នគរបាលនៅទីក្រុងក្លេវឡេន (Cleveland) បានប្រកាសនៅដើមសប្ដាហ៍នេះថា ស្ត្រីបីរូប​ដែលបាត់ខ្លួនតាំងជាង១០ឆ្នាំមុន ក្នុងខណៈពេលដែលពួកនាងនៅជំទង់នៅឡើយ ត្រូវបានរកឃើញនៅរស់ នៅក្នុងផ្ទះមួយ ចម្ងាយ៣គីឡូម៉ែត្រ ពីកណ្ដាល​ទីក្រុង។

រូបថតតាមស្វែងរក របស់នាងអាមេនដា ប៊ើរី និងនាងជីណា ឌឺជេស៊ុស ក្រោយពេលនាងបាត់ខ្លួន។

នាងអាមេនដា ប៊ើរី (Amanda Berry) បានហៅនគរបាលកាលពីថ្ងៃច័ន្ទ ដោយបាននិយាយថានាងត្រូវបានគេបង្ខាំងខ្លួន។ នាងបានទទូចអោយនគរបាល ធ្វើអន្តរាគមន៍ជាបន្ទាន់ នៅមុនការត្រឡប់មកវិញនៃជនមេគំនិត នៅក្នុងការបង្ខាំងខ្លួនេះ។ នាងនិយាយថា «ខ្ញុំត្រូវបានគេចាប់ពង្រត់ និងបាត់ខ្លួនតាំងពីជាង១០ឆ្នាំមកហើយ។ ខ្ញុំនៅទីនេះ។»

មនុស្សបីនាក់ ជាបងប្អូននឹងគ្នា មានអាយុពី៥០ទៅ៥៤ឆ្នាំ ត្រូវបានឃាត់ខ្លួន។ ជនទាំងបីនាក់ត្រកូល កាត្រូ (Castro) មាន​ឈ្មោះរៀងខ្លួនថា អារីយ៉េល (Ariel) ភេដ្រូ (Pedro) និងអូនីល (Onil)។ អាជ្ញាធរបាននិយាយថា នាងប៊ើរី និងស្ត្រីពីរនាក់​ទៀត នាងជីណា ឌឺជេស៊ុស (Gina DeJesus) និងមៃឃើលី  ក្នៃ (Michele Knight) ត្រូវបានបញ្ជូនទៅកាន់មន្ទីរពេទ្យ តែ​មើលទៅសុខភាពរបស់នាងទាំងបី ទំនងមានសភាពធម្មតា។

នាយនគរបាលក្រុងក្លេវឡេន លោក ម៉ៃឃើល ម៉ាកហ្គេដ (Michael McGrath) បានបញ្ជាក់ថា នៅពេលនគរបាល​ទៅដល់​ទីកន្លែងកើតហេតុ គេបានរកឃើញកុមារម្នាក់អាយុ៦ឆ្នាំ ហើយភ្នាក់ងារនគរបាលចំនួនជាង១០រូប បានរងចាំដីការចូល​ឆែកឆេរក្នុងផ្ទះ។

ផ្ទះដែលឃុំឃាំងនាង។

សង្ស័យលើការងាររបស់នគរបាល ?

នាងប៊ើរី បានបាត់ខ្លួននៅថ្ងៃទី២១ខែមេសាឆ្នាំ២០០៣ ហើយបានអោយដំណឹងមកបងស្រីរបស់នាង ថានាងត្រូវបានគេ​យកនៅទុកក្នុងរោងជាងមួយ។ នៅពេលនោះនាងមានអាយុ១៦ឆ្នាំ។ រីឯនាងឌឺជេស៊ុស ត្រូវបានបាត់ខ្លួននៅមួយ​ឆ្នាំ​ក្រោយមក នៅពេលដែលនាងត្រឡប់ចេញពីសាលា និងទើបតែមានអាយុ១៤ឆ្នាំនៅពេលនោះ។ នាងទាំងពីរត្រូវបាន​រកឃើញ នៅពេលនេះ នៅក្នុងគេហដ្ឋានដែលមានចម្ងាយតែប៉ុន្មានគីឡូម៉ែត្រប៉ុណ្ណោះ ពីកន្លែងដែលនាងបានបាត់ខ្លួន។

ចំណែកឯនាង ក្នៃ វិញ អាជ្ញាធរបាននិយាយថា នាងបានបាត់ខ្លួន នៅពេលនាងមានអាយុ២០ឆ្នាំ នៅឆ្នាំ២០០២។ ញាតិ​មិត្ត​របស់នាងទាំងបី បាននិយាយថា ពួកគេមិនដែលអស់សង្ឃឹមក្នុងការរុករកនោះទេ បើទោះជានាងៗ បានបាត់ខ្លួនជាច្រើន​ឆ្នាំមកហើយក៏ដោយ។ ដោយឡែក អ្នកជិតខាងនឹងគេហដ្ឋានជាប់សង្ស័យនោះ បានថ្លែងថា ពួកគេបានជូនដំណឹង​ទៅ​នគរបាល យ៉ាងហោចណាស់ចំនួនពីរដងរូចមកហើយ នៅប៉ុន្មានឆ្នាំមកនេះ។

អ្នកជិតខាងម្នាក់ បានអះអាងថាខ្លួនបានមើលឃើញស្ត្រីម្នាក់ មិនមានខោអាវស្លៀកពាក់ កំពុងវានៅខាងក្រោយផ្ទះ ពី​ប៉ុន្មានឆ្នាំមុន។ អ្នកជិតខាងម្នាក់ទៀត បានលឺស្នូរបោកអ្វីមួយទៅនឹងទ្វាផ្ទះ ហើយបានកត់សម្គាល់ថា មានស្បោងផ្លាស្ទីក​ត្រូវបានគេបិតនៅលើបង្អួច មិនអោយឃើញចូលទៅក្នុង។

អ្នករស់នៅជាប់របងផ្ទះទាំងនោះ បានថ្លែងថា បន្ទាប់ពីពួកគាត់បានជូនដំណឹងទៅអាជ្ញាធរ នគរបាលជាច្រើនរូប​បានមក​ដល់កន្លែងកើតហេតុ តែមិនដែលបានចូលទៅក្នុងគេហដ្ឋាន ដ៏គួរអោយសង្ស័យនេះទេ។

នាងទាំងបីនាក់ត្រូវបានជួយសង្គ្រោះ ដោយសារមានម្នាក់ពីក្នុងនោះ បានធាក់ទម្លាយសំណាញ់ឃុំឃាំងពួកនាង ដើម្បី​រត់​គេចខ្លួន មុននឹងទូរស័ព្ទទៅកាន់នគរបាល តាមរយៈទូរស័ព្ទក្នុងផ្ទះរបស់អ្នកជិតខាងម្នាក់។

សូមទស្សនាវីដេអូ ដែលនិយាយ​ពីអ្នកជិតខាងម្នាក់ ថ្លែងទៅកាន់អ្នកសារព័ត៌មាន ដូចខាងក្រោម៖

-----------------------------------------------------
ដោយ សេក មនោរកុមារ - ប៉ារីស​ ថ្ងៃទី៧ ខែឧសភា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ