អ្វី​ទៅ ជា​អត្ថន័យ​និង​សារសំខាន់ នៃ​អត្តសញ្ញាណ​ជាតិ?

តើអត្តសញ្ញាណជាតិជាអ្វី? តើពាក្យនេះផ្តល់សារសំខាន់ បែបណាសម្រាប់យើងទាំងអស់គ្នា ? តើមានជាតិ​សាសន៍​ណាខ្លះ ដែលតែងតែប្រកាន់នូវអត្តសញ្ញាណជាតិរបស់ខ្លួន? ក្នុងនាមយើងជាខ្មែរ តើគួរធ្វើដូចម្តេចខ្លះ ដើម្បី​រក្សា​អត្តសញ្ញាណ​​ជាតិ​​ខ្មែរ ឲ្យបានគង់វង្សតទៅមុខទៀតបាន?
អ្វី​ទៅ ជា​អត្ថន័យ​និង​សារសំខាន់ នៃ​អត្តសញ្ញាណ​ជាតិ?
ទង់ជាតិ របស់ជាតិខ្មែរ ឬរបស់ប្រទេសកម្ពុជា ក្នុងសម័យបច្ចុប្បន្ន (និងជាទង់ជាតិ ក្នុងសម័យមុនឆ្នាំ១៩៧០)។ (រូបថតឯកសារ)
Loading...
  • ដោយ: គល់រាំង ដោយ៖ គល់រាំង - ភ្នំពេញ ថ្ងៃទី១៤ ខែកុម្ភៈ ឆ្នាំ ២០១២
  • កែប្រែចុងក្រោយ: September 01, 2013
  • ប្រធានបទ: ស្រាវជ្រាវ
  • អត្ថបទ: មានបញ្ហា?
  • មតិ-យោបល់

នៅពេលដែលអ្នកធ្វើដំណើរឆ្លងកាត់ ពីតំបន់មួយទៅតំបន់មួយ​នៃពិភពលោក មិនថាជាបុគ្គលធម្មតា អាជ្ញាធរ ឬសាធារណ​ជន​ទេ ពួកគេ​តែងតែមានចម្ងល់ នៅក្នុងចិត្ត ឬតែងតែងសួរអ្នក ដែលជាអ្នកដំណើរថា តើ​អ្នក​ជា​នរណា? ពាក្យ​នរណា​នេះ ជាពាក្យមួយ ដែលបានបញ្ជាក់យ៉ាងច្បាស់ថា តើអ្នកស្ថិតក្នុងក្រុមជាតិ សាសន៍ណាមួយ? តើ​អ្នកមាន​អត្តញ្ញាណអ្វីជាសម្គាល់ ដែល​គេអាចហៅបាន ម្យ៉ាងទៀតថា អត្តសញ្ញាណជាតិ។

អត្តសញ្ញាណជាតិជា សមាសនាម កើតមកពីនាមបីបូកបញ្ចូលគ្នា គឺ អត្ត+សញ្ញាណ+ជាតិ។

តាមវចនានុក្រមសម្តេចព្រះសង្ឃរាជជួន ណាត លោកបានពន្យល់ថា៖
- អត្ត មានន័យថា ខ្លួន ចិត្ត (អាត្ម័ន អាត្មា)
- សញ្ញាណ មានន័យថា សេចក្តីដឹងជាក់ ការយល់ច្បាស់ សេចក្តីចូលចិត្តស៊ប់ គ្រឿងសម្ពាល់ អ្វីៗ ដែល​ប្រើ​ជាគ្រឿងសម្គាល់ កិច្ចការនីមួយៗ យីហោ
- ជាតិ មានន័យថា កំណើត ប្រភពឈាមជ័រ។

តាមន័យខាងលើនេះ យើងអាចឲ្យនិយមន័យ អត្តសញ្ញាណជាតិថា៖ ជាគ្រឿងសម្គាល់ប្រភពឈាមជ័រ ជាតិតកំណើត ច្បាស់លាស់របស់ខ្លួន។

តាមសៀវភៅបេតិកភណ្ឌពិភពលោក និងអត្តសញ្ញាណ លោកបានពន្យល់យ៉ាងដូច្នេះ អត្តសញ្ញាណ មាន​ន័យ​ថា៖

១. លក្ខណៈនៃអ្វីដែលដូចគ្នាសុទ្ធសាធ លក្ខណៈនៃអ្វីដែលតែមួយ។
២. ឯកត្តភាព បុគ្គលិកលក្ខណៈ អត្ថិភាពឯកជន។
៣. លក្ខណៈនៃអ្វី ដែលស្ថិតនៅដូចគ្នា​សុទ្ធសាធនឹងខ្លួនផ្ទាល់ ក្នុងសញ្ចេតនា​ក្នុងផលប្រយោជន៍។

អត្តសញ្ញាណជាតិ សំដែងឡើងតាមរយៈនិមិត្តរូប ដែលរួមមាន ភាសា សំលៀកបំពាក់ជាតិ ទង់ជាតិ ព្រះសង្ហារ ឬភ្លេងជាតិ។ ប្រទេសមួយដែលអាចសម្គាល់ថា ជាជាតិរុងរឿងបាន លុះត្រាតែមានទឹកដី មានភាសា មានជន​ជាតិ មានប្រពៃណី វប្បធម៌ ទំនៀមទម្លាប់ និងមានសេដ្ឋកិច្ច ប្រកបដោយសក្តានុពលផ្ទាល់ខ្លួន ។ យ៉ាង​ណា​​ម៉ិញ​ ជនជាតិ​ណា ដែលតែងតែប្រកាន់ខ្ជាប់​ជានិច្ច នូវ​អត្តសញ្ញាណជាតិរបស់ខ្លួន បើទោះជាត្រូវ​រសាត់​អណ្តែត​ទៅ​ដល់​ទី​ណា​ក៏​ដោយ នោះជនជាតិនោះ នៅតែ​មានឈ្មោះថា ជាអ្នកស្នេហាជាតិ ជាអ្នកដែលស្រលាញ់ អត្ត​សញ្ញាណ​​ជាតិ​​របស់​ខ្លួនពិតប្រាកដ ហើយជនជាតិ ឬជាតិសាសន៍ដទៃទៀត មិន​ហ៊ានមើលងាយឡើយ។

ផ្ទុយមកវិញ ពួកគេតែងតែបានទទួល នូវការសរសើរមកវិញជាដរាប។ បុគ្គលដែលមិនវង្វេង អត្តសញ្ញាណជាតិ​​របស់ខ្លួន គឺមាន​ឈ្មោះថា ជាវីរបុរសរបស់ជាតិ។ អត្តសញ្ញាណជាតិ គឺពិតជាមានសារ សំខាន់​ណាស់​ដែល​អាច​ជួយ​ឲ្យ​ជាតិ​រស់ ជួយឲ្យ​ជាតិ​ល្បី​ឈ្មោះ និងជួយឲ្យជាតិ​គង់វង្ស​យូរអង្វែង​ទៅមុខទៀត។

ចុះសម្រាប់អត្តសញ្ញាណជាតិខ្មែរ?

បុព្វបុរសខ្មែរ តាំងតែពីសម័យបុរាណ លោកតែងតែប្រកាន់ខ្ជាប់ នូវអត្តសញ្ញាណជាតិរបស់ខ្លួន បើទោះណាជា​មាន​ការហូរ​ចូល យ៉ាងគំហុកនូវវប្បធម៌បរទេស មកក្នុងនគរក៏ដោយ។ លោកតែងតែថែរក្សានូវភាសា សាសនា ប្រពៃណី ទំនៀមទម្លាប់ ជាក់ស្តែងដូចជាភាសាខ្មែរដើម អក្សរខ្មែរ សំលៀកបំពាក់ខ្មែរ ចម្រៀងតន្ត្រី សិល្បៈ គំនូរចម្លាក់ របៀបប្រកបមុខរបរ មុខម្ហូប ទំនាក់ទំនងក្នុងសង្គមជាដើម គឺតែរក្សាបានយ៉ាងល្អជាដរាប។ នៅមានជាតិសាសន៍មួយចំនួនទៀត ដែលនៅក្បែរខាង របស់យើង ដែលតែងតែបានទទួលការកោត សរសើរ​ពី​ប្រទេស​ដទៃទៀត ថាបានថែរក្សាយ៉ាងខ្ជាប់ខ្ជួន នូវអត្តសញ្ញាណ របស់​ខ្លួន​ដូចជា៖ ចិន យួន សៀម ជាដើម។

ក្នុងនាមយើងជាខ្មែរ ជាពូជអ្នកសាងអង្គរ ជាពូជអ្នកជា ជាអ្នកដែលធ្លាប់តែល្បាញល្បីក្នុងនាម ជា​អាណាចក្រ​ខ្មែរមួយ​ដែរនៅតំបន់អាស៊ីយើងគួរតែថែរក្សាឲ្យបានខ្ជាប់ខ្ជួន នូវអត្តសញ្ញាណជាតិខ្មែរ ស្របតាម​គំនិតទស្សនៈ​ជឿន​លឿន​របស់ខ្មែរ តាំងតែពីបុរាណកាលរៀងមក។ យើងទាំងអស់គ្នាគួរតែ កែប្រែនូវទម្លាប់មិនល្អនានា ដែល​ជា​គ្រោះភ័យ​ដល់វប្បធម៌​របស់​យើង ដូចមានពាក្យមហាត្មៈគន្ធី បីតា សន្តិភាពពិភពលោកមួយឃ្លា លោកបានពោលថា៖

«ខ្ញុំមិនចង់ឲ្យផ្ទះខ្ញុំព័ទ្ធជិតដោយជញ្ជាំង ហើយបង្អួចខ្ញុំ បិទជិតរហូតនោះដែរ។ ខ្ញុំចង់ឲ្យវប្បធម៌គ្រប់ប្រទេស​ទាំង​អស់ បក់ឆ្លងកាត់ផ្ទះខ្ញុំ ដោយសេរី ដែលអាចឆ្លងបាន។ ប៉ុន្តែ ខ្ញុំមិនព្រមឲ្យខ្លួនខ្ញុំ ដោយទៅ​តាម​វប្បធម៌ ណាមួយទេ»៕

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...