ជប៉ុន៖ ផ្លែត្រសក់ស្រូវពីរ ដេញថ្លៃលក់ដាច់ក្នុងតម្លៃ«១២០០០អ៊ឺរ៉ូ»
ផ្លែត្រសក់ស្រូវពីរ ជាប្រភេទត្រសក់ស្រូវកង់តាលូប (cantaloups) ត្រូវបានលក់ដាច់នៅក្នុងការលក់ដេញថ្លៃមួយ នៅជប៉ុន កាលពីចុងសប្ដាហ៍មុន ក្នុងតម្លែប្រមាណជា១២ពាន់អ៊ឺរ៉ូ (ប្រមាណជា១៦ពាន់ដុល្លា)។ ជាតម្លៃដ៏ខ្ពស់ មិនដែលធ្លាប់មាន សម្រាប់ផ្លែឈើប្រភេទនេះ ដែលគេគិតថាមានទម្រង់រូបរាងយ៉ាងសមសួន និងមានរសជាតិយ៉ាងឆ្ងាញ់ពិសេស។
ត្រសក់ស្រូវ យូបារី របស់ជប៉ុន។ (រូបជំនួស)
ដើម្បីយល់ន័យពីប្រភទត្រសក់ស្រូវ កង់តាលូប៖ វាជាពូជត្រសក់ស្រូវ ដែលធ្លាប់ត្រូវបានដាំនៅក្នុងភូមិ កង់តាលូប ដែលនៅក្បែរទីក្រុងរ៉ូមប្រទេសអ៊ីតាលី និងត្រូវបានថែរក្សាស្រោចទឹកដោយ បុព្វជិកសាសនាគ្រឹស្ទ៍ នៃព្រះវិហារកាតូលិកនៅទីនោះ។ ប៉ុន្តែត្រសក់ស្រូវដែលលក់ដាច់នៅប្រទេសជប៉ុននេះ មានឈ្មោះជាជប៉ុនម្យ៉ាងទៀតថា យូបារី (Yubari)។ ត្រសក់ស្រូវទាំងពីរផ្លែទម្ងន់ ៣,៧គីឡូក្រាម ត្រូវបានដេញថ្លៃទិញដាច់ ដោយអ្នកបោះដុំមួយរូប ក្នុងតម្លៃ១,៦លានយ៉េន ដែលមានតម្លៃជិតស្មើនឹងរថយន្ដតូចមួយគ្រឿង។
ជាប្រពៃណី ជនជាតិជប៉ុនមិនខ្លាចនឹងចំណាយប្រាក់ដើម្បីទិញវត្ថុណាមួយ ដែលគេគិតថាវាមានលក្ខណៈពិសេស ដូចត្រសក់ស្រូវនេះជាដើម ដែលល្បីថាមានរូបរាងសមសួន រួមទាំងពណ៌សម្បុរ និងរសជាតិថែមទៀតនោះ។ គេគិតថា វាជាសិល្បៈអំណោយផលមកពីធម្មជាតិ ដែលមិនមានតម្លៃណា អាចកាត់ថ្លៃបាន ជាពិសេស ត្រសក់ស្រូវយូបារី ដែលជាផលិតផលផ្លែឈើដ៏កម្រមួយ ហើយត្រូវបានគេដាក់លក់ តែនៅកន្លែងដែលគួរលក់ប៉ុណ្ណោះ។
ការប្រកាសលក់ដេញថ្លៃ ត្រូវបានរៀបចំឡើងនៅក្នុងទីផ្សារដ៏ធំមួយនៃ សាប៉ូរ៉ូ (Sapporo) នៅលើកោះហុកកាដូ (Hokkaido) ទីកន្លែងដែលឈ្មោះ យូបារី នៃអតីតភូមិរុករករ៉ែមួយ ត្រូវបានយកធ្វើជាឈ្មោះរបស់ត្រសក់ស្រូវនេះ។
តម្លៃនេះជាតម្លែខ្ពស់ទីបី សម្រាប់ត្រសក់ស្រូវពីរផ្លែ ដែលធ្លាប់លក់ដាច់នៅជប៉ុន។ ឯកត្តកម្មដែលមានតម្លៃខ្ពស់ជាងគេ គឺនៅឆ្នាំ២០០៨ ដែលត្រសក់ស្រូវពីរផ្លៃ ក្នុងប្រភេទដូចគ្នា ត្រូវបានលក់ដាច់ក្នុងតម្លៃ២,៥លានយ៉េន (ត្រូវជា១៩ពាន់អ៊ឺរ៉ូ ឬ ២៦ពាន់ដុល្លា)៕
------------------------------------------------
ដោយ ឈូករ័ត្ន - ប៉ារីស ថ្ងៃទី០១ ខែមិថុនា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ