទាប់នោះបានដែរ។»

តែតំណាងគណបក្សប្រជាជនកម្ពុជា ក៏បានទទួលស្គាល់ដែរ ពីកំហុសត្រង់ថា «លើទម្រង់១១០២ នៃការិយាល័យ​លេខ​០៧១៨ នោះគ្មានកត់ត្រានូវទិន្នន័យសម្លេងឆ្នោត មិនចម្លងដាក់ទាំងអស់តែម្តង។ ប៉ុន្តែទម្រង់១១០៨ និងក្រដាសផ្ទាំងធំ មានតួលេខត្រឹមត្រូវដូចគ្នា។ បេក្ខជនតំណាងរាស្រ្តរូបនេះ ក៏បានកត់សម្គាល់លើករណីមួយចំណុចទៀត ថាចំពោះ​ការិយាល័យ០៦៧៣ សម្លេងឆ្នោតរបស់គណបក្សប្រជាជន លើទម្រង់១១០២មាន២៧២សម្លេង ឯទម្រង់១១០៨មាន​២៩៧​សម្លេង ហើយក្រដាសផ្ទាំងធំក៏មាន២៩៧ដែរ។ លោកថាបញ្ហានេះ ត្រូវតែធ្វើការត្រួតពិនិត្យ និងផ្ទៀងផ្ទាត់​ឡើងវិញ​នៅ​ក្រុម​ប្រឹក្សាធម្មនុញ្ញ។

«មិនបានយកអ្នកនាំពាក្យមកជាមួយ»

រីឯសមាជិកក្រុមប្រឹក្សាធម្មនុញ្ញទាំងបីដូចជាសម្តេច នរោត្តម ចក្រពង្ស, លោក ពិត តាំងសាន និងលោកស្រី ចែម វេយ្យរិទ្ធ ដែលបានចូលរួមជាអធិបតីឃ្លាំមើល ការបើកញ្ចប់សុវត្ថិភាព«ក»នេះ មិនបានធ្វើអត្ថាធិប្បាយអ្វី ពាក់ពន្ធ័នឹង​បញ្ហា​ដែល​កើតមានឡើងនោះទេ ដោយលោកបានប្រាប់ក្រុមអ្នកកាសែតថា «ខ្លួនមិនមែនជាអ្នកនាំពាក្យ ហើយគ្មានអ្វីត្រូវអធិប្បាយ​ទេ។ (…) មិនបានយកអ្នកនាំពាក្យមកជាមួយទេ។»

ទោះជាយ៉ាងណាក៏ដោយ លទ្ធផលនៃការផ្ទៀងផ្ទាត់លទ្ធផលបោះឆ្នោត ទាំង១២ការិយាល័យនេះ មិនប៉ះពាល់ដល់​លទ្ធផលសម្លេងឆ្នោត របស់គណបក្សប្រជាជនកម្ពុជា និងគណកប្សសង្គ្រោះជាតិនោះទេ។ ប៉ុន្តែបានសង្កេតឃើញថា ទាំង១២ការិយាល័យនោះ មានប្រាំពីររិយាល័យ ត្រូវបានចំហរ(មិនឃ្លំ)។

សូមរម្លឹកថាក្រុមប្រឹក្សាធម្មនុញ្ញបញ្ជាឲ្យ គ.ជ.ប បើកកញ្ចប់សុវត្ថិភាព«ក» ជាបន្តបន្ទាប់ដូចជាឃុំជ្រះ មណ្ឌលក្រចេះ​១៣​ការិយាល័យ, មណ្ឌលបាត់ដំបង៨ការិយាល័យ។ បើតាមលទ្ធផលបណ្តោះអាសន្ន របស់គ.ជ.ប នៅខេត្តសៀមរាប បញ្ជាក់​ថាគណបក្សប្រជាជនកម្ពុជា ទទួលបានបួនអាសនៈ និងគណបក្សសង្គ្រោះជាតិទទួលបានពីរអាសនៈ។ កាលពីថ្ងៃទី២៩ ខែសីហា ម្សិលម៉ិញនេះ ក្រុមប្រឹក្សាធម្មនុញ្ញ ក៏បានបដិសេធរួចហើយដែរ នូវបណ្តឹងរបស់គណបក្សសង្គ្រោះជាតិ ក្នុង​ការ​បើកកញ្ចប់សុវត្ថិភាព«ក» ខេត្តកំពង់ធំ។

ចំពោះការិយាល័យចំនួន១២ ក្នុងខេត្តសៀមរាប ដែលត្រូវធ្វើការបើកកញ្ចប់សុវត្ថិភាព«ក» មានការិយាល័យ​លេខ​០២៨៣, ០២៨៥, ០៤២៥, ០៤៤២, ០៨១៧,០៣២៣, ០៣២៤, ០៣២៦, ០២៩៤, ០៦៧៣, ០៧១៨ និង ០៣៤៦។

---------------------------------------------------------
ដោយៈ អ៊ុម វ៉ារី - ភ្នំពេញថ្ងៃទី៣០សីហា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ