លោកប៉ិប ហ្គាឌីអូឡា (Pep Guardiola) បានមកដឹកនាំក្រុមបាយឺន ម៉ូនិជ (Bayern Munich) នៅក្នុងកីឡាដ្ឋានអាឡែន អារ៉េណា (Allianz Arena) លើកដំបូង ខណៈដែលគាត់ជួយឲ្យម្ចាស់ជើងឯកឆែមពានលីក (Champions League) យក​ឈ្នះអតីតក្រុមរបស់គាត់ បាសេឡូណា (Barcelona) ២-០ ក្នុងការប្រកួតមិត្តភាព កាលពីយប់ថ្ងៃពុធ។

លោកប៉ិប ហ្គាឌីអូឡា គ្រូបង្វឹងក្រុម បាយឺន ម៉ូនិជ នៅថ្ងៃទី២៤ ខែកក្កដា។ (រូបថត ANDREAS GEBERT / EFE)

គ្រាប់បាល់ទាំង២គ្រាប់នោះ ធ្វើបានដោយកីឡាករខ្សែការពារហ្វីលីប ឡាម (Philipp Lahm) តែតបញ្ចូលទីនៅនាទីទី១៤ មុនពេលដែលខ្សែប្រយុទ្ធ ម៉ារីអូ ម៉ែនស្ស៊ូគិក (Mario Mandzukic) រកបានគ្រាប់ទី២ នៅ៣នាទីមុនចប់ការប្រកួត។

គ្រូបង្វឹកបាយឺន ម៉ូនិជ លោកហ្គាឌីអូឡា បាននិយាយថា៖ «វាជាការប្រកួតដ៏ពិសេសសម្រាប់ខ្ញុំ។ ខ្ញុំបានចំណាយពេល ស្ទើរតែមួយជីវិតមកហើយ ក្នុងនាមជាកីឡាករ និងជាគ្រូបង្វឹកក្រុមបាសេឡូណា។ ខ្ញុំរីករាយ ហើយខ្ញុំក៏គ្មានអ្វីតវ៉ា នៅក្នុង​កាលៈទេសៈនេះដែរ។»

លោកហ្គាឌីអូឡា ដែលបានឈ្នះពានរង្វាន់ចំនួន១៣ ក្នុងរយះពេល៤ឆ្នាំ នៅបាសេឡូណា មុនពេលដែលគាត់​បាន​ចាក​ចេញពីកីឡាដ្ឋាននូខេម (Nou Camp) កាលពីឆ្នាំមុន បានបើកការប្រកួតដោយគ្មានខ្សែប្រយុទ្ធនោះទេ ពោលគឺគាត់ដាក់​ខ្សែបម្រើ ហ្វ្រែង រីបឺរី (Franck Ribery), អាចិន រ៉ូបិន (Arjen Robben) និងខ្សែបម្រើថូម៉ាស ម៉ុលឡឺ (Thomas Mueller) ឲ្យលេងនៅលើខ្សែបន្ទាត់ប្រយុទ្ធទាំង៣នាក់វិញ។

ទោះជាគ្មានខ្សែប្រយុទ្ធក៏ដោយ កីឡាករប្រធានក្រុមឡាម បានលោតតែតបំប៉ោងសំណាញ់​ទី ឲ្យម្ចាស់​ផ្ទះ​ក្រុមរបស់​អាឡឺម៉ង់នាំមុខបណ្តោះអាសន្ន ១-០ បន្ទាប់ពីទទួលបានវាយកាត់ពីខ្សែបម្រើរីបឺរី មុនពេលដែលខ្សែប្រយុទ្ធបម្រុង ម៉ែនស្ស៊ូគិក ជាអ្នកបញ្ចប់ក្តីសង្ឃឹមក្រុមបាសេឡូណា ដែលចង់បានត្រឹមតែស្មើ នៅចុងម៉ោងនាទីទី៨៧។

គួរបញ្ជាក់ថា គ្រូបង្វឹកបាសេឡូណាថ្មី លោកហ្គឺរ៉ាដូ ម៉ាទីណូ (Gerardo Martino) ពុំមានវត្តមាននៅក្នុងការប្រកួតនោះទេ ខណៈដែលជំនួយការគ្រូបង្វឹកលោកជូឌី រ៉ូរ៉ា (Jordi Roura) ជាអ្នកដឹកនាំការប្រកួតផ្ទាល់ ហើយក៏បានដាក់បញ្ចូល​ខ្សែ​ប្រយុទ្ធ លីយ៉ូនែល ម៉េស៊ី (Lionel Messi) ឲ្យចូលលេងផងដែរ ប៉ុន្តែកីឡាករសំខាន់ៗមួយចំនួនទៀតត្រូវអវត្តមាន ដូចជា​ខ្សែបម្រើស្ស៊ាវី (Xavi), អេនដ្រេស អ៊ីណែស្តា (Andres Iniesta) និងខ្សែបម្រើប្រយុទ្ធណីម៉ា (Neymar) ក៏ពុំទាន់​បង្ហាញ​ខ្លួនដែរ។

ប្រកួតបន្ទាប់របស់ក្រុមបាយឺន ម៉ូនិជ នឹងត្រូវប៉ះក្រុមបូរ៉ាស្សៀ ដតម័ន (Borussia Dortmund) នៅថ្ងៃសៅរ៏សប្តាហ៏នេះ ដែលជាការប្រកួតដណ្តើមពានរង្វាន់កំពូលរបស់អាឡឺម៉ង់ (German Super Cup)។

លោកហ្គាឌីអូឡា បានបន្ថែមថា៖ « ជ័យជំនះមួយនេះ ជាការត្រៀមខ្លួនដ៏ល្អមួយ សម្រាប់ទៅប្រកួតជាមួយដតម័ន។ បាសេឡូណា ជាក្រុមមួយដែលល្អ ហើយពួកគេជាការសាកល្បងដ៏ល្អមួយសម្រាប់ពួកយើង។ យើងមានឱកាសច្រើន ហើយយើងត្រូវតែបញ្ចប់ដោយលទ្ធផលល្អ៕»

សូមទស្សនាវីដេអូនៃការប្រកួតនេះឡើងវិញ ៖

----------------------------------------------------
ដោយ៖ វិន ជីវ័ន្ត - ភ្នំពេញ ថ្ងៃទី២៤ ខែកក្កដា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ