ជាម យៀប ចាត់ទុកសកម្មភាពតំណាងរាស្រ្តបក្សជំទាស់ ថា«ក្បត់ជាតិ»
លោក ជាម យៀប តំណាងរាស្រ្តគណៈបក្សប្រជាជន ដែលជាគណបក្សកាន់អំណាច បានចាត់ទុកសកម្មភាពរបស់ក្រុមតំណាងរាស្រ្តគណៈបក្សជំទាស់ ថាជាការ«ក្បត់ជាតិ» បន្ទាប់ពីក្រុមតំណាងរាស្រ្តទាំងនេះស្នើរទៅភាគីបរទេសទាំងឡាយ កុំឲ្យចុះហត្ថលេខាជាមួយរដ្ឋាភិបាលកម្ពុជាបច្ចុប្បន្ន រហូតដល់រដ្ឋាភិបាលថ្មីត្រូវបានបង្កើត ក្រោយការបោះឆ្នោតជាតិនាថ្ងៃទី២៨ខែកក្កដា។
លោក ជាម យៀប តំណាងរាស្រ្តគណៈបក្សប្រជាជន។ (រូបថត វិទ្យុជាតិកម្ពុជា)។
អ្នកនាំពាក្យគណៈសង្រ្គោះជាតិលោក យ៉ែម បុញ្ញរិទ្ធ ថ្លែងប្រាប់មនោរម្យព័ងអាំងហ្វូនៅព្រឹកនេះថា វាចាំបាច់ឲ្យមានការព្យួរនូវការចុះហត្ថលេខានេះ និងគួរបន្តនៅក្រោយការបោះឆ្នោត។ លោក បញ្ជាក់ថា៖ «បច្ចុប្បន្នអ្នកតំណាងរាស្រ្ត ដេញអ្នកតំណាងរាស្រ្ត»។ លោក បន្តថាអ្នកតំណារាស្រ្ត មិនត្រឹមតែតំណាងពលរដ្ឋក្នុងមណ្ឌលរបស់ខ្លួនតែប៉ុណ្ណោះទេ គឺតំណាងឲ្យប្រជាជាតិខ្មែរទាំងមូល សិទ្ធិអ្នកតំណាងរាស្រ្តទទួលបានពីប្រជាពលរដ្ឋ ដូច្នេះគ្នាននរណាម្នាក់ដកហូតតាមតែអំពើចិត្តនោះទេ វាខុសទៅនឹងច្បាប់។
ក្រុមតំណាងរាស្រ្តចំនួន ២៩រូបមកពីគណៈបក្សជំទាស់ធំពីរ ដែលបានបង្រួបបង្រួមគ្នា ជាគណៈបក្សតែមួយ បានចេញនូវសេចក្តីប្រកាសពត៌មានមួយ អំពាវនាវទៅស្ថានទូតបរទេស និងស្ថាប័នផ្តល់ជំនួយបរទេសទាំងអស់ កុំឲ្យចុះហត្ថលេខាជាមួយរដ្ឋាភិបាល បន្ទាប់ពីពួកគេត្រូវបានលប់សុពលភាពជាតំណាងរាស្រ្ត ដោយរដ្ឋសភាជាតិ។ ការចេញសេចក្ដីប្រកាសនេះ ស្របពេល ដែលមានការប្រតិកម្មពីសហគមន៍អន្តរជាតិដូចគ្នា ក្នុងនោះមានសហរដ្ឋអាមេរិកជាដើម។
នៅក្នុងសន្និសិទសារពត៌មាននៅមន្ទីររដ្ឋសភា ថ្ងៃទី១០ ខែមិថុនា ឆ្នាំ២០១៣ លោក ឈាង វុន មន្ត្រីរដ្ឋសភាមកពីគណបក្សកាន់អំណាច ក៏បានថ្លែងបញ្ជាក់ ពីការប្រកាសពីការដកមុខនាទី និងបង្កកប្រាក់បំណាច់ របស់អ្នកតំណាងរាស្រ្តចំនួន២៩រូបទាំងនេះដែរ។ នៅក្រោយសន្និសិទសារព័ត៌មាននោះ លោកឈាង វុន ថែមទាំងបានចេញមក«បណ្ដេញ»អ្នកតំណាងរាស្ត្រ សុន ឆៃ មកពីគណបក្សប្រឆាំង សម រង្សី ឲ្យចេញពីបរិវេណរដ្ឋសភាជាតិ មិនឲ្យផ្ដល់កិច្ចសម្ភាស ទៅឲ្យអ្នកកាសែត នៅក្នុងបរិវេណរដ្ឋសភា ដោយទំនងជាលោក ចង់អនុវត្តន៍សេចក្ដីប្រកាស ដែលទើបនឹងសម្រេចនេះ។
លោក ជាម យៀប តំណាងរាស្រ្តគណៈបក្សប្រជាជន បានថ្លែងការពារចំពោះការដកមុខនាទីនេះ ដោយលើកហេតុផលថាការសម្រេចនេះ គឺជាការស្របច្បាប់ ហើយមិនអាចត្រូវបានរិះគន់ ដោយសហគមន៍អន្តរជាតិ ដែលមិនចេះច្បាប់ខ្មែរនោះឡើយ។ ច្បាប់ខ្មែរដែលមួយចំនួន ត្រូវបានគេមើលឃើញថា បង្កើតឡើងក្រោមជំនួយពីសហគមន៍អន្តរជាតិ ទាំងផ្នែកបច្ចេកទេស និងហិរញ្ញវត្ថុ៕
---------------------------------------------------------
ដោយៈ អ៊ុំ បូរី - ភ្នំពេញថ្ងៃទី២២ មិថុនា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ