ប្រសិនជាគណបក្សសង្គ្រោះជាតិ ធ្លាប់ស្រែក នៅក្នុងយុទ្ធនាការបោះឆ្នោតមុនៗ នូវឃ្លាថ្មីៗ ដូចជា«ដូរ ឬមិនដូរ» ឬ «ហ៊ុន សែន អើយចុះចេញទៅ» ជាដើមនោះ សម្រាប់គណបក្សប្រជាជនកម្ពុជា ដែលបានរំលាយគណបក្សសង្គ្រោះជាតិ កាលពីឆ្នាំមុនរួច បានបង្រៀន ឲ្យអ្នកគាំទ្ររបស់ខ្លួន នៅក្នុងការដង្ហែក្បួន​ឃោសនាបោះឆ្នោត ក្នុងអាណត្តិនេះ ត្រូវស្រែកផ្ដើម និងបន្ទរតាម ឲ្យដូចតាមការថ្លែងដដែលៗ របស់មេដឹកនាំគណបក្សនេះ ដូចដែលគេធ្លាប់បានឮ តាំងពីច្រើនទសវត្សន៍មកហើយ។

ខាងក្រោមនេះ ជាឯកសារចាត់តាំង ដែលទស្សនាវដ្ដីមនោរម្យ.អាំងហ្វូ ទើបនឹងទទួលបាន ដើម្បីបង្គាប់ឲ្យសមាជិកគណបក្ស ត្រូវស្រែកផ្ដើម និងស្រែកបន្ទរតាម នៅក្នុងការជួបជុំ និងការដង្ហែក្បួនឃោសនាបោះឆ្នោត របស់គណបក្សកាន់អំណាច។

ដោយមានវត្តមាន របស់លោក ហ៊ុន សែន នាយករដ្ឋមន្ត្រី-ប្រធានបក្សផង គណបក្ស​ប្រជាជន​កម្ពុជា​ គ្រោង​នឹង​បិទ​បញ្ចប់ ​យុទ្ធនាការ​ឃោសនាបោះឆ្នោត នៅ​ថ្ងៃ​ទី​២៧ ខែ​កក្កដា ឆ្នាំ​២០១៨ នេះ ដោយធ្វើការ​ជួបជុំ​សមាជិកគណ​បក្ស​ ​ប្រមាណជា ២​សែន ៥​ម៉ឺន​នាក់ នៅ​កោះពេជ្រ។ គណបក្ស​កាន់អំណាច ដ៏ចាស់វស្សា ក៏​គ្រោង​នឹង​ដង្ហែ​ក្បួន​ឃោសនា តាម​វិថី​សំខាន់ៗជាច្រើន ​ក្នុង​រាជធានី​ភ្នំពេញផងដែរ នៅក្នុងថ្ងៃដដែល៕