គ្រូបង្ហាត់លោក អាឡិច ហ្វឺគឺសិន (Alex Ferguson) និងចាកចេញពីក្រុមបាល់ទាត់មែនឆេស្ទើ យូណាយធីត (Manchester United) នៅផុតសម័យកាលប្រកួតនេះ បន្ទាប់ពីលោកបានដឹកនាំក្រុមនេះ តាំងពីឆ្នាំ១៩៨៦មក។ ឆ្នាំនេះលោកមានអាយុ​៧១ឆ្នាំ ហើយមកទល់នឹងបច្ចុប្បន្ន លោកបាននាំក្រុម ឲ្យក្លាយជាជើងឯកអង់គ្លេស (Premier League) ចំនួន១៣លើក និង​ឆេមពានលីក (Champions League) ចំនួនពីរលើក។

គ្រូបង្ហាត់លោក អាឡិច ហ្វឺគឺសិន នៅពេលក្រុមបាល់ទាត់របស់លោករកគ្រាប់បាល់បានម្ដងៗ។

លើកនេះ ជាលើកចុងក្រោយបង្អស់ ព្រោះលោកបានរំកិលឆ្នាំចូលនិវត្តន៍របស់លោក ជាញយដងមកហើយ។ អ្វីៗក៏នឹង​ត្រូវ​បានបញ្ចប់ រវាងលោក និងក្រុមបាល់ទាត់ដែលលោកបានថែរក្សា តាំងពី២៦ឆ្នាំមកនោះដែរ។ លោក អាឡិច ហ្វឺកឺសិន នឹង​ចាកចេញជាស្ថាពរ ពីកៅអីគ្រូបង្វឹករបស់ក្រុមមែនញ៉ូ នៅចុងបញ្ចប់សម័យកាលប្រកួតក្នុងឆ្នាំនេះ។ ជាដំណឹង ដែលក្រុម​បាល់ទាត់ខ្លួនឯង បានផ្សាយនៅលើគណនីទ្វីសធើរផ្លូវការរបស់ខ្លួន។ ប៉ុន្មាននាទីមកទៀត សេចក្ដីជូនដំណឹងមួយទៀត បាន​ចេញផ្សាយបញ្ជាក់ពីដំណឹងនេះ ដោយអះអាងថា គ្រូបង្វឹករូបនេះបានដឹងច្បាស់ ពីជម្រើសមួយដ៏ល្អរបស់លោក៖ «ការសម្រេចចិត្តនេះ ខ្ញុំមិនបានយកវា ជាការលេងសើចទេ។ ជាពេលវេលាដ៏ល្អមួយ។»

គ្រូបង្វឹកដើមកំណើត មកពីអៀរឡង់រូបនេះ បានសម្ដែងការពេញចិត្ត ពីការចាកចេញរបស់លោក ក្នុងខណៈពេល​ដែល​សុខភាពផ្នែកហិរញ្ញវត្ថុ និងបច្ចេកទេសកីឡា របស់ក្រុម មានលក្ខណរឹងមាំ។ «ជារឿងមួយសំខាន់ណាស់សម្រាប់ខ្ញុំ ដែល​ចាកចេញនៅពេលដែលក្រុម មានការចាត់ចែងនិងមានរូបរាងដ៏ល្អបែបនេះ។ គុណភាពរបស់ក្រុម និងភាពនឹងនរ​ទាក់ទង​នឹងអាយុរបស់កីឡាករគ្រប់រូប នឹងអនុញ្ញាតអោយក្រុមស្គាល់នូវភាពជោគជ័យ នៅក្នុងកម្រិតខ្ពស់ជាបន្តទៅទៀត។»

សម្រាប់ដេវីដ បេកខាំ៖ «អរគុណណាស់ លោកនាយ!»

បន្ទាប់ពីសេចក្ដីប្រកាសព័ត៌មាននោះ ប្រតិកម្មមកពីគ្រប់ទិសទី បានធ្លាក់ចុះមក ជាពិសេសនៅក្នុងពិភពកីឡាបាល់ទាត់។ ក្នុងចំណោមនោះ កីឡាករ ដេវីដ បេកខាំ (David Beckham) អតីតកីឡាកររបស់លោក ដ៏ល្បីម្នាក់ បានចេញមករំលឹកថា «លោក (ហ្វឺគឺសិន) មិនត្រឹមជាគ្រូបង្វឹកដ៏ល្អម្នាក់ ដែលខ្ញុំមិនដែលជួបនោះទេ តែលោកក៏ជាឪពុកដ៏ល្អម្នាក់ផងដែរ រាប់ពី​ពេលខ្ញុំបានមកដល់ក្រុមបាល់ទាត់ដំបូង រហូតដល់ខ្ញុំចាកចេញពីក្រុម។»

កីឡាករបាល់ទាត់ ដែលកំពុងទាត់អោយក្រុម បារីស ស៊ាំងហ្សែកម៉ាំង (Paris Saint-Germain) របស់បារាំងរូបនេះ បានបន្ត​រំលឹកគុណគ្រូរបស់លោក យ៉ាងដូច្នេះថា «ខ្ញុំទទួលស្គាល់ពីគុណបំណាច់របស់លោក ដែលបានគាំទ្រនិងការពារខ្ញុំ។ បើ​គ្មានលោក ខ្ញុំនឹងមិនមានថ្ងៃនេះទេ។ ខ្ញុំមានកិត្តិយសណាស់ ដែលបានស្ថិតនៅក្រោមការដឹកនាំ របស់គ្រូបង្វឹកដ៏ល្អម្នាក់ នៅក្នុងប្រវត្តិសាស្ត្របាល់ទាត់។ (...) អរគុណណាស់ លោកនាយ !!!»

ការប្រកួតបាល់ទាត់ជាចុងក្រោយ នៅថ្ងៃអាទិត្យខាងមុខនេះ

តាំងពីលោកចូលវះកាត់ចង្កេះ កាលពីខែសីហាឆ្នាំមុននេះមក គ្រូបង្វឹកដ៏ល្បីទំនងជាចង់ដាក់សុខភាពរបស់លោក មុនមុខ​តំណែងជាមេដឹកនាំក្រុមបាល់ទាត់ដ៏ធំមួយនេះ។ ប៉ុន្តែលោកមិនបានបញ្ចេញដំណឹងអ្វីសោះឡើយ ទាក់ទងនឹងបំណង​នេះ។ មិនត្រឹមតែប៉ុណ្ណោះ លោកអាឡិច ថែមទាំងបានធ្វើអោយគេយល់ថា លោកនឹងបន្តនៅក្នុងក្រុម នៅក្នុងសម័យកាល​ប្រកួតលើកក្រោយ នោះទៀតផង។ ពេលនោះ លោកបាននិយាយថា «សម្រាប់ពេលនេះ ខ្ញុំមិនទាន់មានអារម្មណ៍ថា​នឹង​ចាកចោលក្រុម ដែលខ្ញុំចាត់ទុកថាពិសេសនោះឡើយ។ ក្រុមជើងឯកនេះ នឹងនៅមានឯកភាពយ៉ាងស្អិតរមួត ហើយយើង​នៅទីនេះ សម្រាប់ដំណើរមួយដ៏វែងឆ្ងាយ។»

ក្នុងអាយុ៧១ឆ្នាំ លោកអាឡិច ហ្វឺគឺសិន នឹងចាកចេញពីក្រុមមែនញ៉ូ ជាមួយនឹងតំណែងជាងម្ចាស់ជើងឯក របស់អង់គ្លេស និងអារម្មណ៍យ៉ាងស្ងប់ល្អ។ បន្ទាប់ពីបានស្នងតំណែង លោករ៉ន អាគីនសុង (Ron Atkinson) កាលពីឆ្នាំ១៩៨៦ លោក​អាឡិច​ បានរកភាពជោគជ័យអោយក្រុម បានរហូតដល់ទៅ៣៨ដង។ នៅថ្ងៃអាទិត្យខាងមុខ ជាការជួបប្រកួតចុង​ក្រោយ​បង្អស់ រវាងក្រុមបីសាចក្រហម (មែនញ៉ូ) របស់លោក និងក្រុមស្វេនស៊ី (Swansea) នៅក្នុងផ្ទះរបស់ខ្លួន ហើយក៏ទំនង​ជា​ការប្រកួតចុងក្រោយមួយ ដើម្បីជាការឧទ្ទិសទៅដល់កិច្ចការ ដែលលោកបានធ្វើកន្លងមកនោះដែរ៕

----------------------------------------------------
ដោយ៖ ដ. កែវ - ប៉ារីស ថ្ងៃទី០៨ ខែឧសភា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ