ក្រសួងការបរទេសកម្ពុជា បានធ្វើការប្រតិកម្មចំពោះស្ថានទូតអាមេរិកនៅរាជធានីភ្នំពេញ ដែលបានសម្តែងការព្រួយបារម្ភ អំពីស្ថាភាពនយោបាយនៅកម្ពុជា។ ទន្ទឹមនឹងនេះ ស្ថានទូតរបស់ប្រទេសមហាអំណាច ក៏បានព្រមានពលរដ្ឋរបស់ខ្លួន ដែលកំពុងមានវត្តមាននៅកម្ពុជា ឲ្យមានការប្រុងប្រយ័ត្នគ្រប់ពេលវេលា ខណៈដែលថ្ងៃបោះឆ្នោតកាន់តែខិតជិតមក​ដល់។

សកម្មភាពឃោសនារកសម្លេងឆ្នោត របស់យុវជនគណបក្សប្រជាជនកម្ពុជា។ (រូបថត MONOROOM.info/ O. Vary)

លោក កុយ គួង អ្នកនាំពាក្យក្រសួងការបរទេសកម្ពុជា បានថ្លែងទៅកាន់អ្នកការសែតនៅព្រឹកនេះថា៖ «អាមេរិកបានលើក​ឡើងនេះ គឺគ្រាន់តែជាការលើកឡើងដោយខ្លួនឯងទេ ហើយលោកយល់ថា បរទេសផ្សេងទៀត គេមិនមានការព្រួយបារម្ភ​ដូចសហរដ្ឋអាមេរិកនោះទេ»។

លោកបន្តថា រដ្ឋាភិបាលកម្ពុជា ដែលដឹកនាំដោយលោកនាយករដ្ឋមន្រ្តី ហ៊ុន សែន នឹងខិតខំធ្វើយ៉ាងណា ឲ្យការបោះឆ្នោត​នេះអាចប្រព្រឹត្តទៅដោយសេរី យុត្តិធម៌ និងសន្តិភាព។ អ្នកនាំពាក្យរូបនេះ​អះអាងថា៖ «ការបោះឆ្នោតនឹងប្រព្រឹត្តទៅ​ដោយរលូន ប្រកបដោយប្រជាធិបតេយ្យ តម្លាភាព មិនមានអ្វីធ្វើឲ្យមានភាពច្របូកច្របល់​ដូចអ្នកមួយចំនួនមានការ ព្រួយ​បារម្ភទេ»។

ស្ថានទូតអាមេរិកប្រចាំក្រុងភ្នំពេញ កាលពីថ្ងៃទី២២ ខែកក្កដា ឆ្នាំ២០១៣ បានបង្ហោះសារអេឡិចត្រូនិក លើទំព័រហ្វេសបុក​របស់ខ្លូន។ ដោយធ្វើការព្រមានពលរដ្ឋសហរដ្ឋអាមេរិចទាំងអស់ ដែលកំពុងរស់នៅ និងមានបំណងធ្វើដំណើរចូលមក​ប្រទេសនេះ​ ចាំបាច់ត្រូវមានការប្រុងប្រយ័ត្នអំពីសុវត្ថិភាពផ្ទាល់ខ្លួន។

ស្ថានទូតក៏បានស្មើដល់ពលរដ្ឋអាមេរិចទាំងអស់ មិនត្រូវធ្វើដំណើរទៅកាន់កន្លែងណា ដែលមានហ្វូងមនុស្ស​ប្រមូលផ្តុំគ្នា​ច្រើន បើទោះជាការប្រមូលផ្តុំរបស់គណបក្សនយោបាយមួយចំនួនកន្លងមក មិនទាន់មានករណីអំពើហិង្សា បាតុកម្ម ឬ​ព្រឹត្តិការណ៍ផ្សេងៗក៏ដោយ។ តែស្ថានទូតនេះបានវាយតម្លៃថាការ ប្រឈមមុខដាក់គ្នា និងអាចឈានទៅដល់ការប្រើ​អំពើ​ហិង្សា អាចនឹងកើតឡើងជាយថាហេតុ។

នៅថ្ងៃនេះលើទំព័រហ្វេសបុកគេឃើញមានការបង្ហោះ និងចែកចាយបន្តគ្នានូវវីឌីអូមួយមានរយៈពេលមិនលើសពីប្រាំនាទី ដែលបានបង្ហាញឲ្យឃើញពីការប៉ះទង្គិចគ្នា ដោយហិង្សារវាងយុជនរបស់គណៈបក្សនយោបាយធំពីរ។ បន្ទាប់ពី​ការប៉ះ​ទង្គិច​​បានបញ្ចប់ គេក៏ឃើញមានអ្នករងរបួស និងខូចខាតទ្រព្យសម្បត្តិមួយចំនួនផងដែរ។

លោក កែម ឡី អ្នកវិភាគឯករាជ្សអំពីស្ថានការណ៍នយោបាយនៅកម្ពុជា បានពន្យល់ថា ការព្រួយបារម្ភរបស់​ស្ថានទូត​អាមេរិកវាជាការត្រឹមត្រូវ ព្រោះកំឡុងពេលយុទ្ធនាការឃោសនាបោះឆ្នោតកន្លង គេសង្កេតឃើញមានការប៉ះ​ទង្គិចគ្នា​ទាំង​ពាក្សសំដី និងហិង្សា។

លោកបន្ថែមថា៖ «កន្លងមានអ្នកដឹកនាំមួយរូប បានព្រមានថាមានសង្រ្គាម ខ្មែរក្រហមអាត្រឡប់មកវិញ ខណៈដែលមាន​វិទ្យុមួយផ្សាយថាពួកយោធានឹងធ្វើរដ្ឋប្រហារ បើគណបក្សប្រឆាំងឈ្នះឆ្នោត»។ លោកបានសម្តែងការសោកស្តាយថា អ្នកដឹកនាំស្ថាប័នដែលមានកាតព្វកិច្ច ថែរក្សាសណ្តាប់ធ្នាប់សន្តិសុខសង្គម ផ្តល់ភាពកក់ក្តៅដល់ពលរដ្ឋ​ តែបែជាផ្ញើរ​សារ​គំរាមកំហែងដែលមានលក្ខណៈហឹង្សាទៅវិញ។

--------------------------------------------------------
ដោយៈ អ៊ុំ បូរី - ភ្នំពេញថ្ងៃទី២៥ ខែកក្កដា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ