កែម ឡី៖ បក្សសង្គ្រោះជាតិកំពុងចូលអន្ទាក់ បក្សកាន់អំណាច
អ្នកឃ្លាំមើលស្ថានការនយោបាយ និងអ្នកវិភាគឯករាជ្យ លោក កែម ឡី បានថ្លែងថា ការបង្កើតឱ្យមានក្រុមមតិភាគតិច នៅក្នុងសភា ជាល្បែងរបស់គណបក្សប្រជាជនកម្ពុជា ដែលកាន់អំណាចជាង៣០ឆ្នាំ ហើយគណបក្សសង្រ្គោះជាតិ កំពុងតែដើរចូលអន្ទាក់ របស់គណក្សកាន់អំណាចមួយនេះ ដោយខ្លួនឯង។
លោកបានពន្យល់ថា បើទោះបីជាប្រធានក្រុមមតិភាគតិច ដែលមានឋានៈស្មើនាយករដ្ឋមន្រ្តីក៏ដោយ ប៉ុន្តែគ្មានសិទ្ធសម្រេចអ្វីទាំងអស់។ អ្នកវិភាគបញ្ហាសង្គមរូបនេះ បានបញ្ជាក់ទៀតថា៖ «ជារួម នៅក្នុងប្រទេសកាន់លិទ្ធិប្រជាធិបតេយ្យសេរីពហុបក្ស សេចក្តីសម្រេចទាំងឡាយ ត្រូវនៅលើរដ្ឋសភា មតិ៥០បូក ឬមតិភាគច្រើនដាច់ខាត អញ្ចឹងបើមានប្រធានក្រុមអ្នកតំណាងរាស្រ្ត ឬប្រធានក្រុមមតិភាគតិចអីក៏ដោយ ក៏មិនមានប្រយោជន៍អ្វីដែរ ព្រោះយើងត្រូវការសម្រេចក្នុងសភាពេញអង្គ [...]