ក្រុមហ៊ុនផលិតកាសស្ដាប់ត្រចៀក ដ៏ល្បីល្បាញរបស់សហរដ្ឋអាមេរិក ប៊ីត (Beats) បានប្រកាសចេញកាសស៊េរីថ្មី ដែល​មានគុណភាពសំលេងពិរោះមិនធម្មតា និងជាហីហ៊ោដ៏ល្បីមួយឈ្មោះថា «ប៊ីត អាខូស្ទិកអេជិន» (Beats Acoustic Engine) កាលពីថ្ងៃព្រហស្បតិ៏។

កាសស្ដាប់ត្រជៀក ថ្មីរបស់ក្រុមហ៊ុន ប៊ីត។ (រូបថត របស់ក្រុមហ៊ុន)

កាសប៊ីត បានចេញចរាចរណ៏លើទីផ្សារលើកដំបូងនៅឆ្នាំ២០០៨ ហើយក៏បានក្លាយខ្លួនជាម៉ូដែល ដែលមានការពេញ​និយមបំផុតពីសំណាក់យុវវ័យ និងអ្នកស៊ីវីល័យ។ បន្ទាប់ពីឃើញពីភាពជោគជ័យក្នុងរយះពេល២ឆ្នាំកន្លងមកនេះ បច្ចុប្បន្ន​ក្រុមហ៊ុនផលិតប៊ីត កំពុងតែកែប្រែ និងបន្ថែមគុណភាពសម្លេងឲ្យកាន់ច្បាស់ល្អថែមទៀត។

លក្ខណៈពិសេសរបស់កាសស៊េរីថ្មីនេះ វាបានភ្ជាប់មកជាមួយនូវកម្មវិធី ឌីអេសភី (DSP software) ដែលធ្វើឲ្យគុណភាព​សំលេងកាន់តែច្បាស់ល្អឥតខ្ចោះ និងពិរោះរណ្តំចិត្តជាមួយនឹងបាសអុកល្អ។ មិនត្រឹមតែប៉ុណ្ណោះកម្មវិធីឌីអេសភីនេះ វាបានជួយលុបបំបាត់សំលេងរំខាននានាពីបរិយាកាសខាងក្រៅផងដែរ។

ស្ទូឌីយ៉ូស៊េរីថ្មីនេះ វាមានលក្ខណៈ២យ៉ាងសម្រាប់អ្នកប្រើប្រាស់ ពោលគឺវាអនុញ្ញាតឲ្យអ្នកប្រើប្រាស់​មានការ​ជ្រើស​រើស​ពីរបៀបប្រើ២ប្រភេទ៖ អាចលឺសំលេងខាងក្រៅធម្មតា និងបិទកុំឲ្យលឺសំលេងខាងក្រៅអ្វីទាំងអស់។

ចំពោះសមត្ថភាពថ្មរបស់វា កាសស៊េរីថ្មីនេះ មានចំណុចពិសេសយ៉ាងអស្ចារ្យ ដែលអាចសាកថ្មពេញ ហើយប្រើបាន​រហូត​ដល់២០ម៉ោង។ ហើយវាអាចសាកតាមខ្សែមីក្រូយូអេសប៊ី (microUSB) ក៏បាន ឬបើអ្នកប្រើខ្សែភ្ជាប់កាសទៅនឹងទូរស័ព្ទដៃ វានឹងទាញយកថាមពលពីទូរស័ព្ទ ដោយស្វ័យប្រវត្តិ ប៉ុន្តែលុះត្រាតែវាជិតអស់ថាមពលមែនទែន។

សម្រាប់ការរចនាម៉ូដ ប៊ីតបានរចនារូបរាង្គយ៉ាងស្រស់ស្អាត រលើបរលោងបំផុត។ ជាពិសេសវាមានភាពធុនជាងមុន ក្នុង​ករណីធ្លាក់ ដែលបណ្តាលឲ្យបាក់បែក។ ក្រៅពីនោះវាជួយកាត់បន្ថយការប្រឡាក់នូវធូលីនានា និងមានពន្លឺចែងចាំងជាង​មុនដល់ទៅ១៣%។

កាសប៊ីតស្ទូឌីយ៉ូស៊េរីថ្មីនេះ នឹងដាក់លក់លើទីផ្សារ នៅដើមខែសីហាខាងមុខ ដែលមានតម្លៃប្រមាណ ២៩៩,៩៥ដុល្លា​សហរដ្ឋអាមេរិក៕

----------------------------------------------------
ដោយ៖ វិន ជីវ័ន្ត - ភ្នំពេញ ថ្ងៃទី២៦ ខែកក្កដា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ